ẠNebukadnezar ạto mọ tọrobo oye aaseeny igbudu dị ọkaam gol
3
ẠNebukadnezar ọdaam eelhe phọ ạto we mọ ọka igbudu agol, ịyaldi rꞌoḍual akuḅu ḍiphoph ḅịle ẹnum kụ isugha ọman ịraar akuḅu ẹreghe, kụ ọmeremi ẹpe Dura de phọ eeleeny bọ ẹpe eelhe phọ ạBabilon. 2 Kụ ọdaam eelhe phọ ạto ạngo mọ oomo ạbuo iiḍighi ọno ọghiighi ẹpe phọ ookpomoghan — ịkpana ạnmuny ọdaam mọ, abuḍiemiom mọ, ạbuphe ropogh ghan bọ reelhe phọ rꞌạbudi otum, awe ịtooghi, ạbupamam ikpoki, abugbogh rꞌạbubam abuugboom ịiruen rꞌoomo ạbuo iiḍighi areelhe phọ — ịlo ọosa ooseeny igbudu phọ ạNebukadnezar ọdaam eelhe phọ mạmeremi bọ. 3 Mem dị oomo ạbuo iiḍighi phọ ạbuen phọ mookpomoghan ọosa ooseeny igbudu phọ kụ ọmeregha risigh igbudu phọ, 4 ogbeelom ogele ạlho ni rꞌeboom ẹḍogh, “We oomo areelhe, we ịdo kịrokiro eḍighinom ạraraar rꞌịnhu, 5 nyina kẹnaghan dị aruuḍue phọ ẹḅa rꞌiitia aruukuo phọ rꞌọdo kịrokiro ẹḍogh ạraraar ephegh phọ ẹdaphan kụ ephegh emiigh, tọrobo ọnyo anyina kazumeri ẹmhu ude ạngo rughuenian igbudu agol phọ ạNebukadnezar ọdaam eelhe phọ mạka bọ ạmeremi. 6 Ọlo ẹmhu ude úzumeri ọngo arughuenian phọ kosiph nyọdi mem mem mọ kụ osumeeny ooni ạnian dị reemor.” 7 Loor esi ịduon phọ, bịdi rọnaghan bọ ẹḍogh ạraraar ephegh phọ, awe oomo areelhe rꞌịdo kịrokiro eḍighinom ạraraar rꞌịnhu ozumeri rụmhu ude kụ ooseeny igbudu agol phọ ạNebukadnezar ọdaam-ẹmha phọ mạka bọ ạmeremi.Ọgbaanaan ịraar ạrighiri ạDaniel mọ ọḅaar ẹmhu
8 Pọ kụ amem dị buniin ạbuo ạBabilon ọmoogh ọgel ọgbaaghiom ạbuo aJu phọ. 9 Bịdi ụḅeni ni Nẹbukadnezar ọdaam mọ mọ: “Eḍighi ịdi ọdaam mọ kạtol kꞌagee-pọ! 10 Ọdaam mọ mạto ạḅem mọ mem lọ ephegh phọ remiigh bịn, tọrobo oye kazumeri ghan ẹmhu ude kụ aaseeny igbudu agol phọ, 11 kụ ọlo úzumeri ẹmhu ude ooseeny kosiph kụ osumeeny ooni ạnian dị reemor. 12 Abuniin awe aJu odi ni dị nạ ạma ọdaami eelhe ạBabilon — ạSadrak, Mẹsak rꞌAbed Nego — dị rọḅaar ẹmhu esi ịto ọdaam mọ. Bịdi ẹmugh phọ ạna úuseeny, ḅịle úzumeri ẹmhu ude ọngo arughuenian igbudu phọ nạ ạka bọ ạmeremi.”
13 Iphin ni ologhi ọdaam mọ iboom ọnaghan ịphen phọ kụ ọdi ạto mọ ọsighe ịraar phọ awe phọ oruomonaan risigh ọno. 14 Ọdi ạḅeni bịdi mọ, “Sạdrak, Mẹsak rꞌAbed Nego, ọkar agey ni nyina ímeera ooseeny ẹmugh phọ ạmi rꞌozumeri ẹmhu ude oghueni igbudu agol phọ mị ạka bọ ạmeremi ḍụghum? 15 Nyịidipho, mem lọ nyina rẹnaghan dị aruuḍue phọ ẹḅa rꞌiitia aruukuo phọ rꞌọdo kịrokiro ẹḍogh ạraraar ephegh phọ, izumeri ẹmhu ude ẹngo rughuenian igbudu phọ. Eḍighi ịyaar lọ nyina ímeera, pọ kisiph inyina mem mem mọ kụ osumeeny ooni ạnian dị reemor. Nyina regbi mọ ẹmugh edi ni dị ketue ịphel inyina ḍụghum?”
16 ẠSadrak, Mẹsak rꞌAbed Nego ọphagharanaan, “Nạ ogbogh ọdaam, yoor kọ́ki ọgba ọphela asiloor. 17 Eḍighi ịyaar dị Ẹnaan phọ yoor rokumu bọ ketue ni ịphel iyoor sịphe ooni ạnian phọ dị reemor rꞌesi ịnyaam mọ ạna, pọ ọdi kạpel li. 18 Kụ ghạlamo ọdi órue ni, pọ nạ ọdaam mọ legheri akuphom owol mọ yoor kóoseeny ẹmugh phọ ạna ḅịle yoor kózumeri ẹmhu ọngo arughuenian igbudu phọ nạ mạka bọ ạmeremi.”
Osoph ịiruen aḍuugh ophume ịraar phọ ạrighiri phọ ạDaniel
19 Kụ elu ạNebukadnezar eḅomaan, aghisigh phọ akitonu rạtogh loor ọghagh ologhi esi ạSadrak, Mẹsak rꞌAbed Nego. Kụ ọdi ạḅeni we phọ ọdi mọ ọghologholomi nịan phọ oḍual amem opuemi ḍịphe rẹkologhol ghan bọ. 20 Kụ ọdi ạto ạḅeni bụdi ọkar ọmoogh ịnyaam sịphe awe ẹgham mọ ọno mọ ọphaḍi ịraar awe phọ osumeeny ooni ạnian phọ dị reemor. 21 Kụ bịdi ọphaḍi we phọ dị ọmaar oonmenemi — itekpelhe, ạrusuoma ḅịle rꞌaroghoony, oomo phọ ịne — kụ oroph bịdi osumeeny ooni ạnian phọ reemor bọ. 22 Nyịidipho, loor esi dị ọdaam mọ mạngo ịto dị ẹkpar mọ ọkar ọghologholomi ooni ạnian phọ, asinem ạnian phọ ịsuughi bukoriom mọ ọsighe bọ we phọ ọghi osumeeny ooni ạnian phọ. 23 Kụ ạSadrak, Mẹsak rꞌAbed Nego omeel osuma ooni ạnian phọ reemor bọ, ịduon phọ ọphaḍi bọ ni bịdi.
24 Ekperenom bịn kụ ạNebukadnezar apel ạmeera amaghagha. Ọdi apuru ni we iiḍighi phọ ọdi mọ, “Yira ḍịen ụ́paḍi ịraar awe úsumeeny sịphe ooni ạnian phọ reemor bọ?”
Kụ bịdi omeera mọ, “Ii, usumeeny ni, ogbogh ọdaam.”
25 Ọdi apuru, “Uḍighi ika nụun kụ mị rạmiin bọ inya awe dị rotelhe sịphe ologhi ạnian phọ? Ụ́koroghi mun bịdi ḅịle kẹn elegh ílho dị eḍeenaan mọ ạnian phọ rẹnuemi ni bịdi — kụ ọpo amuneniom bọ inya phọ ạkigh mọony ẹmugh.”
Omitiom ịraar phọ awe phọ kụ ọḅile opophe
26 Esi ịduon phọ kụ ẹdi ạNebukadnezar ạghi esi dị etuman ọnhu-aḍibuo ooni ạnian phọ reemor bọ kụ ạmagh mọ, “Sạdrak! Mẹsak! Abed Nego! Butelhedom Ọkaraghi Egbogh Ẹnaan phọ, ipunughu!” Kụ bịdi ophunughu egina amem. 27 Kụ oomo phọ ịkpana ạnmuny ọdaam mọ, abuḍiemiom mọ, ạbuphe ropogh ghan bọ reelhe phọ rꞌạbudi otum, rꞌạbuo iiḍighi ọdaam mọ ookpomoghan ọmiin ịraar phọ awe phọ bụen ạnian phọ ítue bọ ịnuemi. Sịlaal ẹmhu ạbidi ḅịle rụsuoma ạbidi ạnian ị́ḅogh kụ eḍu ạmughi ị́tol loor ạbidi.
28 Kụ ọdaam mọ ạḅem mọ, “Iboom Ẹnaan phọ ạSadrak, Mẹsak rꞌAbed Nego! Ọdi arom ọokpaany ọdi kụ aru ạtagharan we phọ ạbuen rokumu bọ ọḅile oḍuom ologhi nyọdi. Bịdi ọḅaar ẹmhu esi ịto ạmi kụ oseere ghuḍum ạbidi eten aḍuugh kpạripe rꞌozumeri ẹmhu ude ooseeny ẹnon ẹdo ẹmugh emuton nyẹpe ạbidi.
29 “Kụ nyịidipho mị ạto mọ eḍighi ịyaar dị oye ạtorobo eelhe, eḍighinom ịyaar mꞌọnhu ạḍiaḅa, kụ ạghaaph ịkaraph ịlo Ẹnaan ạSadrak, Mẹsak rꞌAbed Nego, pọ kọkanyan oye phọ ọpo owol amem ạḍighaagh amem, ḅịle kẹn otu ọdi kotene egu atopha. Ẹnon ẹmugh dị ketue ẹtagharan ịduon ílho.”
30 Kụ ọdaam mọ aphophe Sạdrak, Mẹsak rꞌAbed Nego ạngo bịdi igbogh ạsidol sịphe eelhe phọ ạBabilon.