2 Joñon Juañon. Ti quilʌ jini tsijiꞌ bʌ lum Jerusalén bʌ i cꞌabaꞌ. Mi pejcʌntyel ti chꞌujul bʌ lum. Ti jubi tyʌlel jini lum tiꞌ tyojlel Dios yaꞌ ti panchan. Ñoj chꞌʌlʌl yubil cheꞌ bajcheꞌ miꞌ chꞌʌl i bʌ xcꞌalʌl muꞌ bʌ quejel i chaꞌlen ñujpuñel.

3 Ti cubi cꞌam bʌ ajtꞌan loqꞌuem bʌ ti panchan. Ti yʌlʌ: Qꞌuele awilan, wale iliyi muꞌ ti chumtyʌl Dios yicꞌot quixtyañujob. Mi quejel i yajñel yicꞌotyob. Mi quejel i yajñelob ti i chaꞌañoꞌ bʌ Dios. Dios i bajñel mi quejel i yajñel yicꞌotyob chaꞌan ajnic ti i Diosob.

4 Dios mi quejel i luꞌ sujcubeñob i yaꞌlel i wut. Maꞌix mi quejel i chaꞌ ujtyel sajtyel, maꞌix uqꞌuel, maꞌix chꞌʌjyemlel yaꞌyaꞌi. Maꞌix chʌ bʌ cꞌux mi quejel i yubiñob yaꞌyaꞌi como tsaꞌix luꞌ ñumi jini muꞌ bʌ la cubin wale iliyi, cheꞌ ti yʌlʌ ajtꞌan.

5 Cheꞌ jini, jini buchul bʌ ti colem bʌ buchlibʌl ti yʌlʌ: Qꞌuele awilan, mic mel ti tsijib pejtyelel chʌ bʌ tyac jach an, cheꞌen. Ti yʌlʌ jeꞌel: Tsꞌijbun jini tsaꞌ bʌ ujti a wubin como melelʌch ili tꞌan. Chꞌujbiyʌch i luꞌ chꞌujbintyel. Cheꞌ ti yʌlʌ jini buchul bʌ tiꞌ buchlib. Chʌꞌʌch ti subenti Juan.

6 Ti wiꞌil tiꞌ subeyon: Tsaꞌix luꞌ tsꞌʌctiyi. Joñon añon cheꞌ ñac ti mejli pejtyelel chʌ bʌ tyac an, chʌc añon tyo cꞌʌlʌl cheꞌ mi quejel i luꞌ jilel majlel. Joñon añon cꞌʌlʌl ti tyejchibal mulawil. Joñon añon cꞌʌlʌl ti yujtibal. Majchical jach an i tyʌquin tiꞌ yubil, mi quejel cʌqꞌuen i japeꞌ jaꞌ loqꞌuem ti pasiꞌ jaꞌ. Ti majtyan jach mi cʌqꞌuen jini jaꞌ muꞌ bʌ i yʌqꞌueñob i cuxtyʌlel machꞌʌ saj yujil jilel.

7 Pejtyelel quixtyañujob muꞌ bʌ i ganarin chaꞌan maꞌan miꞌ sʌt i bʌ mi quejel i yʌqꞌuentyel pejtyelel jini tsijiꞌ bʌ muꞌ bʌ i tꞌoxtyʌl chaꞌan calobilobʌch. Joñon mi cajñel ti i Diosob. Jini mi yajñel ti calobilob.

8 Pero jini lolon am bʌ i bʌqꞌuen, jini machꞌʌ baꞌan miꞌ chꞌujbiñon, jini bibajax bʌ miꞌ chaꞌlen, jini muꞌ bʌ i chaꞌlen tsʌnsa, jini muꞌ bʌ i chaꞌlen i tsuculel, jini muꞌ bʌ i chaꞌlen wujt, jini muꞌ bʌ i chꞌujutisan melel jach bʌ dios tyeꞌ tyac yicꞌot pejtyelel xlotyob mi quejel i wersa majlelob ti yajnib colem cꞌajc muꞌ bʌ ti lejmel yicꞌot azufre. Jiñʌch jini cꞌajc muꞌ bʌ i pejcʌntyel ti chaꞌyajlel sajtyel. Cheꞌ ti yʌlʌ Dios.

9 Cheꞌ jini ti quilʌ cheꞌ bajcheꞌ tic ñajal ti tyʌli juntiquil jini siete ajtroñelob i chaꞌan Dios chꞌoyol bʌ ti panchan. Chuculob i chaꞌan jini siete taza pamal ti jini siete cojix bʌ wocol tyac yubil. Juntiquil jini sietejlelob tiꞌ subon: Laꞌix. Mi quejel c pʌsꞌeñet jini muꞌ bʌ i yotsan tiꞌ tyojel jini muꞌ bʌ i pejcʌntyel ti i Tiñʌmeꞌ Dios. Cheꞌ ti subentiyon.

10 Joñon Juañon. Cheꞌ bajcheꞌ tic ñajal tsaꞌ bʌ aqꞌuentiyon j qꞌueleꞌ chaꞌan ti Chꞌujul bʌ i Chꞌujlel Dios, jini ajtroñel i chaꞌan Dios chꞌoyol bʌ ti panchan tiꞌ pʌyʌyon majlel ti colem wits. Wen chan jini wits. Tiꞌ pʌsꞌeyon jini colem lum muꞌ bʌ i pejcʌntyel ti Chꞌujul bʌ Jerusalén tsaꞌ bʌ jubi tyʌlel ti panchan tiꞌ tyojlel Dios.

11 Jini lum ñoj lemlaw chaꞌan tiꞌ ñuclel Dios. Wen lemlaw cheꞌ bajcheꞌ ñoj lets bʌ i tyojol bʌ tyun jaspe bʌ i cꞌabaꞌ. Wen sʌsʌc cheꞌ bajcheꞌ vidrio yilal.

12 Ti xottyʌlel jini lum an colem tsꞌajc. Wen colem. Wen chan jini tsꞌajc. An i chaꞌan doce i tiꞌ jini tsꞌajquil. An juntiquil ajtroñel i chaꞌan Dios chꞌoyol bʌ ti panchan chʌncox i cʌñʌtyan jujumpꞌej i tiꞌ tsꞌajquil. Tsꞌijbubil i cꞌabaꞌ juntiquil jini doce i yalobilob Israel ti jujumpꞌej i tiꞌ tsꞌajquil.

13 Ti jini colem tsꞌajc añʌch uxpꞌej i tiꞌ ti pasoꞌ qꞌuin, yicꞌot yambʌ uxpꞌej ti norte yicꞌot yambʌ uxpꞌej ti sur yicꞌot yambʌ uxpꞌej baꞌ miꞌ majlel qꞌuin.

14 An doce tyun chaꞌan i tsꞌajquil i yebal jini colem tsꞌajc. Tsꞌijbubil ti jini tyun tyac i cꞌabaꞌ jini doce yajcʌbiloꞌ bʌ ajsubtꞌañob ñumel i chaꞌan bʌ lac Yum.

15 Jini ajtroñel i chaꞌan Dios chꞌoyol bʌ ti panchan tsaꞌ bʌ i pejcʌyon an i chaꞌan oro bʌ jalʌl i wentyʌlel chaꞌan i pꞌiseꞌ tyac i colemlel jini lum yicꞌot i tiꞌ tsꞌajquil tyac yicꞌot i tsꞌajquil.

16 Junlajal i xujc tyac jini lum. Junlajal i tyʌmlel yicꞌot i ñajtlel. Jini ajtroñel i chaꞌan Dios chꞌoyol bʌ ti panchan tiꞌ pꞌisi ti jalʌl i wentyʌlel jini lum. Tiꞌ pꞌisi dos mil doscientos kilómetros i tyʌmel jini lum. Lajal lajal ti loqꞌui i ñajtlel yicꞌot i chañelel.

17 Ti wiꞌil tiꞌ pꞌisi i tsꞌajquil. Ti loqꞌui i pꞌisol ti sesenta y cuatro metros i chañelel. Jini tsaꞌ bʌ i cꞌʌñʌ ajtroñel i chaꞌan Dios chꞌoyol bʌ ti panchan, lajal mi loqꞌuel bajcheꞌ muꞌ bʌ i cꞌʌñob i pꞌisob quixtyañujob wʌꞌ ti mulawil.

18 Melel jini tsꞌajc ti tyun jaspe bʌ i cꞌabaꞌ. Melel jini otyotyel ti mali lum ti puro oro. Lajal i sʌsʌclel yicꞌot bajcheꞌ vidrio yilal jini oro.

19 Jini tyun am bʌ ti tsꞌajquil i yebal chꞌʌlʌl ti pejtyelel ñoj wen bʌ tyun. Jini ñaxan bʌ tyun i tsꞌajquil i yebal melel bʌ ti tyun jaspe bʌ i cꞌabaꞌ. Jini chaꞌpꞌejlel bʌ tyun zafiro bʌ i cꞌabaꞌ, yuxpꞌejlel bʌ ágata bʌ i cꞌabaꞌ, chʌmpꞌejlel bʌ esmeralda bʌ i cꞌabaꞌ,

20 i joꞌpꞌejlel bʌ tyun ónice bʌ i cꞌabaꞌ, i seislel bʌ cornalina bʌ i cꞌabaꞌ, i sietejlel bʌ crisólito bʌ i cꞌabaꞌ, i yochojlel bʌ berilo bʌ i cꞌabaꞌ, i nuevejlel bʌ topacio bʌ i cꞌabaꞌ, i diezlel bʌ crisoprasa bʌ i cꞌabaꞌ, i yoncejlel bʌ jacinto bʌ i cꞌabaꞌ, yicꞌot i docejlel bʌ amatista bʌ i cꞌabaꞌ.

21 Jini doce i tiꞌ tyac i tsꞌajquil melel ti doce ñoj wen bʌ tyun perla bʌ i cꞌabaꞌ. Jujumpꞌej i mʌjquil i tiꞌ tsꞌajquil melel jach ti jumpꞌej bʌ perla. Jini colem bʌ i callejlel jini lum melel ti puro oro cheꞌ bajcheꞌ wen sʌsʌc bʌ vidrio.

22 Machꞌan ti quilʌ templo baꞌ miꞌ chꞌujutisan Dios ti jini lum como lac Yum Dios jini machꞌʌ baꞌan i pꞌisol i pꞌʌtyʌlel yicꞌot jini mu bʌ i pejcʌntyel ti i Tiñʌmeꞌ Dios, i templojʌch yubil como yaꞌan yicꞌotyob.

23 Maꞌix chʌ bʌ och miꞌ pʌseꞌ i wut jini qꞌuin mi jinic jini uw como i sʌclel Dios mi yʌqꞌuen i sʌclel lum yicꞌot jini muꞌ bʌ i pejcʌntyel ti i Tiñʌmeꞌ Dios yubil i sʌclelʌch jini lum.

24 Jini quixtyañujob tsaꞌ bʌ cotyʌntiyob miꞌ chaꞌlen xʌmbal ti jini lum chaꞌan tiꞌ sʌclel Dios yicꞌot chaꞌan ti jini i Tiñʌmeꞌ bʌ Dios. Jini yumʌlob am bʌ ti mulawil miꞌ chꞌʌmeꞌ ochel pejtyelel i ñuclel.

25 Maꞌix baꞌ bʌ ora mi ñujpꞌel i tiꞌ tyac tsꞌajquil jini lum. Beleꞌ qꞌuinil yaꞌyaꞌi. Machꞌanix acꞌbʌlel.

26 Miꞌ chꞌʌmob ochel i ñuclel quixtyañujob yaꞌ ti jini tsijiꞌ bʌ lum.

27 Pero maꞌix mi saj ochel jini machꞌʌ wen bʌ ti jini tsijiꞌ bʌ lum. Maꞌix mi quejel i yochel jini bibajax bʌ miꞌ chaꞌlen, mi jinic muꞌ bʌ i lotiñob yañoꞌ bʌ. Jin jach mi yochelob jini tsꞌijbubil bʌ i cꞌabaꞌ ti jun baꞌ tsꞌijbubil jini am bʌ i chaꞌan i cuxtyʌlel machꞌʌ yujil jilel. Jini jun i chaꞌañʌch Cristo Jesús, jini muꞌ bʌ i pejcʌntyel ti i Tiñʌmeꞌ Dios yubil.