—Tzaja [ex queꞌyinxa.]

2 Ex o wile jun chej sak tiꞌj,

ex aju tjax tibaj chej kꞌiꞌn jun xobl plech te kꞌojbil tuꞌn;

ex jax kꞌoꞌn jun coron tuj twiꞌ,

extzun in cub tiꞌj tcyakil tuꞌn,

ex tuꞌn tcub tiꞌj mastl tuꞌn.

3 Tej tel tiꞌn Tal Ẍneꞌl tcabin sey,

xi nbiꞌne in tmaꞌn aju tcabin querubín:

—Tzaja [ex queꞌyinxa.]

4 Extzun juntl chej cyak tiꞌj,

ex aju tjax tibaj chej xi kꞌoꞌn toclen tuꞌn toc kꞌoj,

tuꞌn miꞌn cyten xjal tuj txubtxaj ex tuꞌn tcub cybyon cyib xjal cyxolx;

ex xi kꞌoꞌn jun spad maꞌxix te.

5 Tej tel tiꞌn Tal Ẍneꞌl toxin sey,

xi nbiꞌne in tmaꞌn ju toxin querubín:

—Tzaja [ex queꞌyinxa.]

Ex o wile,

lu jun chej kꞌek tiꞌj.

Ex aju tjax tibaj chej,

tzyuꞌn jun balans tuꞌn.

6 Ex xi nbiꞌne jun tkꞌajkꞌajel cyxol ke cyaje querubín in tmaꞌn:

—Cab libr triw tuꞌn jun denari pwak,

ex kak libr sebad tuꞌn jun denari pwak,

pero miꞌn cub tnajsaꞌna aseyt tucꞌix vin.

7 Tej tel tiꞌn Tal Ẍneꞌl tcyajin sey,

o nbiye tkꞌajkꞌajel twiꞌ tcyajin querubín in tmaꞌn:

—Tzaja [ex queꞌyinxa.]

8 Ex o wile,

lu jun chej kꞌan tiꞌj,

ex at jun xjal tjax tibaj,

toc tbi Camic,

ex lepchix t-xiꞌ cynajbil cyimni tiꞌj;

ex xi kꞌoꞌn toclen tiꞌj tcyajin tnej xjal twitz txꞌotxꞌ tuꞌn cycyim tuj kꞌoj,

tuꞌn weꞌyaj,

tuꞌn txꞌuꞌj yabil,

ex cyuꞌn ke txcup te tjakꞌ cꞌul.

9 Tej tel tiꞌn Tal Ẍneꞌl tjweꞌyin sey,

o wile cyanmi keju otok che cub byoꞌn tuꞌn tlaj tyol Dios ex tuꞌn tlaj xi cychicꞌbaꞌn ju yol axix toc,

tocx cyanmi tjakꞌ altar.

10 Ex jaw tkꞌajkꞌajel cywiꞌ cyuwxix:

—Aya Tajaw Tcyakil,

aya xjan ex ax toc tyola,

¿jtojlo ban tcub cysentens keju najl ke twitz txꞌotxꞌ ex tuꞌn taj tkꞌoꞌna t-xel cye tuꞌn tlaj o ko cub byoꞌne cyuꞌn?

Che chi.

11 Xitzun kꞌoꞌn jun xbalun ẍjoꞌw sak queꞌyin te teyle junjun,

ex xi kꞌmaꞌn cye tuꞌn cyojlan chꞌintl,

acutzun in tzꞌaket cyajlal majen,

akeju junx cyakꞌun cyucꞌil,

ex cyajlal cyerman,

akeju tuꞌn cycub byoꞌn ic tzaꞌn cye e cub byoꞌn.

12 Ex o wile tej tel tiꞌn Tal Ẍneꞌl tkakin sey,

ex tzajtzun cyaknajnab cyuwxix.

Aju kꞌij oc ic tzaꞌn jun xbalun kꞌek,

ex ju xjaw oc tcyakil ic tzaꞌn chicꞌ queꞌyin.

13 Ex ke cheꞌw twitz cyaꞌj e tzaj tzꞌak twitz txꞌotxꞌ ic tzaꞌn jun tkan higo in tzaj tzꞌak twitz oc in yucch tuꞌn jun cykꞌikꞌ cyuwxix.

14 Ex ju cyaꞌj cub naj ic tzaꞌn jun uꞌj in cub baltzꞌiꞌn,

ex cycyakil witz ex tcyakil txꞌotxꞌ tmijil mar e icꞌ kꞌiꞌn tuj cylugar.

15 Ex ke rey twitz txꞌotxꞌ cyucꞌix ke xjal maꞌ cyoclen,

ke kꞌinun,

ke capitán,

keju at cyipumal,

cycyakil majen tzyuꞌn ex cycyakil xjal tzokpiꞌn,

xi cyewan cyib tuj jul ex t-xol pic tuj witz;

16 ex in cymaꞌn cye witz ex cye pic:

—Cytzaj tzꞌake kibaje ex ko cyewan cube twitz Dios aju kꞌukl tuj tkꞌukbil tuꞌn tcawin,

ex ko cyewanxe twitz ju Tal Ẍneꞌl,

porque ma tzaj tkꞌoj,

ex maꞌxix jun castiw tzul kibaje tuꞌn.

17 Porque ma tzul canun ju kꞌij maꞌ t-xilen tuꞌn ttzaj kcastiwoye cyuꞌn,

ex ¿alcye baꞌn tcub weꞌ cywitz?

Che chi.