Cynimsaꞌn jawe tbi Kman; cynimsaꞌn jawe, akeye tmajen,

2 akeye ateꞌ tuj tja Kman ex ateꞌye ttxaꞌn peꞌn twitz tja Kman Dios.

3 Cynimsaꞌn jawe Kman porque baꞌn te; cybitzanxe ke bitz te nimbil tbi porque at xtalbil tucꞌil.

4 Porque tuꞌn e jaw t-scꞌoꞌn ke tiyjil Jacob, akeju aj Israel ke, tuꞌn cyoc te tecuxix.

5 Baꞌn wuꞌne maꞌxix toclen Kman Dios cywitz cycyakil ke tilbilal nnoꞌc cydiosin xjal.

6 In tbinchaꞌn Kman tcyakil nok alcye tajbil, tzaꞌnx tuj cyaꞌj ax icx twitz txꞌotxꞌ, tzaꞌnx tuj mar ax icx max t-xeꞌpun.

7 In jaw jlet muj tuꞌn max ttxaꞌnpun txꞌotxꞌ, in tzaj tkꞌoꞌn xleꞌlaj cyaꞌj junx tucꞌil jbal, ex nneꞌtz tiꞌn cykꞌikꞌ tuj tcubil.

8 Tuꞌn e cub tbyoꞌn cycyakil ke nej cycꞌwaꞌl aj Ejipt ex ke nej cyal alumaj.

9 Tuj tnam Ejipt tbincha ke techal ex ke binchben maꞌxix cyipumal tiꞌj rey Faraón ex cyiꞌj ke xjal at cyoclen ttxlaj.

10 E naj nimcu nasyon tuꞌn, e cub tbyoꞌn ke rey nimxix cyipumal:

11 O cub Sehón aju rey cye aj Amorrey, tucꞌix Og aju rey tuj txꞌotxꞌ Basán, ex cyucꞌix cycyakil ke rey tuj Canaán;

12 ex xi tkꞌoꞌn cytxꞌotxꞌ ke rey lu te cyetzbil aj Israel, akeju etzan tuꞌn.

13 Nman, ctel tbiya te jumajx; cucx ctzajel naꞌn tbiya cyuꞌn cycyakil cꞌloj xjal.

14 In xi tbinchaꞌn Kman cyiꞌj ke xjal etzan tuꞌn; at tkꞌakꞌbil tcꞌuꞌj cyiꞌj ke tmajen.

15 Ke tilbilal nnoꞌc cydiosin xjal mya ocslal tiꞌj Dios, kꞌan pwak ex sak pwak cytxꞌotxꞌil, ake jlu tbinchben cykꞌab xjal ke.

16 At cytziꞌ, pero miban che yolin; at tbakꞌ cywitz, pero miban che queꞌyin;

17 at cyẍcyin, pero miban che bin; ex mintiꞌ cyxew in jatz.

18 Akeju binchal cye icx cyten ic tzaꞌn ke tilbilal lu, ax icx keju in keꞌ cycꞌuꞌj cyiꞌj.

19 Akeye aj Israel, cynimsaꞌn jawe tbi Kman, akeye tiyjil Aarón, cynimsaꞌn jawe tbi Kman,

20 akeye aj Leví, cynimsaꞌn jawe tbi Kman; akeye in che niman te Kman, cynimsaꞌn jawe tbi.

21 Nimanxwit tbi Kman tuj tnam Sión, aju Kman najl tuj Jerusalén.

Nimanxwit te Kman.