Aju uꞌj baltzꞌiꞌn tten, ex ju Tal Ẍneꞌl
5
Ex o wile jun uꞌj baltzꞌiꞌn tten tcub tuj tbankꞌab Dios aju kꞌukl tuj tkꞌukbil jatum in cawin,
tzꞌiban tujxi uꞌj ex tiꞌjtzi,
jpuꞌn tuꞌn wuk sey.
2 Ex o wile jun anjel at tipun in tkꞌoꞌn tkanil,
in jaw tkꞌajkꞌajel twiꞌ cyuw ex in tmaꞌn:
—¿Alcye jun at toclen tuꞌn tjaket ju uꞌj tuꞌn ex tuꞌn cyel tiꞌn ke sey tiꞌj?
Chi anjel.
3 Ex mi aꞌl jun in bant tjaket ju uꞌj tuꞌn ex tuꞌn tcuꞌx tqueꞌyin tuj,
mi keju ateꞌ tuj cyaꞌj,
ex mi keju ateꞌ twitz txꞌotxꞌ,
ex mi keju ateꞌ tjakꞌxi txꞌotxꞌ.
4 Nimxix in jaw okꞌe tuꞌnju mintiꞌ cnet jun xjal at toclen tuꞌn tjaket ju uꞌj tuꞌn,
mi tuꞌn tjaw t-schꞌiꞌn,
mi tuꞌn tcuꞌx tqueꞌyin tuj.
5 Ex at jun cyxol ke tij xjal tzaj tmaꞌn weye:
—Miꞌn tzꞌokꞌa;
porque lu ju Balun aju tzaj tiꞌj tiyjil Judá ex tiꞌj tiyjil rey David,
ma cub tiꞌj tuꞌn ex at toclen tuꞌn tjaket ju uꞌj ex tuꞌn cyel tiꞌn ke wuk sey tiꞌj.
6 Ex o wile jun Tal Ẍneꞌl waꞌl twitz ju kꞌukbil,
ex tcub cyxol ke cyaje querubín ex cyxol ke tij xjal,
ic tzaꞌn otok cub byoꞌn,
at wuk tcach ex wuk tbakꞌ twitz,
atzun ke tbakꞌ twitz akeju wuk t-xew Dios in cheꞌx samaꞌn tuj tcyakil twitz txꞌotxꞌ.
7 Ex pon lakꞌeꞌ ju Tal Ẍneꞌl,
ex tzaj ttzyuꞌn ju uꞌj aju tcub tuj tbankꞌab Dios aju kꞌukltok tuj tkꞌukbil.
8 Ex tej ttzaj ttzyuꞌn ju uꞌj,
e cub ẍmejeꞌ keju cyaje querubín ex keju 24 tij xjal twitz ju Tal Ẍneꞌl.
Teyle junjun tij xjal kꞌiꞌn jun chnab arpa cyuꞌn,
ex kꞌiꞌn lak cyuꞌn,
kꞌan pwak cytxꞌotxꞌil,
nojni ke lak tuꞌn storac,
atzun jlu cynaꞌj Dios ke ocslal.
9 Ex xi cybitzan jun bitz acꞌaj,
in cymaꞌn:
Aya at toclena,
cyjaꞌtzun baꞌn tuꞌn tcꞌmonteya ju uꞌj ex tuꞌn tel tiꞌna ke sey tiꞌj;
porque cub byoꞌna,
ex ma che lakꞌet ke xjal tuꞌn tchcꞌela tuꞌn cyten tucꞌil Dios,
te tcyakil cꞌloj cyiyjil xjal ex te tcyakil cꞌloj xjal junxilchak cyyol,
ex cye cycyakil tnam,
ex cye cycyakil nasyon.
10 Ex ma che oc tkꞌoꞌna te rey ex te pal tuꞌn cyajben te Kdios,
ex che cawil cyibaj xjal twitz txꞌotxꞌ,
che chi tuj cybitz.
11 O wile ex o nbiye tkꞌajkꞌajel cywiꞌ nimcu anjel ateꞌ tiꞌjele ju kꞌukbil,
cyucꞌix ke cyaje querubín ex cyucꞌix ke tij xjal;
nimcu cyajlal anjel,
miban cyajlanjtz;
12 ex jaw tkꞌajkꞌajel cywiꞌ cyuwxix in cymaꞌn:
Aju Tal Ẍneꞌl cub byoꞌn,
baꞌn tuꞌn tcꞌmonte toclen,
ex kꞌinumabl,
ex nabl,
ex ipumalj,
ex nimbil te,
ex tajwalil,
ex tuꞌn tjaw nimsaꞌn tbi,
che chi.
13 Ax icx xi nbiꞌne cycyakil tchꞌisben Dios ateꞌ tuj cyaꞌj,
ex ateꞌ twitz txꞌotxꞌ,
ex ateꞌ tjakꞌxi txꞌotxꞌ,
ex tuj mar,
in cymaꞌn cycyakil:
Kkꞌonx chjonte te Dios aju kꞌukl tuj tkꞌukbil,
ex teju Tal Ẍneꞌl;
baꞌn tuꞌn cycꞌmonte nimbil,
ex tuꞌn tjaw nimsaꞌn cybi,
ex tuꞌn cycawin tibaj tcyakil tuj tcyakil tabkꞌiyil te jumajx.
14 Ex keju cyaje querubín in cymaꞌn:
—Icxwitju.
Ex keju 24 tij xjal e cub ẍmejeꞌ,
ex e cꞌulun twitz Dios aju itzꞌ tuj tcyakil tabkꞌiyil te jumajx.