Cub cyꞌiwlaꞌn Jacob ex Esaú tuꞌn Isaac
27
Tej otok tijin Isaac ex otok moẍix twitz, tzaj ttxcoꞌn aju tnejel tcyꞌajal Esaú tbi, ex xi tmaꞌn te cyjaꞌ:—Ncyꞌajal. Atzunte xi ttzakꞌweꞌn:
—Lu kine lu, tat, chi Esaú.
2 Xi tmaꞌn Isaac te:
—Ma tila ma chin tijine, ex mintiꞌ baꞌn wuꞌne alcye kꞌij chin cyime. 3 Kꞌinxa ke tplecha tuj cycubil, tucꞌix xobl tplecha, txiꞌya tuj cojbil ex kꞌintza txcup cbel tuꞌna. 4 Binchama jun lak nchiꞌye cꞌocꞌj ic tzaꞌn nganiye, ex kꞌintza tuꞌn t-xi nchyoꞌne, tuꞌntzun tcub ncyꞌiwlaꞌna naꞌnxtok ncyime, chi Isaac.
5 Atzunte Rebeca in bintok tej in yolintok Isaac tucꞌil Esaú aju tcyꞌajal. Tejtzun t-xiꞌ Esaú tuj cojbil cambalte txcup te tchiꞌ tman, 6 xi tmaꞌn Rebeca te Jacob aju tal:
—Ma nbiye tyol tmana xi tmaꞌn te Esaú aju ttzica, ex ma tma cyjaꞌ: 7 Kꞌintza txcup cbel tuꞌna, ex binchama jun lak nchiꞌye cꞌocꞌj tuꞌn t-xi nchyoꞌne, tuꞌntzun tcub ncyꞌiwlaꞌna twitz Kman naꞌnxtok ncyime, chi tmana. 8 Jaꞌlotzun wal, nimanxa aju cxel nmaꞌne teya. 9 Txiꞌya jatum ateꞌ ke alumaj, ex kꞌintza cabe tal chip tbanilxix. Che bajel nbinchaꞌne te tchiꞌ tmana ic tzaꞌnx tgan. 10 Cxeltzun tiꞌna twitz tmana ex cxel tchyoꞌn, tuꞌntzun tcub cyꞌiwlaꞌna tuꞌn naꞌnxtok tcyim, chi Rebeca.
11 Xitzun tmaꞌn Jacob te Rebeca aju ttxuꞌ:
—Aju ntzique Esaú nojni tiꞌj tuꞌn xyaꞌn, atzun weye miꞌn. 12 Yajtzun ka in chin oc macoꞌne tuꞌn nmane, jaculo tma in chin xmayine tiꞌj, ex ctzajel wiꞌne jun mya baꞌn wibaje te t-xel cyꞌiwbil, chi Jacob.
13 Xitzun ttzakꞌweꞌn ttxuꞌ:
—Wal, aju mya baꞌn jacu tzaj tibaja, e tcub tzꞌak wibaje. Oꞌcx txiꞌya, binchama aju ma txi nmaꞌne teya ex kꞌintza ke tal chip, chi Rebeca.
14 Xiꞌtzun Jacob kꞌilte cye tal chip ex xi tkꞌoꞌn te ttxuꞌ. Oc ten ttxuꞌ binchalte chibj cꞌocꞌj ic tzaꞌnx tgan Isaac. 15 Tzajtzun tiꞌn Rebeca t-xbalun Esaú aju tnejel tal. Aju xbalun lu tbanil, ex cꞌuꞌntok tuꞌn Rebeca tuj tja. Oc tkꞌoꞌn xbalun lu tiꞌj Jacob aju tcabin tal, 16 ex oc tkꞌoꞌn cytzꞌumal tal chip cyiꞌj tkꞌab Jacob tucꞌix tiꞌj tkul jatum mintiꞌtok xyaꞌn. 17 Xitzun tkꞌoꞌn chibj tuj tkꞌab Jacob, tucꞌix wabj aju otok bant tuꞌn.
18 Ocxtzun Jacob jatum taꞌtok tman ex xi tmaꞌn te cyjaꞌ:
—Tat, chi Jacob.
Xitzun ttzakꞌweꞌn Isaac:
—Lu kine lu. ¿Alcyeya, ncyꞌajal?
19 Xitzun tmaꞌn Jacob te tman:
—Akine Esaú aju tnejel tcyꞌajala. Ma bant wuꞌne aju saj tmaꞌna weye. Tjaw keꞌya, chyoꞌna tiꞌj txcup ma ncambaye, tuꞌntzun ncub tcyꞌiwlaꞌna.
20 Xitzun tkanin Isaac:
—¿Tzaꞌn tten xcnet naj tuꞌna, ncyꞌajal?
Xi ttzakꞌweꞌn Jacob:
—Ate Kman Dios ma onin weye tuꞌn tcnet naj.
21 Xi tmaꞌn Isaac:
—Lakꞌetza ex cꞌoquel nmacoꞌne tiꞌja ncyꞌajal, ka ax toc aya Esaú ex ka miꞌn, chi Isaac.
22 Xitzun lakꞌeꞌ Jacob twitz tman. Atzunte tman oc tmacoꞌn ex tma cyjaꞌ:
—Aju tkꞌajkꞌajel wibaj te Jacob, atzun ke kꞌabaj te Esaú, chi Isaac.
23 Mintiꞌ el tnicꞌ tiꞌj tuꞌnju attok nim xyaꞌn cyiꞌj tkꞌab, ic tzaꞌn cyiꞌj tkꞌab Esaú aju ttzic. Tej cyjaꞌtok tcub tcyꞌiwlaꞌn, 24 xi tkanin juntl maj te:
—¿Axpe toc aya Esaú aju ncyꞌajale?
Xi ttzakꞌweꞌn Jacob:
—Ax toc akine.
25 Xi tmaꞌntl Isaac:
—Kꞌintza chibj tuꞌn t-xi nchyoꞌne aju xcub tuꞌna ncyꞌajal, tuꞌntzun tcub ncyꞌiwlaꞌna, chi Isaac.
Xitzun tkꞌoꞌn Jacob tchiꞌ tman tucꞌix taꞌl twitz uva. O waꞌn ex o cꞌan Isaac. 26 Xitzun tmaꞌn Isaac te tcyꞌajal:
—Lakꞌetza ncyꞌajal, ex tzꞌuban ela nwitze.
27 Xi lakꞌeꞌ Jacob ex el ttzꞌuban twitz tman. O tnaꞌ Isaac tcꞌocꞌjal t-xbalun ex cub tcyꞌiwlaꞌn cyuꞌn ke yol lu:
Ax toc, a tcꞌocꞌjal ncyꞌajale jlu ic tzaꞌn tcꞌocꞌjal tuj cojbil aju o cub tcyꞌiwlaꞌn Kman.
28 Tzajwit tkꞌoꞌn Dios jbal teya twitz cyaꞌj, nimxwit twitz tawala tzꞌoc twitz txꞌotxꞌ, ex tenwt nim triw ex nim taꞌl twitz uva tucꞌila.
29 Che ajbenwit xjal cyuj mastl tnam teya ex che cubwit ẍmejeꞌ twitza ke xjal ateꞌ cyuj mastl nasyon. Tzꞌocxwita te cawil cyibaj tiyjil termaniya ex che cubwit mocꞌeꞌ ke tiyjil tal ttxuꞌya twitza. Tzajwit mya baꞌn cyibaj keju cxel cykanin mya baꞌn tibaja ex che cubwit cyꞌiwlaꞌn keju che bel cyꞌiwlante teya, chi Isaac.
30 Bajtzun cyꞌiwlaꞌn Jacob tuꞌn Isaac, ex matok nneꞌx jatum taꞌtok tman tej tul meltzꞌaj Esaú cambal. 31 Ax icx te Esaú baj tbinchaꞌn chibj cꞌocꞌj, xi tiꞌn te tman ex xi tmaꞌn te cyjaꞌ:
—Tjaw keꞌya tat, ex chyoꞌna tiꞌj txcup ma cub wuꞌne, akine tcyꞌajala, tuꞌntzun ncub tcyꞌiwlaꞌna.
32 Xitzun tkanin Isaac te:
—¿Alcyetzuna?
Xi ttzakꞌweꞌn Esaú:
—Akine Esaú aju tnejel tcyꞌajala, chi Esaú.
33 Jawtzun luꞌlun Isaac nimxix ex xi tmaꞌn te cyjaꞌ:
—¿Alcyetzun xi aj cambal ex ma tzul tiꞌn chibj weye? Ma baj nchyoꞌne tcyakil tej naꞌnxtok tula. Ma cub ncyꞌiwlaꞌne, ex jaꞌlo cyꞌiwlamajtl.
34 Tejtzun tbinte Esaú aju tma tman, oc ten okꞌel cyuwxix, ex jaw tkꞌajkꞌajel twiꞌ bisbajilxix:
—Tat, ax icx weye chin tcyꞌiwlan cuba, chi Esaú.
35 Xi tmaꞌn Isaac:
—Ma tzul aj termaniya, ma chin cub t-sbuꞌn, ex ma tcꞌam cyꞌiwbil aju tetoka.
36 Xi ttzakꞌweꞌn Esaú.
—Tuj tumelxlo Jacob tbi tocsaꞌn. Atzun tcabin maj lu chin cub t-sbuꞌn. Tnejel o tzꞌel tiꞌn woclene te tnejel cꞌwaꞌlbaj, atzun jaꞌlo ma tzꞌel tiꞌn cyꞌiwbil, aju wetoke. ¿Mintiꞌpe juntl cyꞌiwbil ma cyaj tcloꞌna te weye? Chi Esaú.
37 Xi ttzakꞌweꞌn Isaac te Esaú cyjaꞌ:
—Ma txi nkꞌoꞌne toclen Jacob tuꞌn tcawin tibaja ex ma cheꞌx nkꞌoꞌne cycyakil ke tiyjila te tmajen, ax icx ma txi nmaꞌne tuꞌn tten nim triw ex nim taꞌl twitz uva tucꞌil. Ncyꞌajal, ¿titzun cbantel tiꞌja wuꞌne jaꞌlo?
38 Xi tmaꞌntl Esaú te tman:
—Tat, ¿oꞌcxpe junx cyꞌiwbil at tucꞌila? Ax icx weye chin tcyꞌiwlan cuba, chi Esaú.
Jaw okꞌtl Esaú.
39 Xitzun tmaꞌn Isaac te Esaú cyjaꞌ:
Cnajala najchak tiꞌj tbanil txꞌotxꞌ ex najchak tiꞌj jbal twitz cyaꞌj.
40 Oc tclaꞌ tiba tuꞌn t-spadiya ex cꞌoquela tmajen termaniya; octzun toc tipuna, ccolpetela tjakꞌ tcawbil.
El ok Jacob twitz Esaú
41 Eltzun icꞌun Jacob tuꞌn Esaú tuꞌn tlaj cyꞌiwbil xi kꞌoꞌn te tuꞌn tman, ex tma Esaú tuj tanmi: Chꞌix tpon tkꞌijlalil tuꞌn tcyim nmane, ex te tibajxi jlu cbel nbyoꞌne witzꞌine Jacob.
42 Tejtzun tbinte Rebeca aju in ximantok Esaú tiꞌj, xi tmaꞌn tuꞌn t-xi txocbaj Jacob aju tcabin tal. Xitzun tmaꞌn te cyjaꞌ: Taj ttzica Esaú tuꞌn tcub byoꞌna tuꞌn, tuꞌntzun t-xelin aju mya baꞌn tbinchaya tiꞌj. 43 Atzun jaꞌlo wal, bintza aju cxel nmaꞌne teya. Bincham ttena ex txi oka tja nxibane Labán, aju najl tuj Harán. 44 Tena tucꞌil junjun kꞌij, acux in baj tkꞌoj ttzica, 45 acux in baj ttxꞌuꞌjil tiꞌja, ex acux nnicꞌ tnaꞌl tuꞌn aju tbinchaya tiꞌj. Baꞌntzun t-xi nsamaꞌne jun xjal txcolte teya tuꞌn tajtza. Miꞌn waje tuꞌn cynaj ke cabe wale te junx kꞌij.
46 Xitzun tmaꞌn Rebeca te Isaac: Mya baꞌn atine cyuꞌn ke xuꞌj aj Hetey, akeju cabe t-xuꞌjil Esaú. Ka ma mojeꞌ Jacob tucꞌil jun xuꞌj aj Hetey ic tzaꞌn ke jlu, akeju najl tzalu tuj Canaán, maslo baꞌn tuꞌn ncyime, chi Rebeca.