2 ex tuꞌnju ma chin tzaj biꞌne tuꞌn. Cyjaꞌtzun chin cubsale twitz tuj tcyakil kꞌij te wankꞌible.

3 In tzyete tuꞌn tipumal camic mer ic tzaꞌn tuj cꞌobil, tzaj nim xobajil wiꞌje tuꞌnju chꞌixtok npone tuj cynajbil cyimni; tzaj nxobile ex tzaj cꞌixcꞌoj wiꞌje.

4 In cubsantzune twitz Kman ex nchiye: Nman, chin tcloma.

5 Tzꞌaklxix te Kman ex in tzaj tzꞌeꞌy tcꞌuꞌj kiꞌj, ex nim tkꞌakꞌbil tcꞌuꞌj Kdios kiꞌj.

6 Ate Kman cwentil cye keju nok chꞌin cynabl at. Tej mintiꞌtok wipune in clete tuꞌn.

7 Jaꞌlo mintiꞌtl in baj ncꞌuꞌje porque nim t-xtalbil Kman ma tbincha weye.

8 Tuꞌn ma chin clete tuꞌn miꞌn ncyime, ex tuꞌn miꞌn cucx tel taꞌl nwitze, ex tuꞌn miꞌn ncub tzꞌake.

9 Chin betele baꞌn twitz Kman cyxol ke xjal najl twitz txꞌotxꞌ.

10 Xi woncslaꞌne, cyjaꞌtzun in chin yoline, masque atine tuj nim bis.

11 Tej otok baj ncꞌuꞌje, o nmaye ka cycyakil xjal baꞌn che nicꞌan yol.

12 ¿Tzaꞌn tten tuꞌn tchjet wuꞌne te Kman tcyakilju baꞌn o tbincha wiꞌje?

13 Ctzajel wiꞌne jun vas taꞌl twitz uva te jun oyaj te Kman tuꞌn t-xi nkꞌoꞌne chjonte te, tuꞌnju ma chin clete tuꞌn.

14 Cjapunel wuꞌne tcyakilju yol xi ntziyane te Kman cywitz cycyakil xjal etzan tuꞌn.

15 Maꞌ t-xilen tuj twitz Kman ka ma cyim jun xjal cyxol keju in che niman te.

16 Nman Dios, akine tmajena, tal aju tmajena xuꞌj; tej cꞌaloꞌntok kine, in el tcoꞌpina.

17 Cxel nkꞌoꞌne jun oyaj teya te jun akꞌbil chjonte, ex chin cubsale twitza Nman.

18 Aju yol xi ntziyane te Kman cjapunel wuꞌne cywitz cycyakil xjal etzan tuꞌn,

19 cjapunel wuꞌne ttxaꞌn peꞌn twitz tja Kman, ax tuj tmija tnam Jerusalén.

Nimanxwit tbi Kman.