Ate Kman jwes tibaj tcyakil twitz txꞌotxꞌ
94
Yecꞌuntz tiba Nman, aya Dios in cub tkꞌoꞌna cycastiw xjal.2 Aya jwes tibaj tcyakil twitz txꞌotxꞌ; weꞌctza cyiꞌj keju in jaw cyniman cyib ex kꞌon cuba cycastiw.
3 ¿Jtojtzun Nman, jtoj txi cycolin tuꞌn cytzalaj ke binchal mya baꞌn?
4 Cycyakil ke binchal mya baꞌn nim in che xmayin, in jaw cyniman cyib ex in baj cyyolin cyib.
5 Nman Dios, cyuꞌntzun ke jlu in che baj yajlaꞌn ke xjal etzan tuꞌna.
6 In cub cybyoꞌn ke meba xuꞌj ex ke stranjer xjal ex cyucꞌix ke cꞌwaꞌl mintiꞌ cyman ex cytxuꞌ.
7 In cymaꞌn: Mintiꞌ in til Dios, aju Tdios Jacob mintiꞌ toc tcwent tiꞌj, che chi.
8 Tzꞌexwit tuj cywiꞌye, akeye xjal miban tzꞌocx jun yol tuj cywiꞌye ex mintiꞌ cynable. ¿Jtoj ban tel cynicꞌe tiꞌj?
9 ¿Mlaypetzun tbi aju binchante t-ẍcyin xjal? ¿Ex mlaypetzun til aju binchante tbakꞌ twitz xjal?
10 ¿Miꞌnpetzun cub cycastiw tuꞌn Dios, aju in xi mayonte cye ke nasyon? ¿Ex mlaypetzun tzꞌel tnicꞌ Dios tiꞌj, aju in kꞌonte xnakꞌtzbil cye xjal tiꞌj ojtzkibl?
11 Baꞌn tuꞌn Kman, oꞌcx in che ximan xjal tiꞌj aju mintiꞌ tajben.
12 Nman Dios, at tzalajbil teju xjal aju in xi tcawina ex in xi tkꞌoꞌna xnakꞌtzbil te tiꞌj tleya,
13 tuꞌntzun tten tuj txubtxaj oc tpon tkꞌijlalil mya baꞌn. Atzun cye xjal mya baꞌn cbelex lacuꞌn jul tuꞌn cyxi tzꞌak tuj.
14 Mlay cyaj tcolin Kman ke xjal etzan tuꞌn, ex mlay che cyaj tkꞌoꞌn cyjunalx.
15 Tzul tkꞌijlalil juntl maj cxel binchet cyiꞌj xjal tuj tumelxix, ex cycyakil xjal tzꞌaklxix baꞌn cꞌelel tuj cywitz.
16 ¿Alcye jun jacu tzul colol wiꞌje cywitz ke xjal ploj cymod ex binchal mya baꞌn?
17 Nokwit mintiꞌ onin Kman wiꞌje, luwtlo kine atine tuj cynajbil cyimni.
18 Tej t-xi nmaꞌne: In cheꞌx jilj nkane, nchitzune, ula onil weye tucꞌil tcꞌujlalila, Nman.
19 Oc in tzaj nximbetze ex in baj ncꞌuꞌje, in tzaj tkꞌukbaꞌna ncꞌuꞌje ex in tzaj tkꞌoꞌna tzalajbil.
20 Mlay mojeꞌ tyola cyucꞌil ke jwes mya tzꞌakl, akeju mintiꞌ in xi cybinchaꞌn cyiꞌj xjal tuj tumel ic tzaꞌn in tmaꞌn ley,
21 in che yolin tiꞌj cyxolx tuꞌn tcub tcastiw xjal mintiꞌ til ex baꞌn tmod, ex in cub cykꞌoꞌn t-sentens tuꞌn tcyim.
22 Atzunte Kman colol wiꞌje; ic tten Dios te weye ic tzaꞌn jun pic nnoꞌc nclon wibe tiꞌj.
23 Oc che najel ke xjal mya baꞌn tuꞌn Kman; tuꞌnx cybinchben mya baꞌn che najel. Oc che najel tuꞌn Kman Dios.