Nteme enyibe ebi ìbọbọọn̄ ubọọn̄
5
Mgbọ yi,
enyi ebi ìbọbọọn̄ ubọọn̄,
ìgban̄ utọn̄!
Ìbene ìkito ito,
mè ìkisut lek,
mije uyọrọlek òbonu inyi enyi.
2 Inu ubọọn̄ kinyi îfiat isan̄a kpai.
Nkarankat îtaka otutuuk ujuja ekwut mè ofọnti kinyi igwak isan̄a kpai.
3 Achiaan̄ îtaka si otutuuk ikpoko alata araran̄ mè alata okuket kinyi ifiat isan̄a kpai.
Achiaan̄ ya òtataka ikpoko cha môre inu ijejeen̄ inyi enyi,
ibe ke ikeya si ke akpalek kinyi obokpukpuku isan̄a,
kubọk inu ukan̄ otakabe iriọk.
Mije,
enyi ekititiin̄ ikpoko isun̄ inyi lek kinyi me mgbọ keyi òrere òta mgbọ.
4 Ìkpọ,
enyi mîgwen ebi ikwaan̄ ibe enegbọ oron uko enyi enyi,
mè ijit ikpekpe ife cha ikpoko.
Ife cha mêkito ito,
mije mfeen̄ enyi efeen̄be ema.
Enyi mîgwen si ebi ikwaan̄ ibe enerọkọ inu me uko enyi enyi,
mè ijit si ikpekpe ema mkpukpe kiban̄.
Ida ito kiban̄ si îre utọn̄ Okumugwem Ogwukaan̄ Inyọn̄ mè Ijọn̄.
5 Me linyọn̄ keyi,
enyi mîrie ugwem ubọk înemebe enyi,
mè ikaan̄ inu geelek enyi eweekbe.
Enyi mîrie utop otu geelek isa imiin̄ ufuk kubọk eriembuuk ekigwook isun̄ iban usen ebekpan̄.
6 Enyi mîtip ebi ekarọge ijo inu geege oyerebet,
mè ikpan̄ ema si,
me ere ema kpekekeke ìkwek oniin̄ kinyi.
Ikakat ejit ire òta
7 Bọn Nte n̄a,
ìkat ejit mege ìre mgbọ Okaan̄-ene Jisọs môkpọkbe inu.
Ìsa ebi ìkiwop uko ìkween̄ inu.
Ema isiwop mfut kiban̄ isan̄a me uko,
ekekikat ejit ikup mege,
mgbọ ibot îra inu,
mè iraka.
Mgbọ ya,
mfut kiban̄ îra itibi ijaan̄,
mè òto ata mfut.
8 Ikeya si,
enyi ìkat ejit,
mè ìkeke ìnye,
mije,
inunu Okaan̄-ene îgbet.
9 Bọn Nte n̄a,
ene geege ikaben gwun̄ Nte kan̄ me ejit,
inyi oyerebet ikatip enyi me isi Awaji.
Mije,
Okaan̄-ene Jisọs Karais,
ogwu òbosibi oyerebet òwa me otu isotu okekebe.
10 Bọn Nte n̄a,
ìsa ebi nriran ukot ikaan̄,
ebi ìtutumu ikọ me erieen̄ Awaji,
ìkween̄ inu ofolek ikakat ejit me emen ufialek.
11 Me mgbọ keyi,
eji ekimọnọ ema kubọk ebi Awaji ogbanabe,
mije,
ema mîkat ejit,
mè ikeke inye ire òta.
Enyi mînọ ubọk Jobu osabe ikat ejit mgbọ ntọ-mkpọ onube inyi.
Enyi mîriọọn̄ si ubọk Okumugwem ogbanabe ọmọ me mgburudun̄ mgbọ.
Me atikọ,
ejit njijin,
mè ejit nsan eyi Okumugwem okaan̄be me lek ebi kan̄ îmin enenen.
12 Ògak ge,
bọn Nte n̄a,
ikakinyan̄a ibot mgbọ enyi ekichieek ene use.
Ikasa emen inyọn̄,
mè ìre linyọn̄,
mè ìre ofifi inu geelek ìnyan̄a ibot.
Iin̄ kinyi ire iin̄!
In̄-in̄ kinyi ire si in̄-in̄!
Mije,
ire enyi kperọ ikeya,
oyerebet môtip enyi.
Uriaak eyi ichechieek
13 Me etete kinyi,
ire ikaan̄ ogwu òkup me emen ufialek,
ene ya iriaak uriaak.
Ire ikaan̄ ogwu ejit okibele,
ene ya ikọt okwa itọn̄ Awaji.
14 Ire ikaan̄ ogwu lek ikanyege,
ene ya igwen ebi ibot uwu ntitiin̄ Awaji,
mè eneriaak uriaak me lek kan̄,
mè esa aran̄ etoon̄ ọmọ me lek me erieen̄ Okaan̄-ene.
15 Uriaak ya ife cha esabe me ichechieek iriaak môrọ inyi lek ogwu orukan̄ ya inye.
Okaan̄-ene môgwa ogwu orukan̄ ya.
Ire ikaan̄ ijo inu geelek ene ya orọbe,
Okaan̄-ene môtele si inyi ene ya.
16 Eya orọ,
me etete kinyi,
ogwu ikup,
ifuk ijo kan̄ isibi inyi ogwu melek kan̄,
mè ge iriaak uriaak me ibot ge si,
inyi Awaji ikigwa enyi.
Uriaak ogwu ata irọrọ oriaakbe îkikaan̄ unye enenen,
mè ikisi si ikpele ikwaan̄.
17 Ìkeek-nu Ilaija ogwu nriran.
Ọmọ ìre si ebilene kubọk eji erebe.
Ire,
mgbọ Ilaija otetbe lek inye,
mè iriaak uriaak ibe ibot ikarep,
ibot ìkarep si me linyọn̄ otutuuk acha ita mè onyan̄ gweregwen.
18 Mgbọ mgbọ ya orakabe,
ikpọkpọk iriaak uriaak ibe mè ibot irep.
Awaji orọrọ inyi isinyọn̄ ida ibot igwook me linyọn̄.
Mfut obebene ikitibi isibi me ijọn̄.
19 Bọn Nte n̄a,
ire ene ge me etete kinyi ije ilọ oniin̄ inan̄a me lek atikọ eyi Awaji,
mè ofifi ene itap ubọk irọ inyi ene ya igwu ikom igọọk Awaji,
20 enyi ìriọọn̄ ibe,
ene geelek òrọrọ inyi ogwu ijo igwu ikom,
mè itele ijo oniin̄ kan̄,
ke ene ya înyan̄a ibot ejit ogwu ijo ya isibi me mkpa,
mè irọ inyi Awaji itele owuwa ijo inu.