—Cyxiꞌye juntl maj ex cylakꞌontze chꞌintl triw te kwa, chi Jacob.

3 Xi tmaꞌn Judá te tman:

—Aju xinak tzaj tcyuwsaꞌnxix keye cyjaꞌ: Miꞌn che ultle wucꞌile ka miꞌn ma tzul cyiꞌne cyitzꞌine, chi xinak. 4 Ka ma txi ttzokpiꞌna kitzꞌine tuꞌn t-xiꞌ kucꞌile, jacutzun koꞌxe lakꞌol triw; 5 katzun miꞌn ma txi ttzokpiꞌna, mlayx koꞌxe, tuꞌnju tzaj tmaꞌn xinak keye cyjaꞌ: Miꞌn che ultle wucꞌile ka miꞌn ma tzul cyiꞌne cyitzꞌine, chi xinak, chi Judá.

6 Tmatltzun Israel:

—¿Tikuꞌn cybinchaye mya baꞌn lu wiꞌje? ¿Tikuꞌn xi cymaꞌne te xinak ka attok juntl cyitzꞌine? Chi Israel.

7 Xitzun cytzakꞌweꞌn:

—Axte xinak tzaj kaninte tiꞌj kten ex cyiꞌj keju ateꞌ tuj kja, chi cyjaꞌ: ¿Itzꞌxpe cymane? ¿Atpe juntl cyermaniye? Chi xinak. Atzun keye xi kmaꞌne ic tzaꞌnx tten. ¿Baka o naꞌne tiꞌj ka tuꞌn ttzaj tkanin tuꞌn t-xi kiꞌne kitzꞌine tucꞌil? Che chi.

8 Xitzun tmaꞌn Judá te Israel aju tman cyjaꞌ:

—Kꞌontza cuꞌxun tuj ncwente. Jacu koꞌx naje tuꞌntzun kankꞌin ex tuꞌntzun miꞌn kcyim, mi aya, mi koꞌye ex mi ke kcꞌwaꞌle. 9 Tuj ncwente jacu ten cuꞌxun, ex weye ctzajel tkanina tajlal. Ka mintiꞌ ma tzul wiꞌne juntl maj, ka mintiꞌ ma cubtl nkꞌoꞌne twitza, atzun kine at wile twitza te jumajx. 10 Nokwit mintiꞌ o weꞌye, mawtlo bant-xi cab maj kkane jaꞌlo, chi Judá.

11 Xitzun ttzakꞌweꞌn Israel aju cyman cyjaꞌ:

—Ka ic tten, cybinchamniye jlu: Cykꞌoncuxe tuj cysaque akeju tiꞌxti tbanilxix in che tzaj tkꞌoꞌn txꞌotxꞌ, ex cyiꞌnxe teju xinak te jun oyaj: cyiꞌnxe chꞌin bálsamo, chꞌin taꞌl cab, chꞌin perjum, chꞌin tkꞌolil tzeꞌ mirra, ex jun byuj cywitz tzeꞌ baꞌn cycꞌaxunjtz. 12 Cyiꞌnxe cab maj tajlal pwak ic tzaꞌn xi cyiꞌne tnejel maj, ex cywitzelcuye che oquex kꞌonte pwak aju ajtz kꞌoꞌn tuj cysaque, tuꞌnju balo nok e tzpet tiꞌj. 13 Cyucꞌinxe cyitzꞌine ex cyxiꞌye juntl maj tucꞌil xinak lu. 14 Awt Dios, aju at tipumal tuꞌn tbant tcyakil tuꞌn, tzꞌakꞌnan tuj tanmi xinak lu tuꞌn ttzaj kꞌakꞌan tcꞌuꞌj cyiꞌje, ex tzꞌetzwit ttzokpiꞌn juntl cyermaniye tucꞌix Benjamín. Atzun weye, ka ma chin cyaj tene mintiꞌ ncꞌwaꞌle, malo bant-x, chi cyman.

15 Xitzun cyiꞌn tcyꞌajal Jacob ke oyaj ex cab maj tajlal pwak ic tzaꞌn tnejel maj, tucꞌix Benjamín xi cyiꞌn. Cubtzun be cyuꞌn, e cuꞌx tuj Ejipt ex e ocx twitz José. 16 Tej ttil José ucꞌintok Benjamín cyuꞌn, xi tmaꞌn te tmayordom tuj tja:

—Kꞌinxa ke xjal lu max njaye. Byon cuba jun wacẍ ex binchan baja tuꞌnju che waꞌl ke xjal lu wucꞌile te chilcukꞌij jaꞌlo, chi José.

17 Tbinchatzun mayordom tcyakil ic tzaꞌnx otok tma José, ex e jeꞌx tiꞌn ke xjal tuj tja José. 18 Atzun cye tzaj t-xobil cyiꞌj tej cyxi kꞌiꞌn tja José, ex in cymaꞌntok cyxolx: Ma ko tzaj kꞌiꞌn tzalu balo tuꞌn tlaj pwak aju aj kꞌoꞌn tuj ksac tej kaj. Jaꞌlo cꞌoquel tzokpaj kiꞌj ex ko oquel te tmajen cyucꞌix ke kbur, che chi.

19 Tejtzun cypon ttzi ja, e jeꞌx lakꞌeꞌ ttxlaj mayordom tuꞌn cyyolin tucꞌil, 20 ex xi cymaꞌn te cyjaꞌ:

—Ay tat. Tej kul aje tnejel maj, axix toc lakꞌol triw koꞌye, 21 ex tej kpone tuj lugar jatum tuꞌn tex akꞌbil kuꞌne, jaket ttzi ksaque, jatz cnet pwak ttzi t-sac teyle te junjun keye, ex cabalx taꞌtok tajlal pwak. Jaꞌlo, lu ma tzul kiꞌne. 22 Ax icx ma tzaj kiꞌntle pwak tuꞌn tlakꞌet triw kuꞌne. Mintiꞌ baꞌn kuꞌne alcye cuꞌx kꞌonte pwak ttzi ksaque tej kul aje tnejel maj, che chi.

23 Xitzun ttzakꞌweꞌn mayordom cye cyjaꞌ:

—Keꞌ cycꞌuꞌje ex miꞌn che xobe. Aju Cydiose ex Tdios cymane, aloju cuꞌx kꞌonte pwak cytziꞌ ke cysaque. O ncꞌame aju cypwake octz cykꞌoꞌne twi triw, chi mayordom.

Etztzun kꞌiꞌn Simeón tuꞌn mayordom tuj pres ex xi tiꞌn cyucꞌil ke terman. 24 Jurat e ocx tiꞌn mayordom tuj tja José, xi tkꞌoꞌn aꞌ cye tuꞌn tel txꞌjet cyiꞌj cykan, ex xi tkꞌoꞌn cywa cybur. 25 Atzun cye, bant tten oyaj cyuꞌn, ex e ayon acux nnuꞌl José te chilcukꞌij, tuꞌnju otok cybi atzun tuꞌn cywaꞌn tja.

26 Tejtzun tul José tja, xi cykꞌoꞌn te ke oyaj otok tzaj cyiꞌn, ex e cub ẍmejeꞌ twitz tejxi tpon tacl tibaj cywitz max twitz txꞌotxꞌ. 27 Xitzun tkanin José cye tzaꞌntok ateꞌ, ex xi tkanintl:

—¿Tzaꞌn taꞌ cymane, aju tij xjal tzaj cymaꞌne weye? ¿Itzꞌxpe? Chi José.

28 E cubtzun mocꞌeꞌ twitz ex xi cytzakꞌweꞌn:

—Baꞌn taꞌ kmane aju ajbel teya, ex itzꞌx, che chi.

29 Baj tqueꞌyin José ex o til Benjamín aju titzꞌin, aju tal ttxuꞌ, ex xi tkanin cye:

—¿Apetzun cyitzꞌine lu, aju cymaye weye?

Xitzun tmaꞌn te cyjaꞌ:

—Awt Dios cyꞌiwlante teya ncyꞌajal, chi José.

30 Ẍibxix pon tuj tanmi José tej ttil aju titzꞌin, xi tjyoꞌn jatum tuꞌn toc ten okꞌel ex ax ocx naj tuj tcwart, ex atzun oc ten okꞌel. 31 Tejtzun tbaj okꞌ, el ttxꞌjoꞌn twitz, etz tuj tcwart, ex xi tmaꞌn cye tmajen: Cykꞌon cube wabj, chi José.

32 Part o waꞌn José, part o che waꞌn ke terman, ax icx part o che waꞌn ke aj Ejipt, akeju ateꞌtok tucꞌil, porque icꞌbilxix tuj cywitz aj Ejipt tuꞌn cycub ten waꞌl junx cyucꞌil aj Hebrey. 33 E cub keꞌ ke terman José ic tzaꞌnx otok txi tmaꞌn cye ex ic tzaꞌnx cyabkꞌiyil; tnejel cub keꞌ aju tnejel tzicbaj, ex mancbil cub keꞌ aju chꞌiꞌp. Biꞌxtzun e labin tuꞌn jlu, ex nok o baj cyqueꞌyin tuj cywitz. 34 Xi tkꞌoꞌn José aju chibj tcub twi tmes te cychiꞌ ke terman; atzun te Benjamín jweꞌ el tchiꞌ tzaj tkꞌoꞌn twitz cye ttzic. E cꞌan ex e tzalaj junx tucꞌil.