2 Oꞌcxcu tuꞌn in chin clete ex a in colin wiꞌje. Mlay chin cub tzꞌake tuꞌnju ate colol weye.

3 ¿Jtoj ban txi cycoline tuꞌn miꞌn cyoc tzokpaje wiꞌje? Cyaje tuꞌn ncub cyxitune mer ic tzaꞌn jun tcajonil ja in cub tilj, ex ka ic tzaꞌn jun peꞌn nokx tuꞌn tcubcu tzꞌak twitz txꞌotxꞌ.

4 Oꞌcx in che ximane tiꞌj tuꞌn ncub cyxitune; aju mas in che tzalaje tiꞌj, atzunju nicꞌaj yol. In chin jaw cynimsaꞌne tuꞌn cyyole, pero in cymaꞌne mya baꞌn wiꞌje tuj cyanmiye.

5 Oꞌcx tuꞌn Dios in cub txuleꞌ wanmiye, porque tucꞌil in tzaj aju in chin ayone tiꞌj.

6 Oꞌcx tuꞌn in chin clete ex a in colin wiꞌje. Mlay chin cub tzꞌake, tuꞌnju ate colol weye.

7 Tucꞌil Dios in tzaj colbil weye ex nimbil weye; ate in colin wiꞌje ex colol weye.

8 Akeye tnam xjal cucx keꞌc cycꞌuꞌje tiꞌj Kman. Che yoline tucꞌil tuj naꞌj Dios tuꞌn tcyakil cycꞌuꞌje. Ate Dios colol ke.

9 Ate xjal mintiꞌx tajben, tzaꞌnx ju meba ax icx ju kꞌinun; ka ma che ocx malet cycabil tuj jun balans, mas chꞌin cyalil twitz chꞌin cykꞌikꞌ.

10 Miꞌn tzꞌoc keꞌ cycꞌuꞌje tiꞌj aju nneꞌl cyxcꞌaꞌyine cye xjal, miꞌn jaw cyniman cyibe tiꞌj aju nneꞌl cyelkꞌaꞌne. Ka ma che oque kꞌinun, miꞌn tzꞌoc keꞌ cycꞌuꞌje tiꞌj pwak.

11 Jun maj o yolin Dios; ex atzun cabe yol lu o nbiye: Oꞌcxte Dios at tipumal.

12 Oꞌcx teya at tcꞌujlalila Nman, ex aya in tzaj kꞌonte chojbil te teyle junjun ic tzaꞌnx ju takꞌunben.