Imama linyọn̄ ìre ichacha Awaji
4
Ìre keke okitap ibaak mè etim me etete kinyi?
Îre owuwa ijo ulọk echi òkitim me emen kinyi okisa ibaak mè etim inu.
2 Enyi isiweek inu,
mè enyi kpekọt ikaan̄ inu enyi ekiweek,
enyi mîra iweek ikpakpan̄ ene,
inyi enyi ekọt ekaan̄ inu ya.
Enyi ekikaan̄ ijo ulọk me lek inu ebi ofifi ife ekaan̄be.
Ire enyi kpekọt inu ya ikaan̄,
enyi mîra ibaak ibaak,
mè itim etim.
Enyi kpekikaan̄ inu enyi ekiweek,
mije,
enyi kpekibeek me ubọk Awaji.
3 Enyi isikibeek inu me ubọk Awaji,
enyi kpekibọkọ,
mije,
enyi ekibeek inan̄a me ijo ulọk.
Enyi ekiweek isasa inu cha ibele lek kinyi gaalek ejit.
4 Enyi kechi ìkup kubọk enenwaan̄ òtetele ogwu olom,
mè ikisi ije oyet ikana!
Ìre enyi kperiọọn̄ ibe ke imama linyọn̄ ìre ichacha Awaji?
Eya orọ,
ene geelek ògọgọọk linyọn̄ itet unene îkana ogwu ochicha me lek Awaji.
5 Ìre enyi ekimọnọ ibe ke ikọ egebe me Ikpa Mbuban ibe ke Ekwukwu eyi Awaji otapbe me emen kiji îkaan̄ ikpele ulọk me lek kiji ìre ataak?
6 Ire,
atata nnwọn eyi Awaji otapbe eji me ejit îmin enenen igak ijo ulọk òkup eji me ejit.
Ikeya si ke ege me Ikpa Mbuban ibe,
“Ebi geelek ìkigumu lek,
Awaji ìkakichieek ìnyi.
Ire,
ebi geelek ìkisiki lek,
ebiba ke Awaji okitap ubọk inyi,
mè ikitap si unye me lek.”a
7 Eya orọ,
ìsiki lek kinyi me isi Awaji,
mè ijit Yọk,
ke Yọk môlibi inan̄a enyi me lek.
8 Ìtaba lek ìriaak me lek Awaji,
ke Awaji si môtaba lek iriaak me lek kinyi.
Enyi ebi ìkirọ ijo inu,
ìsan̄a ubọk kinyi me emen ijo inu.
Enyi ebi ejit iba,
ìtele ejit iba kinyi,
mè ìrọ inyi ejit kinyi itana me isi Awaji.
9 Ìkeek lek kinyi!
Ìbọnọ lek,
mè ìfieek ejit,
mè ìto ito mije otutuuk ijo inu enyi erọbe.
Ikayaka ìchak imọm,
ìfieek ejit!
Ikayaka ìnwọọn̄ unwọọn̄,
ìkup me ufieek-owot!
10 Ìsiki lek kinyi me isi Awaji,
ke Awaji môbene enyi ifo inyọn̄.
Nteme ofolek itutumu ene ifiat
11 Bọn Nte n̄a,
ikatumu lek kinyi ìfiat.
Mije,
ene geelek òtutumu gwun̄ Nte kan̄ ifiat,
mè ifieek gwun̄ Nte kan̄ ikọ,
îtumu Ikan Awaji ifiat,
mè ifieek Ikan ya si ikọ.
Ire owu ofieek Ikan Awaji ikọ,
owu òkayaka ìre ogwu òkisun̄ Ikan ya.
Owu okana ire ogwu òmọmọnọ ibe ke ọmọ îmin igak Ikan ya.
12 Awaji gaalek okaan̄ inyinyi ene Ikan.
Ọmọ gaalek si ore ogwu òbofieek oyerebet inyi ene.
Ọmọ gaalek obokọt inyan̄a ene,
mè ifiat si ugwem ene.
Ìre owu ìre ekene,
eyi obonikifieek gwun̄ Nte kwun̄ ikọ?
Nteme ofolek igugugo lek
13 Ìgban̄ utọn̄!
Enyi ebi ìkitumu ibe,
“Cherekeyi,
mè ìre iyakwut,
eji mênan̄a me ama keyi ifo ama keyilọ isi iluk acha ge,
mè ikinyam ewe,
mè ikibọm ikpoko.”
14 Inu òborọ me iyakwut,
enyi me lek kinyi kperiọọn̄!
Ìre enyi ekikeek ibe ke ugwem kinyi ìre keke mọnọ?
Ugwem kinyi ìkup kubọk mbat òkisibi me otu ewelegwe.
Ìkafiat mgbọ îra ininimi ita.
15 Kpan̄asi igugugo lek ikeya,
ikọ enyi mekitumu ìre,
“Ire ineme Okaan̄-ene,
eji mêluk ugwem,
mè irọ inu keyi,
mè ìre inu keyilọ.”
16 Ire,
me mgbọ keyi,
enyi ekigugo lek,
mè ikitumu ikpele otu ikọ.
Ojelek gogolek keya ìre ijo inu.
17 Eya orọ,
ire ene iriọọn̄ ata inu ògbegbe irọrọ,
mè ijuuk itele,
ìkarọ,
ene ya îrọ ijo inu.