2 chin tcloma porque in chin nimane teya. Aya Ndiose chin tcloma, akine tmajena kꞌukl ncꞌuꞌje tiꞌja.

3 Nman, kꞌakꞌantz tcꞌuꞌja wiꞌje, tcyakil or in jaw tkꞌajkꞌajel nwiꞌye tiꞌja.

4 Nman, tzalajsama ncꞌuꞌje akine tmajena, porque twitza in chin cubsane.

5 Porque baꞌna Nman ex in cub tnajsaꞌna cyil xjal; nimxix tcꞌujlalila cyiꞌj keju in che cubsan cywitz teya.

6 Nman, bintza nnaꞌj Diose, kꞌontz twiꞌya tiꞌj ncubsbile twitza.

7 Oc in tzaj yajbil weye in xi nkanine onbil teya, porque in chin tzaj ttzakꞌweꞌna.

8 Mintiꞌ juntl aju nnoꞌc cydiosin xjal jacu pon ic tzaꞌn teya Nman. Mlay pon cyakꞌunben txkantl ic tzaꞌn teya takꞌunben.

9 Nman Dios, tuꞌna o che bant cycyakil nasyon, oc che tzajel cꞌulul teya ex cjawil cynimsaꞌn tbiya.

10 Porque oꞌcxcu aya Dios nim toclena, ex in che bant ke binchben nim cyipumal tuꞌna.

11 Nman Dios, yecꞌuntza tbeya weye tuꞌntzun woc lpeꞌye tiꞌj tyola axix toc, ex oꞌcx tuꞌn nnimane teya.

12 Nman Dios, cjawil nnimsaꞌne tuꞌn tcyakil wanmiye ex cucx cjawil nnimsaꞌne tbiya.

13 Maꞌxix tcꞌujlalila wiꞌje. Ma chin clete tuꞌna tuꞌn miꞌn nxi tzꞌake tuj cynajbil cyimni.

14 Nman Dios, at jun cꞌloj xjal in jaw cyniman cyib ex jawni cywitz tuꞌn cykꞌojin, mintiꞌ cyaj tiꞌja, ma jaw cyiꞌn cyib wiꞌje ex cyaj tuꞌn ncub cybyoꞌn.

15 Atzun teya Nman Dios, at tcꞌujlalila ex at tkꞌakꞌbil tcꞌuꞌja, at tpasensa, maꞌxix ju tcꞌujlalila ex axix toc tyola.

16 Chin tqueꞌyintza, kꞌakꞌantz tcꞌuꞌja wiꞌje. Chin tcloma akine tmajena. Kꞌontza wipune.

17 Kꞌontza jun yecꞌbil tiꞌj t-xtalbila, tuꞌntzun cyjaw chꞌixwi keju in che icꞌunte wiꞌje oc cyqueꞌyinte jlu. Nman Dios, tuꞌna in tzaj tkꞌoꞌna onbil weye ex kꞌukbabl ncꞌuꞌje.