2 O til Jacob jun xoch tuj cojbil, in che ojlantok ox cꞌloj ẍneꞌl nikayin ttziꞌ tuꞌnju atzun in che cꞌan ke alumaj aꞌ. Tcubsaꞌntok jun abj matij te maksibl ttzi xoch. 3 Oc toc cyjunin cyib cycyakil ke ẍneꞌl ttzi xoch, in jawtzun cyiꞌn pastor aju abj tcub te maksibl ttziꞌ tuꞌntzun cycꞌan ẍneꞌl aꞌ. Octzun cybaj cꞌan ẍneꞌl, in cubtl cykꞌoꞌn abj te maksibl ttzi xoch. 4 Xitzun tkanin Jacob cye pastor:

—¿Jatum tzajni keye, nxjalil?

Xi cytzakꞌweꞌn pastor:

—Aj Harán koꞌye.

5 Xi tkanintl Jacob:

—¿Ojtzkiꞌnpe Labán cyuꞌne, aju tiyjil Nacor?

Xi cytzakꞌweꞌn pastor:

—Ojtzkiꞌn.

6 Xi tkanintl Jacob:

—¿Baꞌnpe taꞌ Labán?

Ex cymatzun pastor:

—Baꞌn taꞌ. Queꞌyinxa, lu Raquel aju tmeꞌjel tzul cyucꞌix t-ẍneꞌl.

7 Xitzun tmaꞌn Jacob cye pastor:

—Atx kꞌij ex junyaꞌx. Naꞌnx tpon or tuꞌn cyoc chmet alumaj. Cykꞌonxe cycꞌa ẍneꞌl aꞌ ex cyxiꞌtle pastoril cye.

8 Xi cytzakꞌweꞌn pastor:

—Mlay bant icju, maxitzun cjawil kꞌit abj tcub ttzi xoch ocxi cyul baj cycyakil ẍneꞌl tuꞌntzun cycꞌan aꞌ.

9 Cucxtok tyolin Jacob cyucꞌil pastor tej tul Raquel cyucꞌil t-ẍneꞌl tman, tuꞌnju atok Raquel toc te pastor cye ẍneꞌl. 10 Tej t-xi tqueꞌyin Jacob lu Raquel aju tmeꞌjel Labán aju t-xiban ttxuꞌ, cyucꞌix t-ẍneꞌl Labán, xiꞌtzun naj Jacob ex jaw tiꞌn aju abj tcubtok ttzi xoch ex e cꞌan ke t-ẍneꞌl Labán tuꞌn, aju t-xiban ttxuꞌ. 11 El ttzꞌuban Jacob twitz Raquel ex oc ten okꞌel. 12 Xi tmaꞌn Jacob te Raquel cyjaꞌ: Akine Jacob, tal Rebeca aju tanb tmana, chi Jacob. Xiꞌtzun kelan Raquel kꞌmalte te tman.

13 Tej tbinte Labán tkanil tiꞌj Jacob aju tal tanb, etz kelan cꞌmolte te, baj tchleꞌn, el ttzꞌuban twitz ex xi tiꞌn tja. Octzun ten Jacob kꞌmalte tcyakilju otok baj tiꞌj. 14 Xitzun tmaꞌn Labán te cyjaꞌ: Ax toc, at nxilene tucꞌila, chi Labán.

Cyaj ten Jacob tucꞌil Labán jun xjaw.

15 Xitzun tmaꞌn Labán te Jacob:

—Mlay tzꞌakꞌnana wucꞌile nok cucx. Baka tuꞌnju at nxilene tucꞌila cꞌakꞌnala wucꞌile nok cucx. Kꞌmantza weye jteꞌ twi tcꞌuꞌja.

16 Attok cabe tmeꞌjel Labán: Aju tzicbaj Lea tbi; atzunte tzꞌinbaj Raquel tbi. 17 Ate Lea myaxix baꞌn che queꞌyin ke tbakꞌ twitz, atzunte Raquel tbanilxix queꞌyin twitz tucꞌix tcyakil t-ximlal. 18 Tuꞌnju otok t-xoꞌ tgan Jacob tiꞌj Raquel, tma:

—Chin akꞌnale wuk abkꞌi tucꞌila tiꞌj Raquel aju tmeꞌjela tzꞌinbaj, chi Jacob.

19 Xi ttzakꞌweꞌn Labán cyjaꞌ:

—Maslo baꞌn tuꞌn t-xi nkꞌoꞌne teya twitzju tuꞌn t-xi nkꞌoꞌne te junxitl xjal. Tencja wucꞌile, chi Labán.

20 Cyjaꞌtzun akꞌnan Jacob wuk abkꞌi tiꞌj Raquel, ex aju wuk abkꞌi mer ic tzaꞌn nok jteꞌ kꞌij eꞌla tuj twitz Jacob, tuꞌnju at nimxix tgan tiꞌj. 21 Xitzun tmaꞌn Jacob te Labán cyjaꞌ:

—Kꞌontza nxuꞌjile tuꞌn nmojeꞌye tucꞌil, tuꞌnju ma japun baj tyemp wuꞌne, aju xi nmaꞌne teya.

22 E tzajtzun ttxcoꞌn Labán cycyakil ke tvesin, ex oc jun nintz waꞌn cyuꞌn tej tbant mejebleꞌn. 23 Te konicꞌan tzaj tiꞌn Labán tmeꞌjel aju Lea tbi, xi tkꞌoꞌn te Jacob, ex cub tan Jacob tucꞌil. 24 Xi tkꞌoꞌn Labán jun tmajen xuꞌj te Lea te ajbel te, Zilpa tbi.

25 Tejtzun t-skix te juntl kꞌij, el tnicꞌ Jacob tiꞌj atok Lea. Xitzun tmaꞌn te Labán:

—¿Ti ma tbinchaya wiꞌje? ¿Baka mya tiꞌj Raquel o chin akꞌnane tucꞌila? ¿Tikuꞌntzun ma chin cub t-sbuꞌna?

26 Xi ttzakꞌweꞌn Labán:

—Mintiꞌ in bant kuꞌne icju, tuꞌn tmojeꞌ jun kmeꞌjele tzꞌinbaj nej twitz tzicbaj. 27 E tjapun baj wuk kꞌij ninkꞌij tuꞌna te mejebleꞌn tiꞌj Lea, ex baꞌntzun t-xi nkꞌoꞌne Raquel teya, ka ma cub tuj twitza tuꞌn takꞌnana wuktl abkꞌi wucꞌile.

28 Cubtzun tuj twitz Jacob icju, ex japun baj wuk kꞌij ninkꞌij tuꞌn tiꞌj mejebleꞌn. Xitzun tkꞌoꞌn Labán tmeꞌjel aju Raquel tbi, tuꞌn toc te t-xuꞌjil Jacob. 29 Ax icx xi tkꞌoꞌn Labán jun tmajen xuꞌj te Raquel tuꞌn tajben te, Bilha tbi. 30 Mojeꞌtzun Jacob tucꞌil Raquel, ex o tcꞌujla nimxix wen, mas o tcꞌujla twitz Lea, ex akꞌnan tucꞌil Labán wuktl abkꞌi.

31 O til Kman myaxix cꞌujlaꞌntok Lea tuꞌn Jacob, ex o onin tiꞌj tuꞌn ttzaj tal; atzunte Raquel mibantok alin. 32 Octzun ten tal Lea. Tej tul itzꞌj tal, Rubén tbi oc tkꞌoꞌn, ex tma cyjaꞌ: Ma tzaj tqueꞌyin Kman atine tuj bis. Tuꞌntzun jlu chin cꞌujlanjtzele jaꞌlo tuꞌn nchmile, chi Lea.

33 Oc ten juntl tal Lea. Tej tul itzꞌj tmatl cyjaꞌ: Tuꞌnju ma tbi Kman myaxix cꞌujlaꞌn kine, ma tzaj tkꞌoꞌn juntl wale, chi Lea. Tuꞌntzun jlu, Simeón tbi oc tkꞌoꞌn.

34 Oc ten juntl tal Lea. Tej tul itzꞌj tmatl cyjaꞌ: Atzun jaꞌlo ctel mas tmojbabl tib nchmile wucꞌile, tuꞌnju ma che tzaj ox tcyꞌajal wiꞌje, chi Lea. Tuꞌntzun jlu, Leví tbi oc tkꞌoꞌn.

35 Oc ten juntl tal Lea. Tej tul itzꞌj tmatl cyjaꞌ: Atzun jaꞌlo cjawil nnimsaꞌne tbi Kman, chi Lea. Tuꞌntzun jlu, Judá tbi oc tkꞌoꞌn. Weꞌtzun tuꞌn ttzaj tal.