2 Ti cꞌam bʌ tꞌan ti yʌlʌ: Jejmenix jini colem lum Babilonia bʌ i cꞌabaꞌ. Tsaꞌix ochiyob ti chumtyʌl xibajob yicꞌot jujunchajp maꞌtyeꞌmut machꞌʌ bʌ yom i qꞌueleꞌ quixtyañujob cheꞌ bajcheꞌ jini xcuj yicꞌot xtijꞌab.

3 Jejmenix Babilonia como quixtyañujob yaꞌ bʌ añob yaꞌi ti yʌqꞌueyob i chaꞌlen machꞌʌ wen bʌ i chaꞌlibal cabʌl quixtyañu am bʌ ti mulawil. Ti yʌqꞌueyob yumʌlob wʌꞌ ti mulawil chaꞌan i chaꞌleñob bajcheꞌ yom i bajñel pusicꞌalob. Ti yʌqꞌue chaꞌan ochic ti ricojob jini muꞌ bʌ ti mʌñoñel ti choñoñel como jini yaꞌ bʌ añob miꞌ lolon mulʌbeñob cabʌl chʌ bʌ an i chaꞌañob. Miꞌ lolon wen mulan i mʌñeꞌ i choñeꞌ chaꞌan jach yomob. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.

4 Cheꞌ jini, ti cubi yambʌ ajtꞌan loqꞌuem bʌ ti panchan. Cheꞌ bajcheꞌ i tꞌan Cristo ti cubi. Ti yʌlʌ: Jatyetla, c chaꞌañet bʌ la, loqꞌuenla yaꞌ baꞌan jini babiloniajob. Maꞌ mi laꞌ wotsan laꞌ bʌ ti i mulob chaꞌan maꞌan mi laꞌ wʌqꞌuentyel laꞌ wubin jini ñoj wocol bʌ muꞌ bʌ quejel i yubiñob.

5 Lʌtsʌlix i mul yubi jini yaꞌ bʌ añob yaꞌi cꞌʌlʌ mi cꞌotyel ti chan yubil. Cꞌajal i chaꞌan Dios i simaronlelob.

6 Qꞌuextyʌbeñob chaꞌyajlel i yonlel i simaronlel bajcheꞌ tiꞌ chaꞌleyob tiꞌ contrajob.

7 Chʌꞌʌch yonlel bajcheꞌ tiꞌ chan isʌ i bʌ yicꞌot bajcheꞌ tiꞌ chumle ti cabʌl chʌ bʌ an i chaꞌan, chʌꞌʌch lajal i yonlel wocol yicꞌot chꞌʌjyemlel yom mi laꞌ wʌqꞌuen i yubin. Como jini yaꞌ bʌ añob yaꞌi mi yʌlob tiꞌ pusicꞌal: Wʌꞌ buchulonla cheꞌ bajcheꞌ xꞌixic bʌ yumʌlonla yubil. Maꞌix mebaꞌonla. Maꞌix baꞌ bʌ ora mi quejel la cubin wocol. Chʌꞌʌch miꞌ lolon alob tiꞌ pusicꞌal.

8 Chaꞌan ti caj ti pejtyelel machꞌʌ wen tsaꞌ bʌ i chaꞌleyob, ti mismo jim bʌ ora mi quejel i yubin pejtyelel jini wocol: jiñʌch sajtyel yicꞌot chꞌʌjyemlel yicꞌot wiꞌñal. Mi quejel i pulel ti cꞌajc. Como pꞌʌtyʌl lac Yum Dios muꞌ bʌ i chaꞌlen melojel. Cheꞌ ti yʌlʌ jini ajtꞌan loqꞌuem bʌ ti panchan.

9 Jini yumʌlob wʌꞌ ti mulawil tsaꞌ bʌ i chaꞌleyob i tsuculel yicꞌot jini loqꞌuemoꞌ bʌ ti Babilonia mi quejel i chaꞌlen uqꞌuel chaꞌan i chꞌʌjyemlel cheꞌ miꞌ qꞌuelob mi letsel i butsꞌil cheꞌ muꞌ ti pulel Babilonia.

10 Mi quejel i ñajti qꞌuelob ili lum chaꞌan ti caj miꞌ bʌcꞌñan i wocol. Mi quejel i yʌlob: Pꞌumpꞌuñetla añet bʌ la ti Babilonia jini colem bʌ cꞌotyajax bʌ lum. Ti saj ora jach ti waꞌ aqꞌuentiyetla laꞌ xotꞌeꞌ laꞌ mul, cheꞌob.

11 Jini mucꞌob bʌ ti mʌñoñel ti choñoñel mi quejel i yucꞌtyan Babilonia jeꞌel como maꞌan majch muꞌ bʌ i bej mʌñeꞌ jini muꞌ bʌ i cucheꞌ majlel chaꞌan miꞌ choñob.

12 Jini i choñoñel jiñʌch oro yicꞌot plata yicꞌot cꞌotyajax bʌ lets bʌ i tyojol bʌ tyum tyac yicꞌot perlas yicꞌot ñoj wen bʌ pisil yicꞌot seda bʌ pisil yicꞌot chʌccojam bʌ pisil yicꞌot chʌchʌc bʌ pisil yicꞌot cꞌotyajax bʌ i yutsil bʌ tyeꞌ tyac yicꞌot lets bʌ i tyojol bʌ tyeꞌ tyac yicꞌot bronce yicꞌot tsucul tyaqꞌuin yicꞌot mármol bʌ i cꞌabaꞌ bʌ tyun,

13 yicꞌot jeꞌel i tsꞌʌcal uchꞌel canela bʌ i cꞌaba yicꞌot yowocña bʌ i tsꞌʌcal weꞌel yicꞌot pom yicꞌot yambʌ yowocña bʌ pom yicꞌot perfume yicꞌot vino yicꞌot aceite yicꞌot wen juchꞌul bʌ harina yicꞌot i wut jam trigo bʌ i cꞌabaꞌ. An jeꞌel miꞌ pʌyeꞌ majlel chaꞌan miꞌ choñeꞌ animal tyac yujil bʌ cuchejel yicꞌot tiñʌmeꞌ yicꞌot caballo yicꞌot carreta tyac. An jeꞌel miꞌ pʌyeꞌ majlel chaꞌan miꞌ choñeꞌ lolon ajtroñel jach bʌ quixtyañujob.

14 Jini mucꞌoꞌ bʌ ti mʌñoñel ti choñoñel, cheꞌ miꞌ cꞌajtisañob Babilonia, mi quejel i yʌlob: Wale maꞌix bej an ti ili lum pejtyelel jini wut tyeꞌ tyac. Wale tsaꞌix junyajlel jili pejtyelel i ricojlel yicꞌot pejtyelel i cꞌotyajlel ili lum. Cheꞌ mi quejel i yʌlob.

15 Jini tsaꞌ bʌ i tyajayob i ricojlel chaꞌan ti caj i mʌñoñel i choñoñel yaꞌ ti Babilonia mi quejel i ñajti qꞌuelob chaꞌan ti caj miꞌ bʌcꞌñan i wocol. Mi quejel i yucꞌtyañob ili lum.

16 Jini mucꞌoꞌ bʌ ti mʌñoñel ti choñoñel, cheꞌ miꞌ cꞌajtisañob Babilonia, mi quejel i yʌlob: Pꞌumpꞌuñetla añet bʌ la ti Babilonia ti wajali. Lajaletla yubil bajcheꞌ juntiquil xꞌixic tsaꞌ bʌ i lʌpʌ ñoj wen bʌ i pislel yicꞌot chʌccojam bʌ yicꞌot chʌchʌc bʌ. Lajaletla yubil bajcheꞌ juntiquil xꞌixic tsaꞌ bʌ i wen chꞌʌlʌ i bʌ ti oro yicꞌot ñoj cꞌotyajax bʌ lets bʌ i tyojol bʌ tyun tyac yicꞌot perla tyac.

17 Ti saj ora jach ti waꞌ jili pejtyelel i ricojlel. Pejtyelel jini i yumob barco tyac yicꞌot quixtyañujob mucꞌoꞌ bʌ ti xʌmbal ti barco yicꞌot pejtyelel xnijca barcojob yicꞌot jini muꞌ bʌ ti ganar muꞌ bʌ ti troñel ti colem jaꞌ tiꞌ luꞌ ñajti qꞌueleyob Babilonia.

18 Cheꞌ ñac ti yilʌyob i butsꞌil jini cꞌajc tsaꞌ bʌ puli jini lum, ti yucꞌtyʌyob. Ti cꞌam ti yʌlʌyob: Maꞌan yambʌ colem lum lajal bʌ i cꞌotyajlel cheꞌ bajcheꞌ iliyi. Chʌꞌʌch mi quejel i yʌlob. Chʌꞌʌch ti quilʌ cheꞌ bajcheꞌ tic ñajal jini muꞌ tyo bʌ quej i yujtyel.

19 Ti pejtyelel jini quixtyañujob tiꞌ chocoyob tsꞌubejn tiꞌ jolob chaꞌan i señʌjlel i chꞌʌjyemlel. Ti cꞌam bʌ tꞌan ti yucꞌtyʌyob ili lum. Ti yʌlʌyob: Pꞌumpꞌuñetla añet bʌ la ti Babilonia. Chaꞌan ti caj laꞌ ricojlel tsaꞌix i tyajayob i ricojlel jeꞌel pejtyelelob añoꞌ bʌ i barco ti colem jaꞌ. Pero wale ti saj ora jach tsaꞌix jisʌntiyetla. Cheꞌ ti quilʌ mi quejel i yucꞌtyañob ili lum.

20 Cheꞌ jini ti cubi yambʌ ajtꞌan tsaꞌ bʌ yʌlʌ: Pero tijicnisan laꞌ pusicꞌal chaꞌan chʌ bʌ ti tyumbenti ili lum, jatyetla añet bʌ la ti panchan, yicꞌot i chaꞌañet bʌ la Dios, yicꞌot ti pejtyeletla yajcʌbilet bʌ la ajsubtꞌan ñumel, yicꞌot jatyetla muꞌ bʌ i xiqꞌuet laꞌ wʌleꞌ Dios. Como Dios ti yʌqꞌue i xotꞌeꞌ i mul ili lum chaꞌan tiꞌ tyʌcꞌlʌyetla. Cheꞌ ti cubi ajtꞌan cheꞌ bajcheꞌ tic ñajal.

21 Cheꞌ jini, juntiquil pꞌʌtyʌl bʌ ajtroñel i chaꞌan Dios chꞌoyol bʌ ti panchan tiꞌ chꞌuyu letsel jumpꞌej colem tyun cheꞌ bajcheꞌ colem ñaꞌtyun yilal. Tiꞌ choco ochel ti colem jaꞌ. Ti yʌlʌ: Cheꞌ bajcheꞌ chʌncol c choqueꞌ jini colem tyun chʌꞌʌch jeꞌel mi quejel i chojquel jeꞌel jini colem lum Babilonia bʌ i cꞌabaꞌ. Maꞌix baꞌ bʌ ora mi quejel i chaꞌ qꞌuejlel.

22 Maꞌix baꞌ bʌ ora mi quejel i chaꞌ ubintyel i yuqꞌuel jini arpa bʌ música mi jinic jalʌl mi jinic trompeta. Maꞌix baꞌ bʌ ora mi quejel i chaꞌ ochel yaꞌi jini yujil bʌ i niqꞌui melol chʌ bʌ tyac jach bʌ mi mejlel. Maꞌix baꞌ bʌ ora mi quejel i chaꞌ ubintyel ajjuchꞌbal ti ñaꞌtyun yaꞌi.

23 Maꞌix baꞌ bʌ ora mi quejel i chaꞌ qꞌuejlel i cꞌʌcꞌal lámpara yaꞌ ti Babilonia. Maꞌix baꞌ bʌ ora mi quejel i chaꞌ ubintyel i qꞌuiñilel ajñujpuñelob yaꞌi. Jini tsaꞌ bʌ i chaꞌle mʌñoñel, choñoñel yaꞌi, jiñʌch jini más ñucoꞌ bʌ ti pejtyelel mulawil, pero ti lolon chꞌujbi i lotintyel ti jini am bʌ ti Babilonia.

24 Cheꞌ bajcheꞌ tic ñajal ti quilʌ bajcheꞌ mi quejel i yʌqꞌuentyel i wen ñusan wocol jini añoꞌ bʌ ti Babilonia como ti yʌqꞌueyob ti tsʌnsʌntyel jini tsaꞌ bʌ i xiqꞌui yʌleꞌ Dios yicꞌot i chaꞌañoꞌ bʌ Dios. Jini añoꞌ bʌ ti Babilonia ti aqꞌuenti tiꞌ wenta pejtyelelob quixtyañujob tsaꞌ bʌ tsʌnsʌntiyob ti mulawil chaꞌan ti caj tiꞌ chꞌujbiyob Dios.