Dạniel
ẠDaniel rꞌạrighiri phọ ọdi
(1.1–6.28)
Ugheel ạnmuny sịphe ogiga otu ạNebukadnezar ogbogh ọdaam mọ
1
*Lhạ dị emuneniom ịraar dị aJehoyakim ạda Juda, ạNebukadnezar ọdaam eelhe phọ ạBabilon azuom ni ẹgham Jeruselem ạḅile akitonom ẹmha phọ. 2 *Ọmoogh-we phọ ạngo ni ọgel kụ ọdi asiph Jehoyakim ọdaam mọ ạḅile azirion iniin ẹelha Otu Ịiḅereghi phọ. Ọdi asiphi buniin awe agheelom obughotu aruru phọ ọdi ẹpe Bạbilonia, kụ adoghoḍi ẹpe iisoph phọ ẹelha phọ ọdi azirion bọ.3 Ọdaam eelhe phọ ạngo Aspenaz, ogbogh ọnyo iiḍighi phọ ọdi, mọ ọdi ạsaḅar igbo awe phọ Ịzirel odi bọ iiruen phọ nmụny ọto kꞌọdaam mọ rꞌikpolom awe phọ ọdi; 4 bịdi oḍighi ni we dị ọnighe ọmiin, ọsu ologhi, ọtughemi agey, ọmaar ḍịnya, ḅịle ẹgha úḍigh; pịdi bịdi ọkpianaan ọrol okumu sịphe ogiga ọdaam mọ. Aspenaz kạtughemi bịdi ịlo ạal rꞌọge ọnhu ạBabilon. 5 Ọdaam eelhe phọ ạto kẹn ni ạḅem mọ tọrobo aḍio kọngo ghan bịdi eniin ọdo eḍien ịdipho rọngo ghan bọ we ogiga phọ, kụ mọ, ịraar ạsia ịtuugha phọ ạbidi reten, kụ bịdi ogbi oru aghisigh ọno ọdaam mọ. 6 Buniin ạnmuny dị ọsaḅar bọ uḍighi Dạniel, Hananaya, Mịsael rꞌAzaraya, oomo phọ ạbidi ạbuo eghun aJuda. 7 Ogbogh ọnyo iiḍighi phọ aaghologh bịdi imoom asiḍien: Bẹltesazar, Sạdrak, Mẹsak rꞌAbed Nego.
8 ẠDaniel agbiighi ni sịphe ologhi ọdi mọ ọno kạ́apu loor phọ ọno esi olheeghi ariiḍien rꞌọphughologh arimiim ịsiphe ogiga otu ọdaam eelhe phọ kụ ọdi ạlhom Aspenaz mọ ạlhoghonaan nyịno ḍịghaagh, 9 kụ Ẹnaan eḍighi ịdi Aspenaz ạnma ghan ighirigiir Dạniel. 10 Aspenaz rakiilaan ọdaam mọ kụ ạḅeni Dạniel mọ, “Ọdaam mọ mạḅem ni ịyaar dị nạ kale ghan ạḅile ạpughol, kụ eḍighi mạar lọ nạ ụ́bugh ịdipho ạbueri phọ ugheel ạnmuny phọ, ọdi katue ni ughiigh ịmi.”
11 Kụ ạDaniel ạghi ạteeny okoriom mọ ọpo Aspenaz aseere bọ mọ aphogh nyọdi rꞌịraar ạrighiri phọ ọdi. 12 Kụ ọdi ạḅeni, “Uphogh iyoor esi aḍioph aḍughul-otu, ụngo ghan iyoor ịikiripha rꞌạmuum bịn. 13 Kụ ụsighe iyoor ạtomaam ugheel ạnmuny phọ, bụphe role ghan bọ eḍien kꞌọdaam mọ, kụ ạdaphan ịpe yoor ọrol bọ kụ asoph ọoruen phọ ạna.”
14 Ọdi ameeraam ni mọ ophoghom esi aḍioph aḍughul-otu. 15 Mem dị amem mọ ẹteeny bọ, bịdi kụ ụmoogh ịnyaam ọḅile omoon opu oomo ạbuphe olhe ghan bọ eḍien kꞌọdaam mọ. 16 Kụ emiigh sịphe kụ ẹghiom ghisigh, okoriom mọ ameera ni mọ bịdi olhe ghan ịikiripha kpạripe rꞌeḍien kꞌọdaam mọ.
17 Ẹnaan ịngo ni inya phọ ugheel ạnmuny phọ olegheri-ịyaar rꞌẹmaar esi ạrinya rꞌigbogh ịitughian. Ọdi ạngoom kẹn ni Dạniel ẹmaar ọgba ghan ẹmhu ạramalha rꞌịmiin.
18 Ịraar ạsia phọ ọdaam mọ aghol bọ remunughan, Aspenaz ạsighe oomo ugheel ạnmuny phọ ạghiomonaan kꞌạNebukadnezar, 19 Ọdaam mọ ạḅaanaan ni oomo phọ ạbidi kụ ạDaniel, aHananaya, ạMisael rꞌAzaraya ọḅeeraan nyọdi opu oomo ạbueri phọ. Kụ bịdi oḍighi aani bụdi kọtol aani ghan sịphe ogiga ọdaam mọ. 20 Tọrobo aḍipuru lọ ọdaam mọ apuru, mụghumo ịiḅaghami lọ emite, inya phọ ạnmuny phọ ạbuen ulegheri ghan ni ḍioph amem opu ịlo oomo ariil uḍien ḅịle rꞌawe ịiḍaany eelhe phọ ọdi. 21 ẠDaniel ạrol li otu ọdaam mọ tụtu ạSairos ogbogh ọdaam eelhe phọ aPasia azuom ẹgham ạkpar apu Bạbilonia.