19
Joñon Juañon. Chʌncol c subeñetla jini tsaꞌ bʌ quilʌ, tsaꞌ bʌ cubi cheꞌ bajcheꞌ tic ñajal. Cheꞌ ñac ti ujti j qꞌueleꞌ jini poj ujtyel bʌ c subeñet, ti cubi cꞌam bʌ i tꞌan cabʌl quixtyañujob añoꞌ bʌ ti panchan. Ti yʌlʌyob:Laꞌ sujbic i ñuclel Dios. Tyʌlem laj cotyʌntyel ti Dios. An i ñuclel yicꞌot i pꞌʌtyʌlel lac Dios.
2 Como weñʌch yicꞌot tyojʌch miꞌ chaꞌlen melojel Dios.
Tsaꞌix aqꞌuenti i xotꞌeꞌ i mul jini leco bʌ xꞌixic tsaꞌ bʌ i choño i bʌ,
tsaꞌ bʌ i bibiꞌsʌ mulawil ti i tsuculel.
Dios tiꞌ qꞌuextyʌbe i simaronlel jini xꞌixic como jini ti yʌcꞌʌ ti tsʌnsʌntyel ajtroñelob i chaꞌañoꞌ bʌ Dios.
Cheꞌ ti yʌlʌyob jini añoꞌ bʌ ti panchan.
3 Jini yaꞌ bʌ an ti panchan tiꞌ chaꞌ chaꞌleyob cꞌam bʌ tꞌan. Ti yʌlʌyob: Laꞌ sujbic i ñuclel Dios. Chʌncox i chʌc letsel i butsꞌil jini colem bʌ lum chʌncol bʌ ti pulel. Cheꞌ ti yʌlʌyob.
4 Jini veinticuatro ancianojob yicꞌot jini chʌntiquil cuxul bʌ chʌ bʌ yes ti ñocleyob ti lum. Tiꞌ chꞌujutisʌyob Dios, jini buchul bʌ tiꞌ buchlib. Ti yʌlʌyob: Chʌꞌʌch yom bajcheꞌ ti ujti. Laꞌ sujbic i ñuclel Dios. Cheꞌ ti yʌlʌyob.
5 Cheꞌ jini ti loqꞌui ajtꞌan tyʌlem bʌ yaꞌ baꞌan i buchlib Dios. Ti yʌlʌ:
Subula i ñuclel lac Dios,
ti pejtyeletla muꞌ bʌ laꞌ chaꞌliben i troñel Dios,
muꞌ bʌ laꞌ chꞌujbiben i tꞌan.
Chʌꞌʌch yom ti pejtyeletla, mi anix laꞌ jabilel, mi max tyo baꞌan cabʌl laꞌ jabilel, mi ricojetla mi maꞌix ricojetla, mi an laꞌ ñuclel tiꞌ tyojlel quixtyañujob mi maꞌix laꞌ ñuclel. Luꞌ subula i ñuclel Dios.
Cheꞌ ti yʌlʌ jini ajtꞌan.
Qꞌuiñejel cheꞌ Cristo mi quejel i yotsan tiꞌ tyojlel jini tsaꞌ bʌ i chꞌujbiyob
6 Cheꞌ jini an chʌ bʌ ti cubi cheꞌ bajcheꞌ i tꞌan cabʌl quixtyañu, cheꞌ bajcheꞌ cabʌl río tyac, cheꞌ bajcheꞌ cꞌam bʌ mi tyojmel chajc. Jini cꞌam bʌ tꞌan tsaꞌ bʌ cubi ti yʌlʌ:
Laꞌ sujbic i ñuclel Dios. Tsaꞌix queji i chaꞌlen yumʌl lac Yum Dios, jini machꞌʌ baꞌan i pꞌisol i pꞌʌtyʌlel.
7 Laꞌ lac tijicnisan lac bʌ. Laꞌ lac subeꞌ i ñuclel lac Yum
como tsaꞌix cꞌoti i yorojlel Cristo mi quejel i yotsan tiꞌ tyojlel
pejtyelelob tsaꞌ bʌ i chꞌujbiyob.
8 Ti aqꞌuentiyob chaꞌan miꞌ lʌpob ñoj wen bʌ, sʌsʌc bʌ i pislel yicꞌot lemlaw bʌ.
Cheꞌ ti yʌlʌ jini ajtꞌan. Como jini ñoj wen bʌ i pislel jiñʌch i señʌjlel jini tyoj bʌ miꞌ chaꞌlen jini i chaꞌañoꞌ bʌ Dios.
9 Jini ajtroñel i chaꞌan Dios chꞌoyol bʌ ti panchan tiꞌ subeyon: Chʌꞌʌch maꞌ tsꞌijbun ti jun bajcheꞌ jini: Tijicñayob jini tsaꞌ bʌ pʌjyiyob chaꞌan ochic ti qꞌuiñejel chaꞌan ñujpuñel yicꞌot jini muꞌ bʌ i pejcʌntyel ti i Tiñʌmeꞌ Dios. Cheꞌ tiꞌ subeyon jini ajtroñel i chaꞌan Dios chꞌoyol bʌ ti panchan. Jini ti bej alʌ: Dios ti yʌqꞌueyon c subeñet ili tꞌan. Yoque melelʌch ili tꞌan. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.
10 Joñon Juañon. Ti ñocleyon yaꞌ tiꞌ tꞌejl chaꞌan mic chꞌujutisan jini ajtroñel i chaꞌan Dios chꞌoyol bʌ ti panchan. Pero jini tiꞌ subon: Mach a chaꞌlen cheꞌ bajcheꞌ jini como ajtroñelon jach i chaꞌan Dios cheꞌ bajcheꞌet yicꞌot yambʌ hermañujob chʌncol bʌ i chꞌujbin i tꞌan Jesús tiꞌ jumpꞌej i pusicꞌal. Chꞌujutisan Dios. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan. Como majchical jach bʌ quixtyañu cheꞌ miꞌ subeꞌ majlel i tꞌan Dios cheꞌ bajcheꞌ yom i pusicꞌal Jesús, jiñʌch miꞌ yoque xiqꞌueꞌ yʌleꞌ Dios jini quixtyañu, cheꞌ jini.
Jini cꞌʌchʌl bʌ ti sʌsʌc bʌ caballo
11 Cheꞌ jini cheꞌ bajcheꞌ tic ñajal ti quilʌ jamʌlix yaꞌ ti panchan. Yaꞌi ti tsictiyi sʌsʌc bʌ caballo. Jini cꞌʌchʌl bʌ tiꞌ pat caballo jiñʌch Cristo. Tiꞌ pejcʌnti ti Xucꞌul Bʌ yicꞌot ti Melelʌch Bʌ como tyojʌch bajcheꞌ miꞌ chaꞌlen yumʌl bajcheꞌ miꞌ chaꞌlen guerra chaꞌan i yʌqꞌuen i xotꞌeꞌ i mul quixtyañujob.
12 I wut jini cꞌʌchʌl bʌ ti caballo ti lejmi cheꞌ bajcheꞌ lemlemña bʌ cꞌajc yilal. Xojol tiꞌ jol cabʌl corona tyac. Tsꞌijbubil i cꞌabaꞌ machꞌʌ baꞌan majch tiꞌ ñaꞌtyʌ i sujmlel. Jini jach jini cꞌʌchʌl bʌ tiꞌ bajñel cʌñʌ.
13 Lʌpʌl i chaꞌan i pislel sulul bʌ ti chꞌichꞌ yilal. Mi pejcʌntyel i cꞌabaꞌ ti i Tꞌan Dios jini cꞌʌchʌl bʌ.
14 Jini soldadojob yubil tyʌlem bʌ ti panchan tiꞌ tsʌcleyob majlel jini cꞌʌchʌl bʌ. Lʌpʌlob i chaꞌan ñoj wen bʌ i pislel. Sʌsʌc. Sʌc i pislel. Luꞌ cꞌʌchʌlob ti sʌsʌc bʌ caballo tyac jeꞌel.
15 Ti i tiꞌ jini cꞌʌchʌl bʌ ti loqꞌui machit yilal. Wen jay chaꞌan i tsep quixtyañujob muꞌ bʌ i contrajiñob. Añʌch tsucul tyaqꞌuin bʌ tyeꞌ yilal chaꞌan tsiquil añʌch yeꞌtyel como tsʌts mi quejel i chaꞌlen yumʌl. Mi quejel i chaꞌlen tsʌts bʌ melojel chaꞌan jilic jini quixtyañujob muꞌ bʌ i contrajin Dios. Cheꞌ bajcheꞌ quixtyañu muꞌ bʌ i petseꞌ loqꞌuel i yaꞌlel uva ti yoc chʌꞌʌch bajcheꞌ jini, Dios mi quejel i yʌqꞌuen i ñusan ñoj tsʌts bʌ wocol chaꞌan tiꞌ michꞌlel Dios machꞌʌ baꞌan i pꞌisol i pꞌʌtyʌlel.
16 Tsꞌijbubil i cꞌabaꞌ ti i bujc yicꞌot ti i yaꞌ jini cꞌʌchʌl bʌ tiꞌ pat caballo. Yoque i cꞌabaꞌʌch i Rey reyob, i Yum yumʌlob. Chʌꞌʌch tsꞌijbubil yaꞌ tiꞌ bujc.
17 Ti wiꞌil ti quilʌ cheꞌ bajcheꞌ tic ñajal juntiquil ajtroñel i chaꞌan Dios chꞌoyol bʌ ti panchan waꞌal ti pam qꞌuin. Ti wen cꞌam bʌ tꞌan tiꞌ pejcʌ pejtyelel xtyaꞌjol muꞌ bʌ ti wejlel ti chan. Ti yʌlʌ: Laꞌ cula. Muchꞌquin laꞌ bʌ chaꞌan laꞌ cꞌuxeꞌ ñuc bʌ uchꞌel i chaꞌan bʌ Dios.
18 Laꞌ cula chaꞌan laꞌ cꞌuxeꞌ i bʌcꞌtyal yumʌlob yicꞌot i chaꞌan bʌ capitañob yicꞌot i chaꞌan bʌ pꞌʌtyʌl bʌ quixtyañujob yicꞌot i bʌcꞌtyal caballo tyac yicꞌot jini cꞌʌchʌloꞌ bʌ, yicꞌot i bʌcꞌtyal baꞌical bʌ quixtyañujob mi libre bʌ, mi lolon ajtroñel jach bʌ, mi quixtyañu muꞌ bʌ i qꞌuejlel ti ñuc, mi maꞌix miꞌ qꞌuejlel ti ñuc. Cheꞌ ti subenti jini xtyaꞌjol tyac como yaꞌ mi quejel i yajlel cabʌl bʌcꞌtyalʌl chaꞌan i cꞌuxeꞌ como mi quejel i tsʌnsʌntyel cabʌl quixtyañujob chaꞌan tiꞌ contrajiyob Dios.
19 Cheꞌ jini ti quilʌ cheꞌ bajcheꞌ tic ñajal jini bʌbʌqꞌuen bʌ animal yicꞌot yumʌlob ti mulawil yicꞌot i soldadojob tsaꞌ bʌ i muchꞌquiyob i bʌ chaꞌan miꞌ contrajin Cristo, jiñʌch jini cꞌʌchʌl tiꞌ pat caballo yicꞌot i soldadojob Cristo yilal.
20 Cristo yicꞌot jini am bʌ tiꞌ wenta tiꞌ motin chucuyob, tiꞌ cʌchʌyob jini bʌbʌqꞌuen bʌ animal yicꞌot jini xlot tsaꞌ bʌ i lolon subu i bʌ ti jini tsaꞌ bʌ i xiqꞌui yʌleꞌ Dios. Jiñʌch jini tsaꞌ bʌ i pʌsʌ ñuc bʌ i pꞌʌtyʌlel tiꞌ tyojlel jini bʌbʌqꞌuen bʌ animal. Chaꞌan ti jini ñuc bʌ i pꞌʌtyʌlel tiꞌ lotiyob jini tsaꞌ bʌ i yʌcꞌʌyob i bʌ i chꞌʌmeꞌ i marcajlel jini bʌbʌqꞌuen bʌ animal. Jini tsaꞌ bʌ i chꞌʌmʌyob i marcajlel tiꞌ chꞌujutisayob i locꞌom jini bʌbʌqꞌuen bʌ animal cheꞌ cuxulob tyo. Jini bʌbʌqꞌuen bʌ animal yicꞌot jeꞌel jini xlot tsaꞌ bʌ i lolon subu i bʌ ti jini tsaꞌ bʌ i xiqꞌui yʌleꞌ Dios ti chojquiyob ochel ti colem yajnib cꞌajc muꞌ bʌ ti lejmel yicꞌot azufre.
21 Ti pejtyelel jini quixtyañujob tsaꞌ bʌ i tsʌcle majlel jini bʌbʌqꞌuen bʌ animal yicꞌot jini xlot tsaꞌ bʌ i lolon subu i bʌ ti jini tsaꞌ bʌ i xiqꞌui yʌleꞌ Dios ti tsʌnsʌntiyob ti machit tsaꞌ bʌ loqꞌui ti tiꞌ yilal jini cꞌʌchʌl bʌ ti caballo. Ti pejtyelel jini xtyaꞌjol ti ñajꞌʌyob tiꞌ bʌcꞌtyal jini tsaꞌ bʌ tsʌnsʌntiyob. Chʌꞌʌch ti quilʌ cheꞌ bajcheꞌ tic ñajal jini muꞌ tyo bʌ quejel i yujtyel. Cheꞌ ti yʌlʌ Juan.