2 Jini ajtroñel i chaꞌan Dios chꞌoyol bʌ ti panchan tiꞌ chucu jini dragón bʌ animal. Jiñʌch jini tsaꞌ bʌ pejcʌnti ti lucum ti ñoj oniyix. Jiñʌch jini xiba, jini Satanás bʌ i cꞌabaꞌ. Jini ajtroñel i chaꞌan Dios chꞌoyol bʌ ti panchan tiꞌ cʌchʌ chaꞌan cʌchʌl mi yajñel mil jabil.

3 Jini ajtroñel i chaꞌan Dios chꞌoyol bʌ ti panchan tiꞌ choco ochel jini xiba ti chꞌen machꞌʌ lac tyajben i yebal. Tiꞌ ñupꞌu jini chꞌen. Ti yotsʌbe i sellojlel chaꞌan mach saj loqꞌuic i lotin quixtyañujob cꞌʌlʌ jintyo tsaꞌix ñumi mil jabil. Cheꞌ tsaꞌix ñumi mil jabil mi quejel i chaꞌ poj tileꞌ chaꞌan libre mi yajñel chaꞌpꞌej uxpꞌej jab.

4 Cheꞌ jini ti quilʌ cheꞌ bajcheꞌ tic ñajal, buchlibʌl tyac i chaꞌañob jini añoꞌ bʌ i yeꞌtyel. Ti quilʌ yaꞌ buchulob jini tsaꞌ bʌ aqꞌuentiyob i yeꞌtyel chaꞌan miꞌ chaꞌlen melojel. Ti quilʌ jeꞌel i chꞌujlel jini quixtyañujob tsaꞌ bʌ tsejpi loqꞌuel i jol chaꞌan ti caj tiꞌ subuyob Jesús yicꞌot chaꞌan tiꞌ subeyob majlel i tꞌan Dios. Jiñʌch jini machꞌʌ baꞌan tiꞌ chꞌujutisʌyob jini bʌbʌqꞌuen bʌ animal yicꞌot i locꞌom. Jiñʌch machꞌʌ baꞌan ti yʌcꞌʌyob chaꞌan otsʌntic i marcajlel jini animal ti i pamob mi tiꞌ cꞌʌbobic. Ti quilʌ ti chaꞌ cuxtiyiyob. Tiꞌ motin chaꞌleyob yumʌl yicꞌot Cristo mil jabil.

5 Jiñʌch jini tsaꞌ bʌ ñaxan tyejchi loqꞌuel baꞌan sajtyemoꞌ bʌ, pero jini yañoꞌ bʌ tsaꞌ bʌ sajtiyob machꞌan ti chaꞌ cuxtiyiyob jintyo tsaꞌix ñumi jini mil jabil.

6 Cꞌajacñayob i yoj jini muꞌ bʌ quejel i ñaxan tyejchelob loqꞌuel baꞌan sajtyemoꞌ bʌ como i chaꞌañob Dios. Mach chꞌujbi tyʌcꞌlʌnticob ti jini cꞌajc muꞌ bʌ i pejcʌntyel ti chaꞌyajlel sajtyel. Jini quixtyañujob mi quejel i yajñel ti curajob yubil i chaꞌan bʌ Dios yicꞌot i chaꞌan bʌ Cristo. Mi quejel i chaꞌlen yumʌl yicꞌot Cristo mil jabil.

7 Cheꞌ tsaꞌix ñumi jini mil jabil mi quejel i tijquel Satanás baꞌ cʌchʌl.

8 Mi quejel i loqꞌuel majlel i lotin quixtyañujob ti pejtyelel mulawil. Mi quejel i loqꞌuel majlel chaꞌan i lotin jini quixtyañujob muꞌ bʌ i pejcʌntyel ti Gog yicꞌot Magog. Mi quejel i muchꞌquin jini soldadojob i chaꞌañob chaꞌan i chaꞌlen guerra. Ñoj cabʌlob jini soldadojob cheꞌ bajcheꞌ jini jiꞌ pꞌuchul bʌ tiꞌ tiꞌ colem jaꞌ.

9 Jini soldadojob ti luꞌ ñumiyob majlel ti pejtyelel mulawil yubil. Ti joy ñumiyob yaꞌ baꞌan jini i chaꞌañoꞌ bʌ Dios yicꞌot jini lum muꞌ bʌ i pꞌuntyan Dios. Pero Dios tiꞌ choco jubel cꞌajc ti panchan tsaꞌ bʌ i luꞌ jisʌyob jini soldadojob chʌncol bʌ i joy ñumelob.

10 Ti chojqui ochel ti yajnib baꞌ muꞌ ti lejmel cꞌajc am bʌ yicꞌot azufre jini xiba tsaꞌ bʌ i lotiyob quixtyañujob. Yaꞌ ti chojqui ochel xiba yaꞌ baꞌ ti ñaxan chojqui ochel jini bʌbʌqꞌuen bʌ animal yicꞌot jini xlot tsaꞌ bʌ i lolon subu i bʌ ti jini tsaꞌ bʌ i xiqꞌui yʌleꞌ Dios. Yaꞌi mi quejel i beleꞌ tyʌcꞌlʌntyel cꞌʌlʌ mi ñumel qꞌuin yicꞌot cꞌʌlʌ mi ñumel acꞌbʌlel ti pejtyel ora.

11 Cheꞌ jini ti quilʌ cheꞌ bajcheꞌ tic ñajal jumpꞌej colem buchlibʌl. Ñoj sʌsʌc. Ti quilʌ jeꞌel juntiquil yaꞌ bʌ buchul. Tiꞌ tyojel jini buchul bʌ ti luꞌ sʌc jili pejtyelel lum yicꞌot chan. Maꞌan ti saj tyajle baꞌ ti majli.

12 Ti quilʌ jeꞌel cheꞌ bajcheꞌ tic ñajal pejtyelel jini quixtyañujob tsaꞌ bʌ sajtiyob, ti pejtyelelob majchical jach bʌ quixtyañujob, mi an i ñuclel mi machꞌʌ baꞌan i ñuclel. Luꞌ cuxulob. Yaꞌ waꞌalob tiꞌ tyojel Dios. Ti jajmi jun tyac yicꞌot jeꞌel yan tyo bʌ jun. Jini yambʌ jun jiñʌch baꞌ tsꞌijbubil jini am bʌ i cuxtyʌlel machꞌʌ saj yujil jilel. Ti pejtyelel jini tsaꞌ bʌ sajtiyob tiꞌ meleyob i bʌ jiñʌch bajcheꞌ tiꞌ chaꞌle cheꞌ cuxulob tyo. Jiñʌch bajcheꞌ tsaꞌ bʌ tsꞌijbunti ti jun tyac.

13 Jini quixtyañujob tsaꞌ bʌ sajtiyob ti jaꞌ tyac ti locꞌsʌntiyob tyʌlel ti jaꞌ. Jini tsaꞌ bʌ chꞌujñʌntiyob ti locꞌsʌntiyob ti yajnib. Dios tiꞌ yʌqꞌue i mel i bʌ ti jujuntiquil cheꞌ bajcheꞌ tiꞌ chaꞌle cheꞌ ñac cuxulob tyo.

14 Tsaꞌix chojqui ochel ti cꞌajc i pꞌʌtyʌlel sajtyel chaꞌan mach chaꞌ sajtic quixtyañu. Mach bej anic yajnib baꞌ mi chꞌujñʌntyel. I yajnib baꞌ mi lejmel cꞌajc mi pejcʌntyel ti chaꞌyajlel sajtyel.

15 Ti chojqui ochel ti yajnib baꞌ mucꞌ ti lejmel cꞌajc pejtyelelob majchical jach machꞌʌ baꞌan tsꞌijbubil i cꞌabaꞌ ti jun baꞌ mi tyajtyʌlob i cꞌabaꞌ jini añoꞌ bʌ i cuxtyʌlel machꞌʌ yujil jilel.