Danien ìre ene ge me etete ebi Juda, ebi ebi Babilọn ekpulube me usun̄ akọn̄ isa ifo Babilọn, me mgbọ ebọkọbe ama Jeruselem.

Ubọk geelek ikpa Danien okupbe me etete ikpa ebi nriran, ikpa Danien ìkakaan̄ etip echi Okumugwem okilook ebi kan̄, kubọk ofifi ikpa ebi nriran okaan̄be. Ubọk geelek si îkaan̄be sọnja mfufuk me emen, ìkarere si ikpa mfufuk ìsan̄a, kubọk ikpa Ebi Ubọọn̄ eyi adasi mè eyi òso iba orebe. Ire, ikpa yi ìkisa me mun̄umun̄ ilaak, mè ilaak ọkpọchieen̄, mè inu ijejeen̄, mè inu òkikeke inyi ofifi inu, mè otu ifuk (kubọk, “jaaba”), ikijeen̄ ubọk mfufuk linyọn̄ okije ifo okputut, òrere òta mgbọ, mè ikijeen̄ inu Awaji otọtbe isun̄ iban linyọn̄ keyi.

Ikpa yi ìkup irek iba. Adasi irek (ibot 1-6), ìre mfufuk ike ebi unene ita kè Danien, ebi melek kan̄ enan̄abe me Juda, ekanabe ebi ibot ikwaan̄ me Babilọn, mè isa me otutuuk ejit kiban̄ ichieek mkpa ikeke inye me lek Awaji ebi Ijeren, ikerere ibe ke ugwem kiban̄ ìbojeje me lek. Me ere yi si, Danien îsi ikwaan̄ inyi ebi mkpulu ebi Midia mè Pesia, me mgbọ ife chi etimbe akọn̄ ikpan̄ ebi Babilọn. Òso irek iba (ibot 7-12), ìre owuwa ilaak ọkpọchieen̄ echi Danien omun̄be, echi ebi osat Awaji ekikpa ibot ijeen̄ ọmọ.

Ikpa Danien ìkijeen̄ ibe ke îre Awaji okup me ibot inu geelek ògbaan̄ me lek ebilene, ke îre ọmọ okito ido geelek me mkpulu, mè òtele si ibe ofifi ido initim ikpan̄ ema si. Ìkijeen̄ si ibe ke Awaji îkikpọ chieen̄ me lek ogwu ebilene geelek òkeke inye me lek kan̄, mè igbe utoon̄ ejit. Îjeen̄ si ibe, usen ge usen ge, ke Awaji môsibi unen oyerebet me linyọn̄, mè inyi ebi kan̄ ntim-mkpan̄.

Inu ge òsibi esese me emen ikpa yi ìre owuwa ilaak ọkpọchieen̄ echi Danien omun̄be òfo me lek mgbọ ònu me isi, echi òkijeen̄ otitọt Awaji otọtbe òfo me lek òta mgbọ (ibot 8-12), mè ijeen̄ si ikọ Awaji otumube ofolek inunu Ogwu Awaji Otọkọbe Aran̄ me Ibot ya, òrere Okaan̄-ene, Jisọs Karais. Eyi îrọ ibe ikpa yi ikup me otu ifuk ikpa òkichili òta mgbọ ibook.