Aju Kdios atzun taꞌ tuj cyaꞌj
115
Kman Dios, baꞌn tuꞌn tjaw nimset tbiya ex mya aju keye kbi tuꞌn tjaw nimset. Baꞌn tuꞌn tjaw nimset tbiya tuꞌnju at tcꞌujlalila ex tuꞌnju axix toc tyola.2 ¿Tikuꞌn in cymaꞌn xjal cyuj mastl nasyon: Jatum taꞌ Cydios ke jlu? Che chi.
3 Aju Kdios atzun taꞌ tuj cyaꞌj ex in tbinchaꞌn tcyakil alcye taj tuꞌn tbant tuꞌn.
4 Ke tilbilal in che bant cyuꞌn xjal cyuj mastl nasyon, sak pwak ex kꞌan pwak cytxꞌotxꞌil, ex cyuꞌnx ke xjal in cub cybinchaꞌn.
5 At cytziꞌ pero miban che yolin; at tbakꞌ cywitz pero miban che queꞌyin;
6 at cyẍcyin pero miban che bin; at cytxaꞌn pero miban che skon;
7 at cykꞌab pero mlay tzyet jun tiꞌxti cyuꞌn; at cykan pero miban che bet; mi jun tkꞌajkꞌajel in jatz tuj cykul.
8 Ke xjal in che binchan cye ke tilbilal lu ex nnoꞌc keꞌ cycꞌuꞌj cyiꞌj, icx cyten ic tzaꞌn cye.
9 Akeye aj Israel, keꞌc cycꞌuꞌje tiꞌj Kman. A onil ke ex in colin kiꞌj.
10 Akeye pal, keꞌc cycꞌuꞌje tiꞌj Kman. A onil ke ex in colin kiꞌj.
11 Akeye in che niman te Kman, keꞌc cycꞌuꞌje tiꞌj. A onil ke ex in colin kiꞌj.
12 Mintiꞌ nnicꞌ knaꞌl tuꞌn Kman ex ko bel cyꞌiwlaꞌn tuꞌn. Che bel cyꞌiwlaꞌn aj Israel tuꞌn. Che bel cyꞌiwlaꞌn ke pal tuꞌn.
13 Che bel tcyꞌiwlaꞌn keju in che niman te, tzaꞌnx keju maꞌ cyoclen icx keju chꞌin cyoclen.
14 Cuchiwt chmet cybaj ke cyiyjile tuꞌn Kman, ax icx ke cyiyjil ke cycꞌwaꞌle.
15 Awt Kman cyꞌiwlan cyeye, aju binchante cyaꞌj ex txꞌotxꞌ.
16 Te te Kman aju cyaꞌj, atzunju txꞌotxꞌ xi kꞌoꞌn cye xjal tuꞌn Kman.
17 Keju o che cyim ex o che cuꞌpun tuj cynajbil cyimni, mlay bant tuꞌn t-xi cykꞌoꞌn chjonte te Kman;
18 atzun ke cxel kkꞌoꞌn chjonte te Kman jaꞌlo ex te jumajx.
Nimanxwit tbi Kman.