Itetet alọm ene ikaan̄
3
Bọn Nte n̄a,
owuwa ene me etete kinyi ekaweek irere ebi ijejeen̄,
mije,
ike enyi eriọọn̄be,
oyerebet Awaji mônye me lek kiji ebi ijejeen̄ igak otutuuk ene.
2 Otutuuk kiji mîkirọ ilọ me owuwa oniin̄.
Ire,
ikaan̄ ogwu ikarọge ìlọ me otu itumu-ikọ,
ene ya înwọn isan̄a.
Ogwu òkup ikeya si obokọt ikpulu otutuuk lek kan̄.
3 Eji isiberọ inyi inyinya ikirọ inu eji ekiweek,
eji ekimọnọ mgbidim okwukwut itap isaba otu kan̄,
mè itobo ikaan̄.
Sa me ikeya,
eji mîra ikikọt iwumu anam ya ikana,
inyi isa eji isi ere geelek eji eweekbe isisi.
4 Ikeya si ke îkup me lek uji ile etapbe awala me lek.
Unye efet isinin̄ emen awala cha,
îra ikiben uji ya ikọp ije.
Ubọk geelek uji ya ominbe iyaka,
îre sọntiik uran̄ òkikup me edim uji ya gaalek ke ogwu òkikọkọp okisa igọbọ uji ya ikana isi agan̄ geelek îweekbe isisi.
5 Ubọk yaage si ke alọm ukan̄ okup.
Sọntiik gwun̄ alọm ukan̄ môkọt isak,
mè itaka nga oron ile isan̄a kpai.
Ikeyi ke alọm ene okup.
Mimin,
ìkamin.
Ire,
îkaan̄ unye enenen me emen ugwem ene,
mè ikitumu ikpele ikọ.
6 Alọm ene ìkup kubọk ukan̄.
Me etete otutuuk nriro geelek òkup me lek ene,
alọm obokọt irọ ijo inu ichit.
Otutuuk ijo inu geelek òkup me linyọn̄ îso ifuk me otu alọm ene.
Ijo inu înan̄a me lek alọm iso otutuuk akpalek ene.
Alọm môkọt itap ukan̄ itaka otutuuk ugwem ene ifiat isan̄a kpai,
bene me usen iman re usen mkpa ene ya.
Ama yọk me lek kan̄ ke ukan̄ yi òkup ene me otu alọm onan̄a.
7 Ebilene mîkikeme owuwa esese inu geelek Awaji orombe isiki,
mè ijeen̄ inu,
bene me lek anam oron,
mè unọn òwulu me inyọn̄,
mè inu geelek òkinyinyọnọ me ijọn̄,
re lek irin̄ òkup me mun̄.
8 Ire,
kpunu ene geege òkikọt ikeme alọm òkup me otu ene isiki,
mè ijeen̄ inu.
Alọm ìkup kubọk ogbuuruk ere ijo inu okpọkpọ ikigbuk inan̄a isibi.
Kpekikọt ikeme itet ikaan̄.
Inu geelek môkọtbe ikpan̄ ene òwa me otu alọm ene ojotbe.
9 Alọm yaage eji ekisa itọn̄ Ogwukaan̄ kiji òrere Nte kiji Awaji,
ọmọ si ke eji ekisa igbo ebilene ogbo kiji,
ebi Awaji orombe me mbet kan̄.
10 Itọn̄ mè ogbo ìkinan̄a me otu yaage isibi.
Bọn Nte n̄a,
ìkagbe ibe ikup ikeya!
11 Ìre ala mè ata mudim môkọt ikinan̄a me emen ogbuuruk yaage ikigbuk isibi?
12 Bọn Nte n̄a,
uti figi ìkakito mfut olifu,
olik gerep si ìkakito mfut figi.
Ikeya si,
kpebekọt ichibi ata mudim me emen ogbuuruk ere ala okinan̄a isibi.
Ijejeen̄ ofolek iriọọn̄-inu eyi ònan̄a me ubọk Awaji
13 Ìre ekene me etete kinyi oriọọn̄ inu,
mè ikigobo inu itet?
Ene ya isiki lek kan̄ me ijọn̄,
mè ikirọ ata inu.
Ikeya ke ebi ene ebesa iriọọn̄ ibe ke ene ya ìre ogwu òriọọn̄ inu.
14 Enyi me lek kinyi,
ire enyi ikaan̄ chieen̄ ile mè njijọ ejit me emen ejit kinyi,
mè ikikeek lek kinyi gaalek,
kpekikeek ebi ofifi ene,
ikagugo lek ibe ke enyi mîriọọn̄ inu,
mè ìsa me ikeya ìkan̄ ataak ìkeme atikọ.
15 Mije,
ojelek ugwem keya,
eyi usini ene ekibe ke îre iriọọn̄-inu,
ìkanan̄a me ubọk Awaji,
ìkanan̄a si me ubọk Ekwukwu Awaji.
Ìnan̄a me linyọn̄ keyi,
me ubọk Yọk.
16 Mije,
ere chieen̄ ile mè njijọ ejit okupbe,
ere ya si,
wọlọwọlọ mè otutuuk ijo inu geelek môkup.
17 Ire,
ata iriọọn̄-inu eyi Awaji okinyi ene,
ìkup esese.
Ogwu geelek òkakaan̄ iriọọn̄-inu keyi môtana me ejit kan̄,
mè ikima iluluk me esuuk melek ebi ene,
mè ikikaan̄ ata ejit,
mè ikisiki lek,
mè ikikaan̄ ejit nsan me lek ebi ene,
mè ikirọ ata inu mgbọ geelek.
Ìkpokigobo isi ene.
Ofiaan̄ geege ìkpokup si me emen kan̄.
18 Ebi geelek ìdedeke ugwem,
mè ikitap esuuk me etete ebi ene,
ife cha mêrie oruru ikpele unwọọn̄ eyi ònan̄a me lek ata ubọk ikwaan̄ kiban̄.