Ate Kman ju rey maꞌxix toclen
99
Ate Kman in cawin, tcubsaꞌn tkꞌukbil cyibaj ke querubín. In che jaw luꞌlun ke nasyon tucꞌix enter txꞌotxꞌ.2 Maꞌxix toclen Kman tuj tnam Sión; maꞌxix toclen cyibaj cycyakil tnam.
3 Nimanxwit tbi, maꞌxix toclen ex xobajilxix;
Ate Dios xjante.
4 Aya jun rey maꞌxix tipumal in tzalaja tuꞌn tbant aju tzꞌaklxix; tuꞌna cub tkꞌoꞌna jun ley tuj tumelxix, o tbinchaya aju tzꞌaklxix ex aju tjikumal tiꞌj cyiꞌj aj Israel.
5 Cynimsaꞌn jawe Kman aju Kdios, ex che ẍmejeꞌcuye twitz tkꞌukbil.
Ate Dios xjante.
6 Ate Moisés tucꞌix Aarón at cyoclen ic tzaꞌnx ke pal; atzunte Samuel at cyxol keju in jaw cynimsaꞌn tbi Kman. Tej t-xi cykanin onbil te Kman, e tzaj tzakꞌweꞌn tuꞌn.
7 O yolin Dios cyucꞌil max tuj jun muj otok cub ten cyibaj, ex o che japun ke tmandamyent cyuꞌn tucꞌix ju ley xi tkꞌoꞌn cye.
8 Aya Kman Dios e jeꞌx ttzakꞌweꞌna ke. Cub tnajsaꞌna cyil, pero ax icx cub tkꞌoꞌna cycastiw tiꞌj cybinchben mya baꞌn.
9 Cynimsan jawe Kman Dios, che ẍmejeꞌcuye twitz twi witz xjan aju etzan tuꞌn.
Porque ate Kman Dios xjante.