Otutuuk ene ìre ìkike me isi Awaji
2
Bọn Nte n̄a,
mgbọ keyi enyi echieekbe me lek Ogwukaan̄ kiji Jisọs Karais,
ogwu ujamgbugbo kan̄ ominbe ichit,
enyi ikakinyi ene geege umin ìgak ofifi ene.
2 Ire enyi ikup me emen uwu ntitiin̄ kinyi,
ene iba eneninin̄ inu,
ene ge ore ubọọn̄,
mè itap ujuja ofọnti unye otu ewe,
mè itap mkpọtubọk alata araran̄,
ogwulọ orere ugbọọn̄,
mè itap oka ofọnti ògwagwak.
3 Mgbọ enyi ekibọkọ ema itap,
enyi eneninyi ogwu òsasa ofọnti unye otu ewe ibala lek ya umin,
mè ibe ọmọ,
“Kpọ ata irek ire eyi,
na siki kweek,”
mè initumu inyi ogwu ugbọọn̄ ya ibe,
“Si keke me ere keyilọ.
Ire ere keya ìkanwọn owu me lek,
na siki kweek me ukpọk ijọn̄ me ere keyi,
me agba ukot n̄a.”
4 Ire enyi irọ ikeya,
enyi mîgobo ene isi me etete kinyi,
mè ikisa ijo nkeek kinyi irọ ikeme ebi melek kinyi.
5 Bọn Nte n̄a,
ìgban̄ utọn̄!
Îre ebi ìgbọgbọọn̄ me linyọn̄ keyi ke Awaji ogobo,
inyi enechieek me lek kè Jisọs,
mè esa me ikeya ekaan̄ mkpulu eyi Awaji me ìrot.
Awaji îwuuk lek ichieek use ibe ke ebi geelek ìmumun̄ ọmọ me chieen̄ mêkaan̄ uche me lek mkpulu kan̄.
6 Ire,
ìkpọ-nu ubọk enyi ekikpọ ebi ugbọọn̄ chieen̄ isiki.
Ǹdo enyi nu!
Ìre ebi owa ekitutuku enyi,
mè ikisa enyi isi uwu oyerebet?
Ìre ìkafat ìre ebi ìbọbọọn̄ ubọọn̄?
7 Ìre ìkare ife chi si ekitumu ikeme ata erieen̄ kè Jisọs eyi Awaji osabe me lek igwen enyi bọn kan̄?
8 Me atikọ,
ire enyi ikirọ Ikan ya,
eyi Awaji,
òrere Ogwu Ubọọn̄,
onyibe me emen Ikpa Mbuban ibe,
“Mun̄ ogwu melek kwun̄ me chieen̄ kubọk omun̄be akpalek kwun̄ me chieen̄,”a
enyi mêkirọ ijaan̄ enenen.
9 Ire,
ire enyi ikigobo isi ene,
enyi mîrọn̄ Ikan Awaji,
mè ije ilọ.
10 Ogwu òkisun̄ otutuuk Ikan Awaji,
mè inifiat ge gaalek me etete otutuuk Ikan cha,
ene ya îfiat otutuuk Ikan Awaji cha iso.
11 Mije,
Awaji ogwu òtutumu ibe,
“Kagan nwa ene,
kasi ugan,”b
ọmọ si otumu ibe,
“Kakpan̄ ene.”c
Eya orọ,
ire owu òkagan nwa ene,
òkasi ugan,
ire,
owu onenikpan̄ ene,
owu orọn̄ Ikan Awaji.
12 Eya orọ,
me ikọ geelek enyi ebetumu,
mè inu geelek enyi eberọ,
ikawuuk ibe ke,
usen ge,
Awaji môsibi eji oyerebet me ibot.
Inu ìbosa ifieek oyerebet inyi eji me usen ya ìre Ikan kan̄ eyi òkirọ inyi ene inwọnọ.
13 Me Usen Oyerebet ya,
Awaji ìkpokaan̄ ejit nsan me lek ene geege ogwu ìkakikaan̄ ejit nsan me lek ene.
Ire,
ogwu geelek òkikaan̄ ejit nsan me lek ene mômun̄ ibe ke ejit nsan Awaji okaan̄be me lek ene îmin igak itip-oyerebet eyi Awaji okitip ene.
Ijejeen̄ ofolek ikakaan̄ ichechieek mè irọrọ ata ikwaan̄
14 Bọn Nte n̄a,
ire ene ibe ke ọmọ îkaan̄ ichechieek,
ire,
ìkakirọ ata ikwaan̄ geege,
ìre kpasi oruru ke ene ya okaan̄?
Ìre ojelek ichechieek òkup ikeya ìbojeje ikọt inyan̄a ene ya?
15 Ire kubọk gwun̄ Nte enerieen̄,
mè ìre enenwaan̄ ikup,
ìkakaan̄ ofọnti geege ìbotap,
ìkakaan̄ si inorie geege ìborie,
16 ene ge me lek kinyi onenitumu inyi ene ya,
me ukpọk otu ikike,
ibe,
“Riọọn̄ ubọk je!
Ofọnti lek mè inorie otu ikanan owu!”
ire,
ìkatap ubọk geege ìnyi ogwu ene ya,
ìre kpasi oruru okup me lek keya?
17 Ikeya si ke îkup me lek ogwu òbebe ke ọmọ îchieek me lek Awaji,
ire,
ìkakirọ inu Awaji okiweek.
Ichechieek kan̄ ìkwukwu.
18 Ire ene ikitumu ibe,
“Owu ochieek me lek Awaji,
sà emi nkirọ ata irọrọ,”
emi mâfọọk ene ya ibe,
ire ene ìkakirọ ata irọrọ geege,
ìre ebejeje ikọt iriọọn̄ ibe ke ene ya îchieek me lek Awaji?
Mije,
îre sa me lek ata irọrọ n̄a ke ebi ene ebesa iriọọn̄ ibe ke emi nchieek me lek Awaji.
19 Ire owu ochieek ibe ke îre Awaji ge gaalek okup,
owu orọ inwọn.
Ire,
riọọn̄ ibe ke ebi ijo erumun̄ me lek kiban̄ mîchieek si ikeya.
Mije keyi ke ukpook okitet ema,
ema ekekiran.
20 Owu ogwu burubut keyi!
Ìre m̀barọrọ inyi owu òriọọn̄ ibe ke ire ene ichieek me lek Awaji,
mè ìkakirọ ata inu,
ke ichechieek ene ya ìkasibi inu geege?
21 Ìre mije keke ke Awaji ofuk Ebereyam nte kiji kubọk ogwu ata irọrọ?
Ìre ìkafat ìre mije ata ubọk ikwaan̄ kan̄,
eyi mgbọ ìbogwu Ajiki ogwu gwun̄ me inyọn̄ ntook isa igwa ngwugwa inyi Awaji?
22 Ìre òkafat ìmun̄,
me ugwem kè Ebereyam,
ibe ke ichechieek kan̄ mè ata irọrọ kan̄ îgbaan̄ irọ ikwaan̄?
Ata inu eyi Ebereyam orọbe îrọ ichechieek kan̄ ijot.
23 Eya onenirọ iso ikọ egebe me emen Ikpa Mbuban ibe,
“Ebereyam îchieek me lek Awaji.
Awaji osasa me ikeya ifuk ọmọ kubọk ogwu ata irọrọ.”d
Ebi ene esasa si mije keya ikigwen Ebereyam ogwu unene Awaji.
24 Eyiyi îjeen̄ ibe ke ìkare sa me ichechieek gaalek ke Awaji okisa imọnọ ene kubọk ogwu ata irọrọ;
ke Awaji îkisa si ata ubọk ikwaan̄ ene okirọ igbaalek imọnọ ene kubọk ogwu ata irọrọ.
25 Ata ubọk ikwaan̄ ikeyi si ke Awaji osa ifuk Reyabu,
enenwaan̄ òje oyet,
kubọk ogwu ata irọrọ.
Mgbọ ebi enun̄unun̄ ebi Ijeren esibe ibesi ikpọ ama ebi kè Reyabu,
Reyabu obọbọkọ ema itap,
mè ijeen̄ ema ofifi oniin̄ eyi ema esabe ije isibi ifo me esuuk,
mè inwọnọ me ubọk ebi ama ya.
26 Me lek ebilene,
ekwukwu ene isinan̄a isibi itele anam akpalek ene,
ene ya îra ikwu.
Ikeya si,
ichechieek ikakaan̄ge ubọk ikwaan̄ ìre nkwukwu.