Ke xjal toc sey cyiꞌj cyxol cycyakil aj Israel
7
Tbajlenxi jlu o wile cyaje anjel waꞌl ke cyuj cycyajil pacꞌ ttxaꞌnil txꞌotxꞌ,
makoꞌn cyuꞌn akeju cyaje cykꞌikꞌ in che xumin twitz txꞌotxꞌ,
makoꞌn cyuꞌn tuꞌn miꞌn cyxumin twitz txꞌotxꞌ,
mi tibaj mar ex mi cyiꞌj tzeꞌ.
2 Ax icx o wile juntl anjel cyjaꞌ ttzaj tuj tjawitz kꞌij,
kꞌiꞌn ju sey tuꞌn teju Dios itzꞌ;
ex jaw tkꞌajkꞌajel twiꞌ anjel cyuwxix,
xi tmaꞌn cye cyaje anjel,
akeju otok txi kꞌoꞌn cyoclen tuꞌn cycꞌixbisante tiꞌj txꞌotxꞌ ex tiꞌj mar,
ex xi tmaꞌn cye:
3 —Miꞌn cycꞌixbisaye txꞌotxꞌ,
tucꞌix mar ex ke tzeꞌ,
maxitzun cꞌoquel cycꞌixbisaꞌne ocxi toc sey kuꞌne tibaj cywitz ke tmajen Kdios.
4 Ex o nbiye cyajlal keju otok tzꞌoc sey cyiꞌj,
144 mil otok tzꞌoc sey cyiꞌj cyxol cycyakil cyiyjil aj Israel.
5 Cyxol tiyjil Judá at cablaj mil otok tzꞌoc sey cyiꞌj;
cyxol tiyjil Rubén at cablaj mil otok tzꞌoc sey cyiꞌj;
cyxol tiyjil Gad at cablaj mil otok tzꞌoc sey cyiꞌj;
6 cyxol tiyjil Aser at cablaj mil otok tzꞌoc sey cyiꞌj;
cyxol tiyjil Neftalí at cablaj mil otok tzꞌoc sey cyiꞌj;
cyxol tiyjil Manasés at cablaj mil otok tzꞌoc sey cyiꞌj;
7 cyxol tiyjil Simeón at cablaj mil otok tzꞌoc sey cyiꞌj;
cyxol tiyjil Leví at cablaj mil otok tzꞌoc sey cyiꞌj;
cyxol tiyjil Isacar at cablaj mil otok tzꞌoc sey cyiꞌj;
8 cyxol tiyjil Zabulón at cablaj mil otok tzꞌoc sey cyiꞌj;
cyxol tiyjil José at cablaj mil otok tzꞌoc sey cyiꞌj;
ex cyxol tiyjil Benjamín at cablaj mil otok tzꞌoc sey cyiꞌj.
Ke xjal nimxix cyajlal toc cyxbalun sak
9 Tbajlenxi jlu o wile nimxix cyajlal xjal,
mi aꞌl jun xjal jacu bant tajlante cye,
otok che tzaj cyuj cycyakil nasyon ex cycyakil cyiyjil xjal,
ex cycyakil tnam,
ex cycyakil cꞌloj xjal junxilchak cyyol,
waꞌl ke twitz tkꞌukbil Dios jatum in cawin ex twitz ju Tal Ẍneꞌl,
toc cyxbalun sak,
ex tzyuꞌn tkꞌab xaꞌj cyuꞌn.
10 Ex jaw tkꞌajkꞌajel cywiꞌ cyuwxix,
in cymaꞌn:
Aju colbil ke tuꞌn Kdios aju kꞌukl tuj tkꞌukbil jatum in cawin,
ex tuꞌnju Tal Ẍneꞌl,
che chi.
11 Ex cycyakil ke anjel waꞌl ke tiꞌjele ju tkꞌukbil Dios ex cyiꞌjele ke tij xjal ex cyiꞌjele ke cyaje querubín;
ex e cub ẍmejeꞌ twitz tkꞌukbil Dios tejxi tpon tacl tibaj cywitz twitz txꞌotxꞌ,
ex e cꞌulun twitz Dios,
12 in cymaꞌn:
Icxwitju.
Ko yolin baꞌn tiꞌj Kdios,
knimsaꞌnctz tbi,
kkꞌonx chjonte te;
ko niman te tuj tcyakil tabkꞌiyil te jumajx,
kmanx oꞌcxte at tnabl ex at tipumal ex at tipun te jumajx.
Icxwitju,
che chi.
13 Ex at jun cyxol ke tij xjal tzaj tkanin weye:
—¿Alcye ke jlu toc cyxbalun sak,
ex jatum ẍe tzaj?
Chi weye.
14 Xitzun nmaꞌne te:
—Baꞌn tuꞌna,
Tat.
Atzun te tzaj tmaꞌn weye:
—Atzun ke jlu ma che etz tuj nimxix yajbil,
ex ma tzꞌel cytxꞌjoꞌn tiꞌj cyxbalun,
ex ma sakix tiꞌj cyxbalun tuꞌn tchcꞌel Tal Ẍneꞌl.
15 Cyjaꞌtzun ma che cub ten twitz tkꞌukbil Dios,
ex in che ajben te Dios kꞌijl ex konicꞌan tuj tja Dios;
ex aju kꞌukl tuj tkꞌukbil che oquel tcwentin tjakꞌ t-xmuꞌj.
16 Ex mlay tzajtl weꞌyaj cyiꞌj,
mlay tzajtl txketleꞌn cyiꞌj,
mlay che tzꞌeꞌy mastl tuꞌn tkan kꞌij ex mlay cynaꞌtl taꞌw cyak;
17 porque aju Tal Ẍneꞌl cpastoril cye,
aju kꞌukl tuj tmijil tkꞌukbil Dios,
ex che xel tiꞌn jatum in che jatz twi aꞌ te chwinklal;
ex ate Dios cꞌelel suꞌnte tcyakil taꞌl cywitz,
chi weye.