28
Txquet Jacob tuꞌn Isaac, cub tcyꞌiwlaꞌn ex xi tmaꞌn te cyjaꞌ: Miꞌn mojeꞌya tucꞌil jun xuꞌj aj Canaán. 2 Bincham ttena, txiꞌya tuj txꞌotxꞌ Padan-aram, max tja tchmana Betuel, ex mojeꞌya ma chixin tucꞌil jun tmeꞌjel Labán aju t-xiban ttxuꞌya. 3 Awt Dios cyꞌiwlante teya, aju Dios at tipumal tuꞌn tbant tcyakil tuꞌn, chmet-xwit nim tiyjila, ex che elwit pokꞌl nimcu cꞌloj xjal tiꞌja. 4 Tzajwit tkꞌoꞌn teya ex cye tiyjila aju cyꞌiwbil tzaj ttziyan te Abraham, ex tzꞌocwita tajwil txꞌotxꞌ lu jatum najl koꞌ jaꞌlo ic tzaꞌn stranjer xjal, aju txꞌotxꞌ o tzaj ttziyan Dios te Abraham, chi Isaac.5 Cyjaꞌtzun tten, xi samaꞌn Jacob tuꞌn Isaac tuj Padan-aram. Pontzun Jacob tja Labán aju tcyꞌajal Betuel aju aj Aramey; ate Labán t-xiban Rebeca, aju cytxuꞌ Jacob ex Esaú.
Mojeꞌtl Esaú
6 O tbi Esaú otok cub cyꞌiwlaꞌn Jacob tuꞌn Isaac, ex otok txi t-samaꞌn tuj Padan-aram tuꞌn tmojeꞌ ma chixin, ex tej tcub tcyꞌiwlaꞌn Isaac otok txi tmaꞌn te cyjaꞌ: Miꞌn mojeꞌya tucꞌil jun xuꞌj aj Canaán. 7 Ax icx o tbi Esaú otok txi tniman Jacob tyol tman ex tyol ttxuꞌ, ex otok txiꞌ tuj Padan-aram. 8 Cyjaꞌtzun el tnicꞌ Esaú tiꞌj, mya baꞌn in che eꞌla ke xuꞌj aj Canaán tuj twitz Isaac aju tman. 9 Xiꞌtzun Esaú tucꞌil Ismael aju tcyꞌajal Abraham, ex mojeꞌ tucꞌil Mahalat, aju tanb Nebaiot ex tmeꞌjel Ismael, ex mya oꞌcx jlu, ax icx attok txkantl t-xuꞌjil.
Cub tyecꞌun tib Dios twitz Jacob tuj Betel
10 Etztzun Jacob tuj Beerseba tuꞌn tpon tuj Harán. 11 Pon tuj jun lugar ex ax cyaj ten te konicꞌan tuꞌnju otok tzꞌex kꞌij. Ax jaw tiꞌn jun abj ma chixin ex cub tkꞌoꞌn te t-xwiꞌ ex cub tan tuj lugar lu. 12 Oc jun twitzicꞌ ex o til lu jun scaler xiꞌyni twitz txꞌotxꞌ japun baj max twitz cyaꞌj. Lu ke t-anjel Dios in che jaxtok ex in che cuꞌtztok twi scaler. 13 Ax icx o til Jacob lu Kman waꞌltok max twi scaler, ex tzaj tmaꞌn te cyjaꞌ: Akine Tmana, aju Tdios tchmana Abraham ex Tdios tmana Isaac. Teya ex cye tiyjila cxel nkꞌoꞌne txꞌotxꞌ jatum txꞌayl tcuba jaꞌlo. 14 Che chmetel ke tiyjila wuꞌne ic tzaꞌn tkukil txꞌotxꞌ, cbajel cysipan cyib jawni ex cubni, ocni ex elni; nok tuꞌn tlaja ex tuꞌn cylaj tiyjila, che bel cyꞌiwlaꞌn cycyakil xjal twitz txꞌotxꞌ. 15 Lu kine atine tucꞌila; cꞌoquel ncwentine nok jatumchak cpola, ex cꞌajetz meltzꞌaja wuꞌne juntl maj tuj txꞌotxꞌ lu. Mlay cyaj ncolina ka naꞌnxtok tjapun aju in xi nmaꞌne teya, chi Dios.
16 Tejtzun tel twatl Jacob cub t-ximan: Ax toc at Kman tuj lugar lu ex mintiꞌtok baꞌn wuꞌne. 17 Tzaj t-xobil ex tma: Xobajilxix te lugar lu. A jlu tja Dios ex ttzi cyaꞌj.
18 Te prim tuj juntl kꞌij jaw weꞌ Jacob, jaw tiꞌn aju abj otok tzꞌajben te t-xwiꞌ, jaw twaban te jun techal ex cub tkoꞌn aseyt tibaj. 19 Betel tbi lugar lu oc tkꞌoꞌn, masque Luz tbi tnam nej. 20 Xitzun ttziyan Jacob jun yol te Kman ex tma cyjaꞌ: Ka ma txiꞌ Dios wucꞌile, ka ma chin oc cwentine tuꞌn tuj nbeye, ka ma tzaj tkꞌoꞌn nwaye tucꞌix nxbalune, 21 ka baꞌn ma chin pon meltzꞌaje tja nmane, cꞌoqueltzun Kman te Ndiose. 22 Aju abj ma jaw nwabane te jun techal, cꞌoquel nkꞌoꞌne te tja Dios, ex cxel nkꞌoꞌne teya aju tlajiꞌn tiꞌj tcyakilju ctzajel tkꞌoꞌna weye, chi Jacob.