Ògbugbuk mun̄ ònan̄a me Uwu Mbuban
47
Ogwu ene ya onenisa emi igwu ikom inu me isotu Uwu Mbuban. Mmumun̄ mun̄ okigbuk inan̄a me irak isotu Uwu Mbuban ikisibi ifo agan̄ mbum-ura, mije, isi Uwu Mbuban ya ìkikpọ agan̄ mbum-ura. Mun̄ ya ìkigbuk inan̄a isibi me irak agba agan̄ ulom Uwu Mbuban ya, òrere agan̄ osiki me lek ntook. 2 Ene ya osasa emi ije itibi otunchit agan̄ inyọn̄ isibi, mè isa emi ikana me oyet inire lek otunchit agan̄ oyet òkikpọ agan̄ mbum-ura. Mmumun̄ mun̄ ya okigbuk isibi me agan̄ ulom, òrere agan̄ osiki.3 Ene ya onenije inin̄ agan̄ mbum-ura, mè ikaan̄ olik itọ-inu me ubọk, mè initọ efit ejit iba mè akọp ejit go, mè inisa emi iwook mun̄ ya, mun̄ ya orere emi ebek ukot. 4 Itọtọ si ofifi efit ejit iba mè akọp ejit go, mè isa emi iwook mun̄ ya, irere emi akpatukot. Ikpọkpọk itọ ofifi efit ejit iba mè akọp ejit go, mè isa emi iwook, irere emi ebon. 5 Inenitọ si ofifi efit ejit iba mè akọp ejit go, ikakana okwaan̄ nkakọtge ìsaba, mije, mun̄ ya îgwuuk enenen ire lek ebegwọgwọk ugwọk me emen. Îkana mun̄ eyi kpêkọtbe isaba. 6 Inenido emi ibe, “Gwun̄ ebilene, ìre omun̄ eyi keyi ni?”
Ineniyaka isa emi igwu ikom iwook ifo otu ijọn̄ agba okwaan̄ ya. 7 Mgbọ nrebe agba okwaan̄ ya, mmumun̄ owuwa owuwa uti me agba okwaan̄ ya agan̄ iba. 8 Inenibe emi, “Mun̄ yi ìkigbuk ifo lek ijọn̄ agan̄ mbum-ura, mè isibi igwook me emen iteke Araba, ere îkilibi isi igwook me okwaan̄ Uchi. Isigwook me okwaan̄ Uchi, mun̄ okwaan̄ ya îra ikana mudim. 9 Ere geelek mun̄ okwaan̄ ya ojebe ire, inu geelek òkakaan̄ ugwem mè ikije me emen mun̄ ya, môluk ugwem. Owuwa owuwa irin̄ môkup me emen, mije, mun̄ yi òkigbuk igwook me ere ya môkpan̄ mun̄ uchi okwaan̄ ya, inyi ikana mudim. Ere geelek mun̄ yi ogbukbe ire, inu geelek môgat ugwem. 10 Ebi mbọm irin̄ mêkikeke me agba lek okwaan̄ Uchi ya. Ere iwele njin môkup ibene me Engedi isi ire En Egalayim. Irin̄, kpa chieen̄ kpa chieen̄, môwa enenen enenen me emen okwaan̄ Uchi, kubọk îwabe me emen okwaan̄ ile Mediterenia. 11 Ire, mun̄ òkup me emen nria mè nsisaan̄ okwaan̄ ya ìkpokana mudim. Ere kecha ìbokup ikeya, inyi uchi ikaan̄ ere ìbokikup. 12 Kpa chieen̄ kpa chieen̄ mfut uti geelek môtibi me agba okwaan̄ ya agan̄ iba. Inwan̄ kiban̄ ìkpobokichiaak, mfut kiban̄ ìkpobokita me inyọn̄. Ema ebekitoto mfut onyan̄ geelek, mije, îre mun̄ ònan̄a me Uwu Mbuban okigbuk ire ema lek. Mfut kiban̄ môre inorie, inwan̄ kiban̄ môre ugwun̄.”
Okike ijọn̄
13 Ogwukaan̄-ene Okumugwem ìtumu ibe ikeyi: “Echichi ìre okike ijọn̄ oboche inyi akọp mè otoko iba ebi Ijeren me ìrot. Josefu môkaan̄ irek iba. 14 Owu môche ìkike inyi ema. Emi m̀bebene ubọk n̄a inyan̄a ibot ibe ke mâsa ijọn̄ yi inyi ebi nte nte kinyi. Eya orọ, ijọn̄ yi ìbokana ìrot kinyi.
15 “Okike ijọn̄ ya ìbore ikeyi:
Okike ijọn̄ me agan̄ inyọn̄ môbene me lek okwaan̄ ile Mediterenia me oniin̄ ekije isi Etilon, mè iraka Lebo Amat isi ire Sedadi, 16 mè Amat, mè Berota mè Siberayim eyi òkup me etete okike ijọn̄ Damasikọs mè Amat, mè isa isi igwook me Aseri Atikon, eyi òkup me okike ijọn̄ Awuran. 17 Okike ijọn̄ ya môbene me lek okwaan̄ ile Mediterenia inyana ire Asari Enon, òrere okike ijọn̄ Damasikọs eyi agan̄ inyọn̄, isi ire okike ijọn̄ Amat me agan̄ inyọn̄. Eyi môre okike ijọn̄ keya me agan̄ inyọn̄.
18 Me agba agan̄ mbum-ura, okike ijọn̄ ya môje me etete Awuran mè Damasikọs ifeen̄ me lek okwaan̄ Jodan me etete Giliadi mè ijọn̄ Ijeren ire lek okwaan̄ Uchia isa isi igwook me Tema.b Eyi môre okike ijọn̄ me agan̄ mbum-ura.
19 Me agba agan̄ osiki, okike ijọn̄ ya môbene me Tema ije inyi osiki isi igwook me lek mun̄ Meriba Kades, mè ifeen̄ ije me lek okolo isi ire lek okwaan̄ ile Mediterenia. Eyi môre okike ijọn̄ me agan̄ osiki.
20 Me agba agan̄ ichep-ura, okwaan̄ ile Mediterenia me otubọk agan̄ osiki obore okike inire ikeke ere òkitat isi ikpọ Lebo Amat. Eyi môre okike ijọn̄ me agan̄ osiki.
21 “Ikeya ke enyi ebeche ijọn̄ yi inyi lek kinyi ikpọ me lek otoko ebi Ijeren. 22 Enyi mêroon̄ nriroon̄ isa idọmọ ijọn̄ kubọk ìrot inyi lek kinyi, mè idọmọ si inyi ebi ichen ìluk me etete kinyi mè ikaan̄ bọn. Enyi mêfuk ema itap me lek bọn owot Ijeren; ema mêgọọk enyi igbaan̄ ikaan̄ ìrot me etete otoko ebi Ijeren. 23 Otoko geelek ogwu ichen geelek olukbe, ere keya ke ebenyi ọmọ ìrot eyi kan̄. Emi Ogwukaan̄-ene Okumugwem ntumu.”