—Akine José. ¿Itzꞌxpe nmane? Chi José.

Atzun cye terman mintiꞌ o bant ttzakꞌwenjtz cyuꞌn, tuꞌnju biꞌx e secꞌpaj twitz José. 4 Xitzun tmaꞌn José cye terman:

—Che lakꞌetze ntxlaje, chi José.

Atzun cye e jeꞌx lakꞌeꞌ, ex xi tmaꞌn cye:

—Akine José aju cyermaniye, aju tzaj cycꞌayine tuj Ejipt. 5 Atzun jaꞌlo, miꞌn che bisune ex miꞌn tzaj cykꞌoje cyxole tiꞌj ju ntzajlen cycꞌayine tzalu, tuꞌnju ate Dios tzaj samante weye tuꞌn wul neje cywitze tuꞌn cyclet xjal. 6 Ma bant-xi cab abkꞌi ttzajlen weꞌyaj twitz txꞌotxꞌ, ex tuj jweꞌtl abkꞌi jaꞌlo mi aꞌl jun xjal cꞌawal mi cchmol twitz awal. 7 Ate Dios tzaj samante weye tuꞌn wul neje cywitze tuꞌn tcyaj clet cyiyjile twitz txꞌotxꞌ, ex tuꞌn cycolpete tuj jun tumel maꞌxix toclen. 8 Tuꞌntzun jlu, mya cyuꞌne in tzaj cysamaꞌne tzalu, nok oꞌcx tuꞌn te Dios, ex ax te o tzꞌoc kꞌonte weye te onil te Faraón, te nejenel tuj tja ex te gobernador tibaj tcyakil txꞌotxꞌ Ejipt. 9 Cyxi naje tucꞌil nmane ex cymanxe te cyjaꞌ: Chitzun José aju tcyꞌajala: Ate Dios o tzꞌoc kꞌonte weye te gobernador tibaj tcyakil txꞌotxꞌ Ejipt. Tzaja wucꞌile jurat naj. 10 Atzun cnajala tuj lugar Gosén, cyucꞌix ke tcꞌwaꞌla, ke tal tchmana, cycyakil ke taluna ex tcyakilju at teya. Cyjaꞌtzun, nikayin ntxlaje ctela. 11 Atzun cxel nkꞌoꞌne twaya tuꞌnju atx jweꞌ abkꞌi weꞌyaj, tuꞌntzun miꞌn tcyima tuꞌn mebyil, aya ex keju ateꞌ tuj tjaya ex tcyakilju at teya, che chicuye te nmane. 12 Lu witzꞌine Benjamín, ax icx cyeye che oquele testiw tiꞌj, ka acu kine in chin yolin cyucꞌile. 13 Cytxꞌolbanxe te nmane tiꞌj tcyakil woclene toc tzalu tuj Ejipt, ex tiꞌj tcyakilju ma cyile tzalu. Cyxi naje kꞌilte nmane, chi José xi tmaꞌn cye.

14 Tzajtzun tchleꞌn José aju titzꞌin Benjamín tbi, ex oc ten okꞌel. Ax icx te Benjamín oc ten okꞌel chleꞌntok José tuꞌn. 15 El ttzꞌuban José cywitz cycyakil ke terman, ex oc ten okꞌel tej cytzaj tchleꞌn. Te tibajxi jlu, e oc ten ke terman yolil tucꞌil.

16 O pon tkanil lu tucꞌil Faraón tuj tja, chi cyjaꞌ: Ma che ul ke terman José, chi, ex o jaw tzalaj Faraón cyucꞌix ke ajbel te. 17 Xitzun tmaꞌn Faraón te José cyjaꞌ:

—Kꞌmanxa cye termaniya tuꞌn toc cykꞌoꞌn tikatz cychej tuꞌn cyaj tuj Canaán, 18 ex e ttzaj cyiꞌn cyman cyucꞌix ke cyxuꞌjil ex cycꞌwaꞌl, ex e cyul wucꞌile. Cxel nkꞌoꞌne cye aju tbanil txꞌotxꞌ tzalu tuj Ejipt, ex che waꞌl tiꞌj tbanil wabj ctzajel tuj txꞌotxꞌ lu. 19 Kꞌmanxa cye tuꞌn cyxi cyiꞌn carwaj tzalu tuj Ejipt tuꞌn ttzaj cyiꞌn cyxuꞌjil ex ke cycꞌwaꞌl, tucꞌix cymane, ex e cytzaj tzalu. 20 Miꞌn che oc weꞌ tiꞌj aju at cye ma chixin, porque cꞌoquel te cye aju kꞌinumabl at tzalu tuj Ejipt, chi Faraón.

21 Banttzun cyuꞌn ke tcyꞌajal Israel icju. E jeꞌx tkꞌoꞌn José carwaj cye ic tzaꞌnx otok tma Faraón, ex xi tkꞌoꞌn cywa tuj cybe. 22 Ax icx xi tkꞌoꞌn José jun pak t-xbalun teyle junjun; atzun te Benjamín xi tkꞌoꞌn ox syent sak pwak te, ex jweꞌ pak t-xbalun. 23 Ex xi t-samaꞌn José laj bur tjakꞌ iktz tbanilxix attok tuj Ejipt. Ex lajtl bur xiꞌ tjakꞌ iktz triw tucꞌix wabj ex chibj, tuꞌn tbaj tuꞌn tman tuj tbe oc ttzaj. 24 Baj tkꞌolben tib José cyucꞌil ke terman ex xi tmaꞌn cye cyjaꞌ: Miꞌn che kꞌojle tuj be, chi José.

Cubtzun be cyuꞌn. 25 E ajtztzun tuj Ejipt, ex e pon tuj Canaán jatum najltok Jacob aju cyman. 26 Xitzun cytxꞌolbaꞌn te cyman cyjaꞌ: Itzꞌx te José, ex a in cawin tibaj tcyakil txꞌotxꞌ Ejipt, che chi. Biꞌx naj tnabl Jacob tuꞌn jlu, ex mintiꞌ xi tniman. 27 Tej tbaj cytxꞌolbaꞌn tcyakilju otok tma José cye, ex tej tlonte Israel ke carwaj otok che tzaj t-samaꞌn José te kꞌibl te, jaw tzalaj nim, 28 ex tma cyjaꞌ: Ax toc itzꞌx José aju ncyꞌajale. Ma chinxe tucꞌil, ex oc wilaye naꞌnxtok ncyime.