3 Tej ttzaj t-xe cyaꞌj, e baj cawin ke xinak lu ex e jeꞌtz cyucꞌix ke cybur. 4 Naꞌnxtok cyetz lakꞌeꞌ tiꞌj tnam, xi tmaꞌn José te tmayordom: Lpexa cyiꞌj ke xjal lu, ex oc tcub cyiꞌj tuꞌna, kꞌmanxa cye cyjaꞌ: ¿Tikuꞌn ma cybinchaye mya baꞌn te t-xel baꞌn ma binchanjtz cyiꞌje? ¿Tikuꞌn ma tzaj cyelkꞌaꞌne aju tcꞌabl npatrone? 5 ¿Myapetzun a jlu in ajben te tuꞌn tcꞌan ex tuꞌn tkꞌijin? Mya baꞌn ma cybinchaye, chicuya cye, chi José te.

6 Tejtzun tcub cyiꞌj tuꞌn mayordom, xi tmaꞌn cye ax ke yol lu. 7 Atzun cye tzaj cytzakꞌweꞌn:

—Tat, ¿Tikuꞌn in tzaj tmaꞌna keye icju? Akoꞌye tmajena mlayx kbinchaye jun tiꞌxti ic tzaꞌn jlu. 8 Aju pwak jatz cnet kuꞌne cyuj ksaque o tzꞌajtz kiꞌne juntl maj tucꞌila tej ktzaje tuj txꞌotxꞌ Canaán. ¿Tzaꞌntzun tten tuꞌn tetz kelkꞌaꞌne sak pwak ex ka kꞌan pwak tuj tja tpatrona? 9 Akoye ajbel teya; baꞌn tuꞌn tcyim alcye ma jatz cnet cꞌabl ttzi t-sac; atzun keye, jacu ko oque te tmajena, che chi.

10 Xitzun tmaꞌn mayordom cye:

—Baꞌn, e tbant ic tzaꞌnx ma cymaye. Aju ma tzꞌel cnet cꞌabl tiꞌj cꞌoquel te nmajene; atzun txkantl mintiꞌ cyil, chi mayordom.

11 Teylex te junjun el tiꞌn naj tikatz tbur, cub tkꞌoꞌn twitz txꞌotxꞌ ex el tpjuꞌn ttzi t-sac. 12 Octzun ten mayordom jyolte, tzaj keꞌ tiꞌj tnejel tzicbaj, ul baj tiꞌj chꞌiꞌp, ex cnet cꞌabl ttzi t-sac Benjamín tuꞌn. 13 Eltzun cysbitꞌun cyxbalun cyiꞌj tuꞌn bis, teyle te junjun oc tkꞌoꞌn naj tikatz tbur, ex e aj meltzꞌaj tuꞌn cypon juntl maj tuj tnam. 14 Tejtzun tpon Judá cyucꞌix ke terman tja José, axtok taꞌ tuj tja; e cub ẍmejeꞌ twitz ex pon tacl tibaj cywitz max twitz txꞌotxꞌ. 15 Xitzun tmaꞌn José cye cyjaꞌ:

—¿Ti ma cybinchaye? ¿Mintiꞌpetzun baꞌn cyuꞌne jun xinak ic tzaꞌn kine baꞌn kꞌijin? Chi José.

16 Xitzun tmaꞌn Judá:

—¿Alcyetzun kyole ex ka kcolbil kibe twitza, tat? Ma tzꞌel kile tuj kꞌanchaꞌl twitz Dios. Jaꞌlo, tmajena koꞌye tucꞌix aju ma tzꞌel cnet tcꞌabla tiꞌj, chi Judá.

17 Xitzun tmaꞌn José cyjaꞌ:

—Mlay nbinchaye icju. Oꞌcx aju ma tzꞌel cnet ncꞌable tiꞌj, atzunju cyjel ten te nmajene; atzun cyeye baꞌn tuꞌn cyaj meltzꞌaje tuj txubtxaj tja cymane, chi José.

18 Pon lakꞌeꞌ Judá twitz José ex xi tmaꞌn te cyjaꞌ: Tat, in chin cubsane twitza tuꞌn tcub tbiꞌna nyole ex tuꞌn ttzaj tkꞌoꞌna twiꞌya tiꞌj, akine tmajena. Miꞌn tzaj tkꞌoja wiꞌje, tuꞌnju aya ic ttena ic tzaꞌn ax Faraón. 19 Tzaj tkanina keye cyjaꞌ:

—¿Atpe cymane ex ka juntl cyermaniye? Chiya.

20 Xitzun ktzakꞌweꞌne teya cyjaꞌ:

—At kmane, ma tijin wen, ex at jun kitzꞌine cuꞌxunx taꞌ, ul itzꞌj tuj ttijil kmane. Oꞌcx te o cyaj ten tej tcyim jun ttzic aju tal ttxuꞌ, ex cꞌujlaꞌnxix tuꞌn tman, ko chiye.

21 Tzajtzun tmaꞌna keye, akoꞌye tmajena:

—Cyiꞌntze tuꞌn nlonteye twitz, chiya.

22 Xitzun kmaꞌne teya cyjaꞌ:

—Mlayx cyaj tcolin cuꞌxun tman. Ka ma cyaj tcolin, jaculo cyim tman tuꞌn bis, ko chiye.

23 Tzaj tmaꞌntla keye:

—Ka miꞌn ma tzaj cyucꞌine cyitzꞌine, mlay che cꞌmete wuꞌne, chiya.

24 Tejtzun kpone tucꞌil kmane, xi ktxꞌolbaꞌne te tcyakilju o tmaya keye. 25 Tzajtzun tmaꞌn kmane keye cyjaꞌ:

—Cyaj meltzꞌaje lakꞌolte chꞌintl triw, chi kmane.

26 Xitzun kmaꞌne te:

—Mlayx ko cuꞌxe. Jacu ko cuꞌxe oꞌcx ka ma txiꞌ kitzꞌine kucꞌile. Ka miꞌn ma txiꞌ kitzꞌine kucꞌile, mlayx ko cꞌmete tuꞌn xinak ma chixin, ko chiye.

27 Tzajtzun tmaꞌn nmane, aju tmajena:

—Baꞌn cyuꞌne, oꞌcx cabe ncyꞌajale e tzaj tiꞌj nxuꞌjile. 28 O tzꞌel kꞌiꞌn jun cye ntxlaje. Atxixtzun naꞌnx twile twitz, atzun in cub nximane tiꞌj ax toc jun txcuplo o cub byonte te. 29 Ka ma tzꞌel cyiꞌne juntl lu ntxlaje, ex ka at jun mya baꞌn ma tzaj tiꞌj, cyuꞌne oclo chin cymele tuꞌn bis, porque ma chin tijine, chi nmane.

30 Cyjaꞌtzun nakꞌloꞌcxix nmane tiꞌj kꞌa lu; ka mya tucꞌix kꞌa ucꞌin kuꞌne oc npon meltzꞌaje tucꞌil, 31 cymel nmane oc ttil ka mya tucꞌix kꞌa ucꞌin kuꞌne; cyjaꞌtzun at kile twitz kmane ka ma cyim tuꞌn bis, porque ma tijin wen. 32 Tuj ncwente tzaj kꞌa lu tuꞌnju xi nmaꞌne te nmane cyjaꞌ: Ka miꞌn ma tzul meltzꞌaj cuꞌxun wuꞌne, atzun kine at wile twitza te jumajx, nchiye te. 33 Tuꞌntzun jlu in chin cubsane twitza tuꞌn ncyaje te tmajena te t-xel cuꞌxun. Tzokpinxtzuna tuꞌn taj meltzꞌaj cyucꞌil ke ttzic. 34 ¿Tzaꞌn tten tuꞌn waj meltzꞌaje tucꞌil nmane ka mya ucꞌin cuꞌxun wuꞌne? Mlay chin aje tuꞌntzun miꞌn ticꞌ nwitze tiꞌj cꞌixcꞌoj ctzajel tiꞌj nmane, chi Judá.