46
“ ‘Ogwukaan̄-ene Okumugwem ìtumu ibe ikeyi: Otunchit oyet egep agan̄ emen òkikpọ agan̄ mbum-ura, ebekigogon otuuk usen gweregwen, òrere usen ebi ene ekirọ ikwaan̄ kiban̄. Ire, Usen Mbuban mè usen ijọk Aya Onyan̄ ke ebekigwuku. 2 Ogwu ibot mkpulu mônan̄a me agan̄ oyet ije itibi ọfọ òkup me agba otunchit, mè ikeke me agba ubọk afọn̄ isotu otunchit ya. Ebi ngwugwa mênenigwa ngwugwa ewọwọp iriọk mè ngwugwa esuuk me ibot kan̄. Ọmọ mônenitọbọ ebum me otu isotu otunchit ya, mè ije isibi. Ire, kpebegon otunchit ya mege ire ikakwun̄. 3 Me Usen Mbuban geelek mè usen ijọk Aya Onyan̄ geelek, ebi ido Ijeren ebekikup me isi Okumugwem me otu isotu otunchit keya itọbọ ebum. 4 Ngwugwa ewọwọp iriọk eyi ogwu ibot mkpulu obokinyi Okumugwem me Usen Mbuban ìre bọn arọọn̄ gweregwen mè orie arọọn̄ ge, otutuuk kiban̄ kpunu ìroon̄ me lek. 5 Ngwugwa akpa òje me lek orie arọọn̄ ya môre ewop ge, sà eyi òboje me lek bọn arọọn̄ cha obore ike înemebe ọmọ inyinyi. Mônyi si iko aran̄ ini ini me lek ogbokot akpa ge ge. 6 Me usen ijọk Aya Onyan̄, ọmọ mônyi gwun̄ orie eriembuuk ge, mè bọn arọọn̄ gweregwen, mè orie arọọn̄ ge, otutuuk kiban̄ kpunu ìroon̄ geege me lek. 7 Mônyi si ngwugwa akpa, ewop ge òje me lek eriembuuk ya, ewop ge me lek arọọn̄ ya, mè inyi ike înemebe ọmọ me lek bọn arọọn̄ cha, mè iko aran̄ ini ini ògọgọọk ogbokot akpa ge ge. 8 Ogwu ibot mkpulu ìbokije itibi ọfọ ya òkup me agba isotu otunchit ya iraka inin̄, mè ikije si me oniin̄ yaage isibi.9 “ ‘Mgbọ ebi Ijeren isinu me isi Okumugwem me mgbọ ijọk ibot acha geelek, ogwu geelek òjeje me otunchit agan̄ inyọn̄ inin̄ isi itọbọ ebum, ìboje me otunchit agan̄ osiki isibi. Ogwu geelek òjeje me otunchit agan̄ osiki inin̄, ìboje me otunchit agan̄ inyọn̄ isibi. Ene geege ìkpogwu ikom isi ije isibi me otunchit îjebe inin̄, ire, ìboje isibi me otunchit òkup me isi kan̄. 10 Ogwu ibot mkpulu môkup me etete kiban̄, igọọk ema inin̄ mgbọ ema ekinin̄, mè igọọk ema isibi mgbọ ema ekisibi.
11 “ ‘Mgbọ ijọk geelek mè mgbọ ijọk ibot acha geelek, ngwugwa akpa ìbokire ogbokot akpa ge me lek orie eriembuuk ge, ogbokot akpa ge me lek orie arọọn̄ ge. Akpa òje me lek bọn arọọn̄ môkire ubọk înemebe ene, mè iko aran̄ ini ini ògọgọọk ogbokot akpa ge ge. 12 Ogwu ibot mkpulu isisa ngwugwa eyi ata ejit ininyi Okumugwem, mè ìre ngwugwa ewọwọp iriọk, mè ìre ngwugwa esuuk, mêgwuku otunchit òkikpọ agan̄ mbum-ura ya inyi. Ọmọ môsisi igwa ngwugwa ewọwọp iriọk, mè ìre ngwugwa esuuk, kubọk îkirọ me Usen Mbuban. Isigwa isan̄a, ọmọ môsisibi. Isisibi, mêgogon otunchit ya.
Ngwugwa usen geelek
13 “ ‘Ewelegwe usen geelek, owu môkisa gwun̄ arọọn̄ ge òsoso acha ge, eyi kpunube ìroon̄ geege me lek, igwa ngwugwa ewọwọp iriọk inyi Okumugwem. 14 Owu môkigwa si ngwugwa akpa igbaalek ewelegwe geelek, irek ge me lek irek gweregwen ogbokot akpa ge, mè inyi iko aran̄ ge mè okpọkọ eyi mêsabe ifuku akpa ekọkọk ya imem. Inyinyi ngwugwa akpa keyi ìre orọmijọn̄ ebekirọrọ ire mgbọ geelek inyi Okumugwem. 15 Ikeyi ke ebekinyi arọọn̄ mè ngwugwa akpa melek aran̄ ewelegwe usen geelek, inyi mêkisa igwa ngwugwa ewọwọp iriọk mgbọ geelek.
Ubọk ogwu ibot mkpulu obokiche ìrot ijọn̄
16 “ ‘Ogwukaan̄-ene Okumugwem ìtumu ibe ikeyi: Ire ogwu ibot mkpulu iche uche ijọn̄ ònan̄a me lek ìrot kan̄ inyi ene ge me lek ebi bọn, uche keya ìbokup inyi bọn kè ogwugwa me ìrot. 17 Ire, ire ogwu ibot mkpulu iche uche me lek ìrot kan̄ isa inyi ene ge me lek ebi usun̄ kan̄, ogwu usun̄ ya ìbotet uche ya ikaan̄ mege inire acha ijọk utelelek gaalek, ìrot ya môneniyaka ikana igọọk ogwu ibot mkpulu. Mije, ìrot ogwu ibot mkpulu ìkup inyi bọn kan̄ gaalek, îre eyi kiban̄. 18 Ogwu ibot mkpulu ìkpobọkọ ebi ene ìrot eyi kiban̄, mè ìsa me ikeya ìtutuku ema, mè ìlap ema ìsan̄a me lek ijọn̄ ìrot kiban̄. Ijọn̄ eyi kan̄ ke ìbosa inyi bọn kan̄ me ìrot, inyi ebi n̄a ekayiyala ìnan̄a ìtele ijọn̄ kiban̄.’ ”
Uwu item inu me Uwu Mbuban
19 Ogwu ene ya onenisa emi itibi me oniin̄ òkup me agba otunchit initap me agwut mbuban cha òkup inyi ebi ngwugwa, echi òkikpọ agan̄ inyọn̄. Me ere ya, mmumun̄ ere ge okupbe me okputut kan̄ me agan̄ ichep-ura. 20 Inenitumu inyi emi ibe, “Ere keyi ke ebi ngwugwa ebekitem inorie ngwugwa awọ mè echi ngwugwa ijo inu mè iwọp ngwugwa akpa, inyi ema ekaben ìsa ìnin̄ oyet egep agan̄ oyet, mè ìsa me ikeya ìrọ inyi ebi ene ekup me mbuban.”
21 Iyayaka isa emi isibi inu me oyet egep agan̄ oyet, mè isa emi ije ikana otu utọn̄ ini oyet egep ya. Mmumun̄ ofifi oyet egep me agba otu utọn̄ ini cha ge ge. 22 Me otu utọn̄ ini echi oyet egep agan̄ oyet ya ge ge, ofifi oyet egep enamabe uwu ikana okokop òwa; ujọn̄ọ kan̄ ge ge ìre akọp ejit, sà uwele kan̄ ore ejit jaaba mè agbagba otubọk gweregwen. Otutuuk oyet egep òkup me otu utọn̄ cha ìre ìkike ìkike. 23 Agọm esabe ewuuk inama ìkakat ikana emen oyet egep ini cha, mè ikaan̄ ere isọk ukan̄ enamabe ikat ikana me irak agọm cha. 24 Inenitumu inyi emi ibe, “Echichi ìre uwu item inu ere ebi ikwaan̄ Uwu Mbuban ebekitem inu ngwugwa ebi ene esabe inu.”