—Jacob, Jacob, chi Dios.

Xitzun ttzakꞌweꞌn Jacob:

—Lu kine lu, chi Jacob.

3 Tzajtzun tmaꞌn Dios te cyjaꞌ:

—Akine Dios aju Tdios tmana. Miꞌn xoba tuꞌn t-xiꞌya tuj Ejipt, porque tuj tnam lu che chmetel tiyjila wuꞌne, ex che oquel te jun nintz nasyon. 4 Chin xeꞌle tucꞌila tuj Ejipt, ex ax kine chin ajetz kꞌintle cye tiyjila. Ax icx cbel ten José ttxlaja oc tcyima, chi Dios.

5 Icꞌtzun Jacob tuj Beerseba. Cyuj ke carwaj otok che tzaj t-samaꞌn Faraón te kꞌilte te, jax cykꞌoꞌn ke tcyꞌajal Israel aju cyman Jacob tbi, cyucꞌix ke cycꞌwaꞌl ex ke cyxuꞌjil. 6 Xiꞌtzun Jacob tuj Ejipt cyucꞌix keju ateꞌtok tuj tja, ax icx xi tiꞌn ke twacẍ, ke t-ẍneꞌl ex tcyakilju otok cnet tuꞌn tuj txꞌotxꞌ Canaán. 7 E jeꞌx tiꞌn ke tcyꞌajal tuj Ejipt, ke tmeꞌjel, ke tal tchman ex cycyakil ke tiyjil.

8 Atzun cybi aj Israel jlu, akeju e pon tuj Ejipt; ate Jacob ex ke tiyjil:

Rubén aju tnejel tcyꞌajal Jacob. 9 Ke tcyꞌajal Rubén, atzun ke jlu: Hanoc, Falú, Hezrón ex Carmi.

10 Ke tcyꞌajal Simeón, atzun ke jlu: Jemuel, Jamín, Ohad, Jaquín, Zohar, ex Saúl aju tal ju xuꞌj aj Canaán.

11 Ke tcyꞌajal Leví, atzun ke jlu: Gersón, Coat ex Merari.

12 Ke tcyꞌajal Judá, atzun ke jlu: Er, Onán, Sela, Fares ex Zara; atzunte Er ex Onán otok che cyim tuj txꞌotxꞌ Canaán. Ke tcyꞌajal Fares, atzun ke jlu: Hezrón ex Hamul.

13 Ke tcyꞌajal Isacar, atzun ke jlu: Tola, Fúa, Job ex Simrón.

14 Ke tcyꞌajal Zabulón, atzun ke jlu: Sered, Elón ex Jahleel.

15 Atzun ke tcyꞌajal Jacob jlu, akeju e tzaj tiꞌj Lea tej attok tuj Padan-aram, ex attok jun tmeꞌjel Jacob Dina tbi. Japun 33 xjal tuꞌn tcyakil ke xinak ex ke xuꞌj.

16 Ke tcyꞌajal Gad, atzun ke jlu: Zifión, Hagui, Esbón, Suni, Eri, Arodi ex Areli. 17 Ke tcyꞌajal Aser, atzun ke jlu: Imna, Isúa, Isúi ex Bería; ex attok jun cyanb, Sera tbi. Ke tcyꞌajal Bería, atzun ke jlu: Heber ex Malquiel. 18 Atzun ke tcyꞌajal Jacob jlu, akeju e tzaj tiꞌj Zilpa, aju tmajentok Labán ex tzaj tkꞌoꞌn te Lea aju tmeꞌjel. Japun kaklaj xjal tuꞌn tcyakil.

19 Ke tcyꞌajal Jacob e tzaj tiꞌj Raquel aju t-xuꞌjil, atzun ke jlu: José ex Benjamín. 20 Ke tcyꞌajal José e tzaj tiꞌj Asenat aju tmeꞌjel Potifera, aju pal tuj tnam On, atzun ke jlu: Manasés ex Efraín; ake jlu e ul itzꞌj tuj Ejipt. 21 Ke tcyꞌajal Benjamín, atzun ke jlu: Bela, Bequer, Asbel, Gera, Naamán, Ehi, Ros, Mupim, Hupim ex Ard. 22 Atzun ke tcyꞌajal Jacob jlu, akeju e tzaj tiꞌj Raquel, cyucꞌix ke tal tchman. Japun cyajlaj xjal tuꞌn tcyakil.

23 Aju tcyꞌajal Dan, atzun jlu: Husim. 24 Ke tcyꞌajal Neftalí, atzun ke jlu: Jahzeel, Guni, Jezer ex Silem. 25 Atzun ke tcyꞌajal Jacob jlu, akeju e tzaj tiꞌj Bilha, aju tmajentok Labán ex tzaj tkꞌoꞌn te Raquel aju tmeꞌjel. Japun wuk xjal tuꞌn tcyakil.

26 Tuꞌn tcyakil japun 66 cyajlal xjal e jeꞌx tucꞌil Jacob tuj Ejipt, akeju ax tiyjil, ex mya cyucꞌix ke cyxuꞌjil tcyꞌajal e oc tajlal. 27 Cabe cybet tcyꞌajal José e ul itzꞌj tuj Ejipt. Japuntzun 70 cyajlal tiyjil Jacob e jeꞌx tuj Ejipt.

28 Xi samaꞌn Judá tuꞌn Jacob tuꞌn tpon tucꞌil José, tuꞌn ttzaj José canul tiꞌj tuj txꞌotxꞌ Gosén. Tejtzun cypon tuj Gosén, 29 xi tmaꞌn José cye tmajen tuꞌn tbant tten tcarwaj, ex xiꞌ canul tiꞌj Israel aju tman. Tejtzun tpon twitz tman, tzaj tchleꞌn, oc ten okꞌel twiꞌ t-semil, ex nim tuj o tzꞌokꞌ. 30 Xitzun tmaꞌn Israel te José cyjaꞌ: Jaꞌlo baꞌn tuꞌn ncyime tuꞌnju ma wile twitza, ex baꞌn wuꞌne luya itzꞌx, chi Israel.

31 Xitzun tmaꞌn José cye terman ex cye txkantl xjal ateꞌ tuj tja tman: Ma chinxe kꞌolte tkanil te Faraón ex cxel nmaꞌne te cyjaꞌ: Ma che ul ke wermaniye wucꞌile, cyucꞌix ke txkantl xjal ateꞌ tuj tja nmane, akeju najltok tuj Canaán, 32 ex ma che ul cyiꞌn cyẍneꞌl, tucꞌix cywacẍ ex tcyakilju at cye, porque pastoril ẍneꞌl ke, ex chꞌisal alumaj ke, nchiye, cxel nmaꞌne te. 33 Oc cytxconjtze tuꞌn Faraón ex oc ttzaj tkanin cyeye alcye cyakꞌune, 34 cxeltzun cytzakꞌweꞌne: Pastoril ẍneꞌl koꞌye ktzajlenxe tej matok cꞌwaꞌlx koꞌye ic tzaꞌnx ke kxeꞌchele, che chicuye te, tuꞌntzun cycyaj tene najal tuj Gosén, porque mya baꞌn tuj cywitz aj Ejipt tuꞌn cyten junx cyucꞌil ke pastoril ẍneꞌl, chi José cye.