Izikiel
Ọḅel ọmiin uḍien Izikiel ịlo Ẹnaan
(1.1–7.27)
Ạgada ọda Ẹnaan
1
*Omuneniom oogh aḍio omuneniom inya ụnwanyu esi ạlha dị emuneniom ịraardi, mị Izikiel oyil ạrikia phọ, ọony aBuzi, ụrolan dọl iiruen rꞌawe ạbuo aJu phọ ọgbal Ọphiiny aKebar ẹpe Bạbilonia. Okuaḍio phọ aghughuronu kụ mị ạmiin uḍien Ẹnaan. 2 *(Ạlha phọ eḍighi bọ oogh emiigh kꞌamem mọ mọsighe bọ Jehoyasin ọdaam mọ ogheelom eeruen ẹmha.) 3 Ẹpe eelhe ạBabilon ọgbal Ọphiiny aKebar, mị ụnaghan ni ẹḍogh Ọmoogh-we phọ dị rụḅaanaan ịmi kụ mị aloghoma ịikpo phọ ọdi.4 Mị uphogh ni ạnyu kụ ạmiin oghim dị ạḍua ẹpe ephunom mọ kụ ratu. Ọmepheghian aḍio rẹmu kemite esi oboom ọotu, kụ okuaḍio phọ akitonom bọ nyọdi rada. Sịphe aḍio phọ rẹmepheghian bọ, ịyaar ịmu ni ịdipho enaba. 5 *Sịphe ogbo oghim mọ, mị ạmiin ịdi ẹghigh inya ạraraar dị ọlem dị ẹmoogh ḍiphooghu dị ẹghigh we 6 kụ tọrobo ọnyo ạbidi ạmoogh inya asighisigh rꞌinya araphaaph. 7 Aruwol ạbidi eselogh, kụ bịdi ẹmoogh rokpogho ạrada ịdipho ịpe aḍilephiri ạnam kụ rẹmu ịdipho enaba dị ogbuurogh. 8 Esi ọḅaram inya asighisigh rꞌinya araphaaph phọ ạbidi, tọrobo ọnyo ạbidi ạmoogh inya ạraghaagh oye, ḍiniin eeḍian ạtorobo ophaaph. 9 Ịyal araphaaph ạtorobo ịyaar phọ ẹphen ọlhem bọ ẹmoogh bọ ḍiphooghu phọ ịitaranu ni ịdi aruukuna phọ eti ghan ẹnon ịdipho ịyaar inya aruukuna. Mem lọ retelhe, irelhe ghan ḍita ịdi asiloor phọ ạbidi kéeghiraan.
10 *Tọrobo ịyaar phọ ọlhem bọ ẹmoogh bọ ḍiphooghu ịmoogh inya ạkiro ọdo asighisigh: ghisigh oye sịphe esomanan, ghisigh ạnam-dịka ẹpe elhiom mọ, ghisigh aḍilephiri ạnam ẹpe ekeeny phọ rꞌaghisigh uga ẹpe ọman phọ. 11 Ịyal araphaaph ạtorobo ọnyo ạbidi iphooph ịdi aruukuna phọ kekar raphaaph ạbulo otuman nyọdi, kụ ịpheri phọ ịyal araphaaph phọ eekpereghiom siloor phọ ạbidi. 12 Tọrobo ọnyo ạbidi lọ ạmeera asoman ni inya phọ ạrughulukul phọ, kụ loor ịduon phọ aḍita phọ kotue ni ọki tọrobo ekpisi lọ ọwa ọghi dị úughiraan.
13 *Igbo ạraraar phọ ọlhem bọ ịyaar ịrol li dị ẹghigh ọmure dị raamor, kụ ratelhe ghan bịn. Ạnian phọ keemor emite kụ ẹtaḅal emitiom ọmepheghian aḍio. 14 Ạraraar phọ ịphen ikem ghan eten ẹghi, eten eḅula ịdi ẹrol dị ạnian ọomaany.
15 *Sịphe mị rapogh bọ inya phọ ạraraar phọ ọlhem bọ, mị ụmiin ni inya idighila dị resoor ude, oniin ọogaany ạtorobo ọnyo ạbidi. 16 Inya phọ idighila phọ ẹeghighighan ni; tọrobo odighila ạmu ghan ịdipho ịbekulari, kụ tọrobo ọnyo ạbidi ạmoogh ọnon odighila dị asoph nyọdi aalemi rụghulukul dị eeleeny. 17 Ịduon phọ eḍighi ịyaar odughenaan inya idighila phọ ọghi ạtorobo ekpisi lọ ẹwa ọghi. 18 *Ruukuna idighila phọ, ariḍien kụ iighironom. 19 Tọrobo amem lọ ạraraar phọ ọlhem bọ ẹgbatan ẹda, pọ idighila phọ rẹdaphan ni, kụ eḍighi ịyaar dị ạraraar phọ ọlhem bọ eḅetenu sịphe ude phọ ẹmeera, pọ idighila phọ rẹdaphan ni. 20 Ạraraar phọ ọlhem bọ ịghi ghan ni tọrobo ekpisi lọ ẹwa ọghi kụ idighila phọ ịdaphan ghan ni eḍighi ịlo ạraraar phọ reḍighi, ịdi eḍighi bọ ạraraar phọ kụ retelhiom bịdi. 21 Esi ịduon phọ tọrobo amem lọ ạraraar phọ eḅetenu orelhe mꞌọmeera esi mꞌophooph ịsien ade phọ ọghi ạnyu, idighila phọ ịtuugh ni ẹdaphan.
22 *Ạnyu ạrumhu ạraraar phọ ọlhem bọ ịyaar ịrol li dị eḅugulu kụ eeghiraan dị oḍighinom ḍighiigh dị reeloghoḍian. 23 Sịphe eeḍian eḅugulu ịyaar phọ, ạraraar phọ ọlhem bọ ẹmeera, tọrobo ọnyo ạbidi ạatarion ịyal araphaaph ịdi aruukuna phọ etir ghan ọlo atuman nyọdi kụ aakpereghiom loor phọ ọdi ịyal phọ ịpheri phọ araphaaph phọ. 24 *Mị ụnaghan ni ḍịaḅa araphaaph phọ ạbidi mem dị rẹpeeph; ịḅa ịdipho ạḍiolo ọphiiny, ịghigh ịdipho ạḍiaḅa aḍita awe ẹgham, ịghigh ẹḍogh Ẹnaan Oomo Ịikpo. Mem dị bịdi ẹwile ọpheeph, bịdi ekpooghi raphaaph ạbidi, 25 kụ ạḍiaḅa ịḅile ni ẹrol ạnyu eḅugulu ịyaar phọ ạnyu ạrumhu phọ ạbidi.
26 *Ạnyu eḅugulu ịyaar phọ, ịyaar ịrol li dị ẹghigh ạgada ọdaam dị oḍighinom ạsafair, kụ ịyaar dị ẹrolom ạgada phọ ịghigh ịdipho oye. 27 *Ịyaar phọ ịmu ghan ịdipho enaba dị edi igbo ạnian. Oomo phọ ọdi ạmu ni aaghironom rꞌạḍiḅaal ọtozi, 28 dị ạmoogh oomo ịnme phọ ịpe edi ghan bọ ologhi aghozogh oburukeeny. Ḍien kụ oologhoḍian ạḍiḅaal dị eḍeenaan mọ Ọmoogh-we phọ kụ odi bọ sịphe phọ.
Ẹnaan ẹmagh Izikiel oḍighi oyil
Mem dị mị ạmiin bọ ịphen phọ, mị uḅololo azu risigh ạmi ude. Pọ kụ amem dị mị ạnaghan ẹḍogh dị rẹḅa.