2 Ti xinil jini colem calle yaꞌ ti jini chꞌujul bʌ lum yicꞌot ti chaꞌwejlel jini río mi colel tyeꞌ am bʌ i wut. Mi yʌcꞌ i wut ti jujumpꞌej uw. I wut jini tyeꞌ mi yʌqꞌuen i cuxtyʌlel machꞌʌ yujil jilel. An i cꞌʌjnibal i yopol jini tyeꞌ chaꞌan miꞌ lajmisan ti pejtyelel quixtyañujob yaꞌ bʌ muchꞌquibilob.

3 Maꞌix chʌ bʌ machꞌʌ wen mi quejel i yajñel yaꞌyaꞌi. Yaꞌan i buchlib Dios yicꞌot jini muꞌ bʌ i pejcʌntyel ti i Tiñʌmeꞌ Dios. Yaꞌ ti jini chꞌujul bʌ lum ti pejtyelelob i chaꞌañoꞌ bʌ Dios mi quejel i chꞌujutisan Dios.

4 Miꞌ lajal qꞌuelob i bʌ yicꞌot Dios jini i chaꞌañoꞌ bʌ. Añʌch i cꞌabaꞌ Dios tiꞌ pam jujuntiquil.

5 Maꞌix acꞌbʌlel yaꞌyaꞌi. Mach i cꞌʌjnibalix i chaꞌañob lámpara chaꞌan jini muꞌ bʌ quejel ti chumtyʌl yaꞌi. Mach i cꞌʌjnibalix qꞌuin como Dios lac Yum i sʌclelʌch. Mi quejel i chaꞌleñob yumʌl ti pejtyel ora jini añoꞌ bʌ ti jini lum.

6 Jini ajtroñel i chaꞌan Dios chꞌoyol bʌ ti panchan tiꞌ subeyon: Melelʌch ili tꞌan. Chꞌujbiyʌch i luꞌ chꞌujbintyel. Lac Yum, jini mismo Dios tsaꞌ bʌ i nijcʌbe i pusicꞌal i chaꞌlen tꞌan jini tsaꞌ bʌ i xiqꞌuiyob i yʌleꞌ Dios, tiꞌ chocoyon tyʌlel ajtroñelon i chaꞌan Dios. Chꞌoyolon ti panchan chaꞌan c pʌsꞌen pejtyelel i chaꞌañoꞌ bʌ Dios chʌ bʌ machꞌʌ jal mi quejel yujtyel. Chʌꞌʌch ti subenti Juan chaꞌan i tsꞌijbun ti jun jini tꞌan.

7 Juan ti yʌlʌ: Jini ajtroñel i chaꞌan Dios chꞌoyol bʌ ti panchan tiꞌ subeyon: Mi yʌleꞌ Jesús: Tyalon ti ora jach. Ñoj cꞌajacñayob i yoj jini chʌncol bʌ i chꞌujbiben i tꞌan Dios wʌꞌ tsꞌijbubil ti ili jun, cheꞌ ti yʌlʌ Jesús. Cheꞌ ti subenti Juan chaꞌan ti jini ajtroñel i chaꞌan Dios chꞌoyol bʌ ti panchan.

8 Joñon Juañon. Ti cubi jini tꞌan yicꞌot ti quilʌ jini tsaꞌ bʌ pʌsꞌentiyon ti jini ajtroñel i chaꞌan Dios chꞌoyol bʌ ti panchan. Cheꞌ ti ujti cubin tyac iliyi cheꞌ ñac ujti quilan tsaꞌ bʌ pʌsꞌentiyon ti ñocleyon ti yebal yoc jini tsaꞌ bʌ i pʌsꞌeyon tyac iliyi chaꞌan c chꞌujutisan.

9 Pero tiꞌ subeyon: Maꞌ maꞌ chꞌujutisañon. Lajal ajtroñelon i chaꞌan Dios bajcheꞌet yicꞌot a wermañujob tsaꞌ bʌ i xiqꞌui yʌleꞌ Dios yicꞌot ti pejtyelel muꞌ bʌ i chꞌujbiben jini tꞌan wʌꞌ tsꞌijbubil ti jun. Chꞌujutisan Dios. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.

10 Jini ajtroñel i chaꞌan Dios chꞌoyol bʌ ti panchan tiꞌ subeyon jeꞌel: Mach maꞌ bajñel lotyeꞌ ti a pusicꞌal i tꞌan Dios tsꞌijbubil bʌ ti ili jun. Yom maꞌ suben ti pejtyelel quixtyañujob, como lʌcꞌʌlix i yorojlel mi quejel i tsꞌʌctiyel ti pejtyelel tyac iliyi wʌꞌ bʌ tsꞌijbubil.

11 Laꞌ tyo i bej chaꞌlen simaronlel jini simaron bʌ quixtyañujob yicꞌot jini muꞌ bʌ i chaꞌleñob chʌ bʌ miꞌ bajñel mulan i bajñel i pusicꞌal. Pero laꞌ tyo i bej chaꞌlen wen bʌ jini wen bʌ quixtyañu. Laꞌ bej ajnic ti xucꞌul jini i chaꞌañoꞌ bʌ Dios.

12 Jesús ti yʌlʌ: Mucꞌʌch j quejel c chaꞌ tyʌlel ti seb. Mic chꞌʌm tyʌlel i tyojol chaꞌan jujuntiquil jiñʌch bajcheꞌ tiꞌ chaꞌleyob.

13 Joñon jini ñaxan bʌ. Joñon jini cojix bʌ. Joñon añon cheꞌ ñac ti mejli pejtyelel chʌ bʌ tyac an. Chʌc añon tyo cꞌʌlʌ cheꞌ mi quejel i luꞌ jilel majlel. Joñon añon cꞌʌlʌ ti i tyejchibal mulawil. Joñon añon cꞌʌlʌ ti yujtibal. Cheꞌ ti yʌlʌ Jesús.

14 Cꞌajacñayob i yoj jini tsaꞌ bʌ i wutsꞌuyob i pislel i wentyʌlel chaꞌan i señʌjlel ñusʌbilix i mul. Chꞌujbiyʌch i cꞌuxob i wut jini tyeꞌ muꞌ bʌ i yʌqꞌuen i cuxtyʌlel. Cheꞌ jini mi quejel i yʌqꞌuentyel i yochel ti jini lum.

15 Pero mach och ti jini chꞌujul bʌ lum jini machꞌʌ baꞌan miꞌ chꞌujbiñoñob yicꞌot jini muꞌ bʌ i chaꞌleñob wujt yicꞌot jini muꞌ bʌ i chaꞌleñob i tsuculel yicꞌot yambʌ winic yambʌ xꞌixic yicꞌot jini ajtsʌnsajob yicꞌot jini muꞌ bʌ i chꞌujutisan melel jach bʌ dios tyac yicꞌot pejtyelel muꞌ bʌ i mulan i lotiñob yañoꞌ bʌ.

16 Joñon Jesúson. Tic choco majlel ajtroñel c chaꞌan chꞌoyol bʌ ti panchan chaꞌan i luꞌ subeꞌ ili tꞌan ti pejtyelelob ochemoꞌ bʌ tic tꞌan. Joñon loqꞌuemon ti i jiñʌjlel jini yumʌl David bʌ i cꞌabaꞌ. Cheꞌ bajcheꞌ colem ñoj ecꞌon muꞌ bʌ i wen tsꞌʌjiyel cheꞌ yomox sʌcꞌan, cheꞌen, como miꞌ pʌsꞌeꞌ i sʌclel wʌꞌ ti mulawil.

17 Jini Chꞌujul bʌ i Chꞌujlel Dios yicꞌot jini ochemoꞌ bʌ tiꞌ tꞌan Dios mi yʌlob: Laꞌ tyʌlic, cheꞌob. Cheꞌ miꞌ subentyel quixtyañujob. Yicꞌot jini muꞌ bʌ i ñʌchꞌtyan mi yʌlob: Laꞌ tyʌlic, cheꞌob. Jini am bʌ i tyʌquin tiꞌ mi yubin yom bʌ i tyʌlel, laꞌ tyʌlic. Laꞌ i japeꞌ ti majtyan jach jiñi jaꞌ chaꞌan i tyajic i cuxtyʌlel machꞌʌ yujil jilel.

18 Mic suben ti pejtyelelob muꞌ bʌ i ñʌchꞌtyan i tꞌan Dios wʌꞌ bʌ tsꞌijbubil ti ili jun: Mi an majch mi xʌꞌ otsan yambʌ tꞌan ti ili i tꞌan Dios, Dios mi quejel i yoqꞌuisʌben i wocol muꞌ bʌ quejel i ñusan cheꞌ bajcheꞌ tsꞌijbubil wʌꞌ ti ili jun.

19 Mi an majch miꞌ yʌpben tyac i tꞌan ti ili i tꞌan Dios, Dios mi quejel i yʌpeꞌ i cꞌabaꞌ ti jun baꞌ tsꞌijbubil i cꞌabaꞌob jini am bʌ i cuxtyʌlel machꞌʌ yujil jilel. Mi quej i chilben i yajnib ti chꞌujul bʌ lum bajcheꞌ tsꞌijbubil ti ili jun.

20 Jini tsaꞌ bʌ yʌlʌ ti pejtyelel ili tꞌan mi yʌleꞌ jeꞌel: Machꞌañix jal mi quejel c tyʌlel. Cheꞌ mi yʌleꞌ Jesús. Chʌꞌʌch yom ujtic. Laꞌ, c Yum Jesús.

21 Laꞌ ajnic laꞌ wicot ti laꞌ pejtyelel i yutslel i pusicꞌal lac Yum Jesucristo. Amén.