2 “Ase môkaan̄ okpọkọ ge. Ijọn̄ kan̄ ìbobene me otubọk ijọn̄ kè Dan, bene me agan̄ mbum-ura si re agan̄ ichep-ura.

3 “Nafitali môkaan̄ okpọkọ ge. Ijọn̄ kan̄ ìbobene me otubọk ijọn̄ kè Ase, bene me agan̄ mbum-ura si re agan̄ ichep-ura.

4 “Manasi môkaan̄ okpọkọ ge. Ijọn̄ kan̄ ìbobene me otubọk ijọn̄ kè Nafitali, bene me agan̄ mbum-ura si re agan̄ ichep-ura.

5 “Iferem môkaan̄ okpọkọ ge. Ijọn̄ kan̄ ìbobene me otubọk ijọn̄ kè Manasi, ibene me mbum-ura isi ire ichep-ura.

6 “Ruben môkaan̄ okpọkọ ge. Ijọn̄ kan̄ ìbobene me otubọk ijọn̄ kè Iferem, bene me agan̄ mbum-ura si re agan̄ ichep-ura.

7 “Juda môkaan̄ okpọkọ ge. Ijọn̄ kan̄ ìbobene me otubọk ijọn̄ kè Ruben, bene me agan̄ mbum-ura si re agan̄ ichep-ura.

8 “Me otubọk ijọn̄ kè Juda, bene me agba agan̄ mbum-ura si re agba agan̄ ichep-ura, môre okpọkọ ijọn̄ mêsan̄abe isun̄ ọkpọkpọ. Uwele kan̄ môre obop ejit gweregwen mè efit ejit iba mè akọp ejit go; ujọn̄ọ kan̄, bene me agan̄ mbum-ura si re ichep-ura, môre ìkike me lek okpọkọ enyibe otoko ge ge. Uwu Mbuban ìbokup me eden̄ kan̄.

9 “Okpọkọ ya mêsan̄abe isun̄ ọkpọkpọ inyi Okumugwem ìbore obop ejit gweregwen mè efit ejit iba mè akọp ejit go me ujọn̄ọ, mè obop ejit iba mè efit ejit go me uwele. 10 Eyiyi môre okpọkọ òkup me mbuban òbokup inyi ebi ngwugwa. Ujọn̄ọ kan̄ me agan̄ inyọn̄ môre obop ejit gweregwen mè efit ejit iba mè akọp ejit go, uwele kan̄ me agan̄ mbum-ura môre obop ejit iba mè efit ejit go, uwele kan̄ me agan̄ ichep-ura môre obop ejit iba mè efit ejit go, ujọn̄ọ kan̄ me agan̄ osiki mônenire obop ejit gweregwen mè efit ejit iba mè akọp ejit go. Uwu Mbuban Okumugwem ìbokup me eden̄ kan̄. 11 Eyi ìbokup inyi ebi ngwugwa ebi efakabe ikwaan̄ itap me ubọk, ebi owot iman kè Jadọk, ebi ìkekeke inye me lek ikwaan̄ n̄a, kpeje ilọ oniin̄ kubọk ebi otoko kè Libai kechilọ erọbe mgbọ ebi Ijeren ejebe ilọ oniin̄. 12 Okike ijọn̄ keyi ìbore ijọn̄ esan̄abe isun̄ ọkpọkpọ inyi ema me lek ijọn̄ òkup mbuban ichit, me otubọk ijọn̄ ebi otoko kè Libai.

13 “Ebi otoko kè Libai ebekaan̄ okpọkọ ijọn̄ eyi kiban̄ me agba lek ijọn̄ ebi ngwugwa. Ijọn̄ ebi otoko kè Libai môre obop ejit gweregwen mè efit ejit iba mè akọp ejit go me ujọn̄ọ, mè obop ejit iba mè efit ejit go me uwele. Otutuuk ujọn̄ọ kan̄ môre obop ejit gweregwen mè efit ejit iba mè akọp ejit go, sà uwele kan̄ obore obop ejit iba mè efit ejit go. 14 Ema ekanyam okpọkọ geege me lek, ekanwenwene si. Okpọkọ ijọn̄ keyi ojaan̄ ichit. Ikaninin̄ si ubọk ebi ofifi ife geege, mije, ìkup me mbuban inyi Okumugwem.

15 “Ojijeek ijọn̄ òsisik, òrere efit ejit iba mè akọp ejit go me uwele, mè obop ejit gweregwen mè efit ejit iba mè akọp ejit go me ujọn̄ọ, ìkare ere òkup mbuban, ìbokup inyi ama isasa inama uwu mè isasa ikikpukpo anam. Ama ìbokup me eden̄ kan̄. 16 Ujọn̄ọ mè uwele ama ya ìre ikeyi: Obop ejit mè efit ejit mè akọp ejit iba mè ejit go me agan̄ inyọn̄, obop ejit mè efit ejit mè akọp ejit iba mè ejit go me agan̄ osiki, obop ejit mè efit ejit mè akọp ejit iba mè ejit go me agan̄ mbum-ura, mè obop ejit mè efit ejit mè akọp ejit iba mè ejit go me agan̄ ichep-ura. 17 Ijọn̄ urie anam me ama ya môre akọp ejit gweregwen mè ejit iba mè okpọkọ me agan̄ inyọn̄, mè akọp ejit gweregwen mè ejit iba mè okpọkọ me agan̄ osiki, mè akọp ejit gweregwen mè ejit iba mè okpọkọ me agan̄ mbum-ura, mè akọp ejit gweregwen mè ejit iba mè okpọkọ me agan̄ ichep-ura. 18 Ujọn̄ọ ere òsisik, eyi ògbaan̄ me lek okike ijọn̄ mbuban ìre obop ejit iba mè efit ejit go me agan̄ mbum-ura, mè obop ejit iba mè efit ejit go me agan̄ ichep-ura. Ere keyi obokisibi inorie inyi otutuuk ebi ìkirọ ikwaan̄ me emen ama. 19 Ebi ìkirọ ikwaan̄ me emen ama, ebi ìbekiwop inu me lek ijọn̄ ya, ebere ebi ìnan̄a me otutuuk otoko ebi Ijeren. 20 Otutuuk ere enyi mêsan̄abe isun̄ esese inyi ere òkup mbuban melek ijọn̄ ebi ama ìbore ìkike me agan̄ ini, obop ejit gweregwen mè efit ejit iba mè akọp ejit go me agan̄ ge, mè obop ejit gweregwen mè efit ejit iba mè akọp ejit go me agan̄ keyilọ.

21 “Ijọn̄ eyi òsisik me agba agan̄ iba cha, òrere agan̄ ere òkup mbuban melek agan̄ ijọn̄ ebi ama, ìbokup inyi ogwu ibot mkpulu. Ijọn̄ keya môbene me otubọk obop ejit gweregwen mè efit ejit iba mè akọp ejit go eyi agan̄ mbum-ura, me lek okike ijọn̄ òkup mbuban, isi ita me okike ijọn̄ agan̄ mbum-ura, mè ibene me otubọk obop ejit gweregwen mè efit ejit iba mè akọp ejit go eyi agan̄ ichep-ura, isi ita me okike ijọn̄ agan̄ ichep-ura, me agba lek okpọkọ enyibe me otoko me otoko; eyi môkup inyi ogwu ibot mkpulu. Ijọn̄ òkup mbuban melek ere mbuban Uwu Mbuban môkup me eden̄ ere ya. 22 Ijọn̄ ebi otoko kè Libai melek ijọn̄ ama mêkup me eden̄ okike ijọn̄ ogwu ibot mkpulu. Okike ijọn̄ ogwu ibot mkpulu môkup me etete okike ijọn̄ ebi otoko kè Juda mè okike eyi ebi otoko kè Benjamin.

23 “Me lek otoko echi òsisik: Ebi otoko kè Benjamin mêkaan̄ okpọkọ ijọn̄ ge. Ijọn̄ kiban̄ ìbobene me agan̄ mbum-ura isi ire agan̄ ichep-ura.

24 “Ebi otoko kè Simiọn mêkaan̄ okpọkọ ge. Ijọn̄ kiban̄ ìbobene me otubọk ijọn̄ ebi otoko kè Benjamin, bene me agan̄ mbum-ura si re agan̄ ichep-ura.

25 “Ebi otoko kè Isaka mêkaan̄ okpọkọ ge. Ijọn̄ kiban̄ ìbobene me otubọk ijọn̄ ebi otoko kè Simiọn, bene me agan̄ mbum-ura si re agan̄ ichep-ura.

26 “Ebi otoko kè Jebulọn mêkaan̄ okpọkọ ge. Ijọn̄ kiban̄ ìbobene me otubọk ijọn̄ ebi otoko kè Isaka, bene me agan̄ mbum-ura si re agan̄ ichep-ura.

27 “Ebi otoko kè Gadi mêkaan̄ okpọkọ ge. Ijọn̄ kiban̄ ìbobene me otubọk ijọn̄ ebi otoko kè Jebulọn, bene me agan̄ mbum-ura si re agan̄ ichep-ura.

28 “Okike ijọn̄ kè Gadi me agan̄ osiki môje inyi osiki, ibene me Tema isi igwook me lek mun̄ Meriba Kades, mè ifeen̄ me lek okolo Ijipiti isi ire lek okwaan̄ ile Mediterenia.

29 “Eyiyi ore ijọn̄ ya enyi mêroon̄be nriroon̄ isa idọmọ inyi otutuuk otoko ebi Ijeren me ìrot. Ijọn̄ cha, igọọk me ike enyi mêtọbe, obore ìrot kiban̄ me otoko me otoko. Emi Ogwukaan̄-ene Okumugwem ntumu.”

30 “Oniin̄ ebekisa ije isibi me emen ama ìbore ikechi: Ibene me agan̄ inyọn̄, eyi òrere obop ejit mè efit ejit mè akọp ejit iba mè ejit go me ujọn̄ọ, 31 mêsa erieen̄ otoko ebi Ijeren igwen otunchit cha. Otunchit ita agan̄ inyọn̄: ge ìbore otunchit kè Ruben; ge, otunchit kè Juda; ge, otunchit kè Libai.

32 “Me agba agan̄ mbum-ura, òrere obop ejit mè efit ejit mè akọp ejit iba mè ejit go me ujọn̄ọ, otunchit ita obokup: ge, otunchit kè Josefu; ge, otunchit kè Benjamin; ge, otunchit kè Dan.

33 “Me agan̄ osiki, òrere obop ejit mè efit ejit mè akọp ejit iba mè ejit go me ujọn̄ọ, otunchit ita obokup: ge, otunchit kè Simiọn; ge, otunchit kè Isaka; ge, otunchit kè Jebulọn.

34 “Me agan̄ ichep-ura, òrere obop ejit mè efit ejit mè akọp ejit iba mè ejit go me ujọn̄ọ, otunchit ita obokup: ge, otunchit kè Gadi; ge, otunchit kè Ase; ge, otunchit kè Nafitali.

35 “Otutuuk ujọn̄ọ ikat ikana agba ini eyi ama ya ìsibi obop ejit ini mè efit ejit go.

“Erieen̄ ama ya, bene me mgbọ ya fo isi, ìre: OKUMUGWEM ME ERE YA.”