4 “Mị ụrol li ạaweleghian loor ogiga ạmi rạkelom ghan ẹelha ạmi. 5 Kụ ọlo mị ụmalha ni mạlha dị aḍigh ruugu, mị ạmiin uḍien rạraar aḍiigu mem dị mị rạnaani. 6 Kụ mị ạto mọ oomo abutomoghiom ọdaam mọ ọrol bọ Bạbilon oru kꞌạmi pịdi ụḅeni ịmi ẹmhu ạmalha phọ. 7 Kụ oomo ạbuo ịmiin phọ, ạbuo ịiḍaany, abuukia awe rꞌạbudi ọtuugha ịlo ạraanaan okuaḍio oruughi kụ mị ạghaaph mạlha phọ ạmi ạḅeni, kụ bịdi útue ụ́gba ẹmhu phọ. 8 Kụ ạDaniel aru asi (nyọdi phọ okol kẹn ni mọ ạBeltesazar, ọdaphan ḍien ẹmugh phọ ạmi). Uwaloor ạruukpaany iigbia aḍigh loor ọdi, kụ mị ạḅeni nyọdi ịpe mị ạmalha bọ. Mị ụḅeni nyọdi: 9 Bẹltesazar, ọkar ogbogh ạbuo ịmiin, mị alegheri ni mọ uwaloor ạrumugh iigbia phọ eḍigh loor ạna, ḅịle kẹn nạ ạnaghanan ni oomo ạraraar ịbooghian. Phọn kụ ạmalha phọ ạmi. Gbạ ẹmhu phọ ụḅeni ịmi.

10 “Mem dị mị rạnaani, mị ụmalha ạmiin oboom oreeny sịphe ogbo ade phọ. 11 Oreeny phọ aphoph kụ ạbugh tụtu akara okuaḍio dị tọrobo oye sịen aḅirini phọ kạmiin. 12 Ạrinya phọ ịnighe ni agey, ḅịle amuum ni kꞌoḍoom kꞌude — iimuma dị ẹkasian oomo aḅirini phọ olhe. Ilhom ịnam iphooghian ghan eeḍian phọ ọdi, ịnun edoghoḍi ruutu sịphe ịla phọ, kụ tọrobo ịyaar dị repooghu ni ilhe ghan ni iimuma phọ ọdi.

13 “Mị odi rạatughian ghan uḍien phọ bịn mị ạmiin ọokpaany kꞌẸnaan dị ạḍua kꞌạke rasoor, aakolobian kụ ragon. 14 Ọdi agbeelom eboom ẹḍogh, ‘Isoph oreeny phọ elher, eegbo ịla phọ, ẹmaaphogh rịnya phọ, ẹḅile ẹwalalami iimuma phọ. Iporogh ịnam mọ sịphe eeḍian phọ ḅịle rꞌịnun phọ ẹpe ịla phọ. 15 Kụ ọlo ịbile egisi phọ sịphe ade phọ kụ ẹkpooghi eebin izime okuron rꞌenaba ekoom. Ịbile sịphe ạroogho ạsi bọ akitonom.

“‘Nyịidipho ịbile ooto asoorom oye phọ ọphon, ḅịle ọdi arughan rꞌịnam ḅịle rꞌireeny. 16 Esi oḍual ạsia ọdi kạ́moogh ologhi oye, kạmoogh ologhi ẹnam. 17 Ịphen kụ ịdi ạruukpaany kꞌẸnaan phọ ookolobian bọ kụ ogon ghan bọ ọḅem. Loor ịphen phọ, oomo awe tọrobo ekpisi ọmaar olegheri mọ Ọkaraghi Egbogh Ẹnaan phọ kụ ịmoogh ịikpo ẹda reelhe awe kụ ketue ni ẹngo tọrobo oye lọ ọdi ạsaḅar — ghạlamo ọkaraghi oghiil oye.’

18 “Phọn kụ ạmalha phọ mị ạmalha bọ,” ạNebukadnezar ọdaam eelhe phọ ạḅem. “Nyịidipho, Bẹltesazar, gbạ mạlha phọ ụḅeni ịmi ẹmhu phọ. Rꞌoniin ọnyo otomoghiom ọdaam mọ órue ụ́ḅeni ịmi, kụ ọlo nạ katue ni loor esi dị uwaloor ạruukpaany iigbia phọ eḍigh loor ạna.”

19 Sịen kụ ẹdi ạDaniel ọpo ọta bọ mọ ạBeltesazar akperenom kụ rꞌịyaar órue ọḅem ịyaar. Ọdaam mọ ạḅeni nyọdi, “Bẹltesazar, kámeera ạmalha phọ rꞌịpe ẹghaaph bọ ẹeḅaghami nyịna.”

ẠBeltesazar ạphagharanaan, “Ogbogh ọdaam, mị ạḅem mọ ạmalha phọ rꞌẹmhu phọ ẹmoogh mạar oḍighinom bụmulogh-ḍien ạna, kíḍighi nyịna. 20 Oreeny phọ ọpo aphoph bọ akara okuaḍio phọ, kụ ọdi tọrobo oye sịen aḅirini phọ katue bọ ni ạmiin. 21 Ạrinya phọ ẹmaar bọ ẹnighe. Ạḅile ạmoogh iimuma dị ketue ni ẹperemi oomo aḅirini phọ. Ilhom ịnam ịmina ghan eeḍian ọdi, ḅịle ịnun edoghoḍi ruutu ẹpe ịla phọ.

22 “Ogbogh ọdaam, nạ kụ oreeny phọ ọpo aphoph bọ kụ ạmoogh bọ ịnyaam mọ. Nạ maphoph akara okuaḍio phọ, kụ ịikpo ạna aleeny oomo aḅirini phọ. 23 Ịdipho nạ ọdaam mọ odi bọ rapogh, ọokpaany kꞌẸnaan ạḍua ni kꞌạke asoor kụ ạḅem mọ, ‘Iler oreeny phọ eegulemi, kụ ọlo ịbile egisi phọ sịphe ade phọ. Ịkpooghi eebin izime rꞌokuron enaba eeghironom bịn ẹwile esi dị ạroogho asi akitonom. Ịbile ooto phọ asoorom ghan oye phọ ọphon kụ ạwile ọdi ạrolan sịphe rꞌịnam mọ oḍual ạsia.’

24 “Phẹn kụ ẹmhu phọ, Ogbogh Ọdaam. Ịphen kụ ịdi Ọkaraghi Egbogh Ẹnaan phọ mạghaaph amitiom mọ kemitenaan nyịna. 25 Kophorogh ni nyịna ọsighe eghoroghan awe kụ nạ atughan rꞌilhom ịnam. Esi oḍual ạsia nạ kạtaal ghan rọogho ịdipho ạnam, kụ ạmina ghan ephoghoghoony, esi dị ooto kasoorom ghan nyịna. Kụ nạ agbi omeeraam mọ Ọkaraghi Egbogh Ẹnaan phọ kụ repogh oomo ạramar awe, kụ mọ ọdi katue ni ạngo bịdi tọrobo oye lọ ọdi ạsaḅar. 26 Ạruukpaany kꞌẸnaan phọ ụto ni mọ ọwile egisi phọ sịphe ade phọ. Ịduon phọ pọ rẹḅem ghan mọ nạ kạḅile aḍighi ọdaam mem dị nạ aloghoma mọ Ẹnaan kụ ịda oomo aḅirini phọ. 27 Kụ iḍighi kụ nạ ogbogh ọdaam, dạph oroma phọ ạmi. Bịle oḍighi yogh ịkaraph. Ḍighi ghan ịlo ẹnighe kụ ạnma ighirigiir rukulom, bịn nạ agbi nụun ọmoogh edughom ọghiom ghisigh.”

28 Oomo phọ ịphen phọ imitenaan ni Nẹbukadnezar ọdaam eelhe phọ. 29 Ḍioph rꞌịyal ụnwanyu bịn kụ iten, kụ ọdi ạmaar ratelhe yogh ạnyu otu ogiga ọdi ẹpe Bạbilon, 30 ọdi ạḅem, “Ịmiin ịdi ạBabilon aleeny! Mị kụ ụlogh mọ eḍighi ẹkpana ẹmha ạmi eḍeenaan ịikpo phọ ạmi ḅịle rꞌịnyaam, eghuan phọ ạmi ḅịle rꞌịtooghi ogbogh ọdaam.”

31 Ikpo ọnhu phọ ke̋mite ọnhu ọdi kụ ẹḍogh ẹḍua ẹpe kꞌạke kụ ẹḅem, “Ọdaam ạNebukadnezar, nạghan ịphen mị kạḅem bọ. Mọsighe ịikpo ọdaam mọ ḍịghaagh ạna. 32 Kophorogh ni nyịna ọgbole eghoroghan awe. Tọlan rꞌilhom ịnam kụ ạraal rọogho ịdipho ẹnam adool esi oḍual ạsia. Kụ nạ agbi ologhoma mọ Ọkar Egbogh Ẹnaan phọ kụ repogh oomo ạramar awe, kụ mọ ọdi katue ni ạngo bịdi tọrobo oye lọ ọdi ạsaḅar.”

33 Ikpo ọnhu phọ imite ni mem mem mọ. Uphorogh ni Nẹbukadnezar ọgbole eghoroghan awe kụ ạraal ghan rọogho ịdipho ạnam. Ooto phọ asoorom ghan loor phọ ọdi, kụ ạsilaal ẹmhu ọdi ẹdoony yogh mụdi asuphuugh aruga kụ araphaaph ọdi ẹdoony mụdi ịlo ịnun.

34 “Mem dị oḍual ạsia phọ meten,” ọdaam mọ ạḅem mọ, “Mị uphogh ni okuaḍio phọ, kụ aloghoma loor. Mị agbi oboom Ọkaraghi Egbogh Ẹnaan phọ rꞌọngo ghan rughuenian rꞌigbogh nyọpo odi ghan bọ kꞌagee-pọ.

36 “Mem mọ ịitughian phọ ạmi eḅula bọ, arughuenian phọ ạmi, igbogh phọ ạmi rꞌeegu ọmar phọ ạmi uḅulemi ni ụngo ịmi. Awe iiḍighi ạmi rꞌabugbogh awe ạmi ughuraam ni ịmi kụ oḅulemi ịtooghi ọdaam mọ ụngo ịmi opumom egbogh eghuan dị epu ẹḅel phọ.

37 “Kụ nyịidipho mị ạNebukadnezar aboomi, akueni, ạḅile aaseeny Ọdaam kꞌạke phọ. Tọrobo ịyaar lọ ọdi aḍighi pọ elhiom ni ẹḅile eseleman. Ọdi kụ ạmoogh ịikpo osooromi oye lọ aphoophe loor.”