Hosia
1
*Ḍịen kụ adom dị Ọmoogh-we phọ arom Hosia ọony aBeeri mem mọ Uzaya, aJotam, Ehaz rꞌạHezekaya oḍighi bọ bụdaam aJuda kụ aJeroboam ọony ạJehoas aḍighi ọdaam Ịzirel.Ạnir aHosia rꞌạnmuny ọdi
2 Ẹḅel amem mọ Ọmoogh-we phọ ạḅeni bọ we phọ Ịzirel esi aHosia, ọdi ạḅeni ni Hosia mọ, “Kịa aphin ạnir; ạnir ạna nyịna kạ́naghanan, kụ ạnmuny ạna kọkigh nyọdi. Ịdipho phọ kụ ẹdi awe ạmi mụwile ịmi kụ odi ḍịo ạbidi.”
3 Kụ aHosia aphin ạnir dị oghol mọ aGomer, ọnyani aDiblaim. Ọdi rọmar ọḅel ọony, olephiri, 4 *Ọmoogh-we phọ ạḅeni ni Hosia mọ, “Kol ḍien phọ ọdi mọ ‘ạJezreel’, loor esi dị kébia kụ mị ạlhiom ọdaam mọ Ịzirel ịdi eḍighi bọ aJehu, ọde ọde phọ ọdi, ạko enu ẹpe Jẹzreel. Mị kakureri ọda ẹemara ẹemara aJehu. 5 Kụ ẹpe Eḍiiny ạJezreel mem lọ ẹteeny mị kapiemi ni ịnyaam ẹgham mọ Ịzirel.”
6 AGomer ạḅile ni ạmar, egi phọ ẹphen, ọnyani. Ọmoogh-we phọ ạḅeni Hosia mọ, “Kol ḍien ọdi mọ ‘Ụ́pomoghian,’ loor esi dị mị káḍeenaan mun ẹphomoghian we phọ Ịzirel, ḅịle mꞌọsar ọwilenaan ạbidi. 7 Kụ ọlo mị kaḍeenaan ni weye aJuda ẹphomoghian. Mị Ọmoogh-we phọ ạbidi kạpel bịdi. Kụ ọlo mị káler ẹgham dị kobiom isiko rꞌạsikumugh rꞌịkpina, rꞌawe dị kokiilom rụsu.”
8 Mem dị aGomer maghine mạmaam ọnyani ọdi, ọdi ạḅile kẹn asoph eghun kụ ạmar ọnon ọony. 9 Ọmoogh-we phọ ạḅeni ni Hosia mọ, “Kol ḍien ọdi mọ ‘Káwe Ạmi’ loor esi dị awe phọ Ịzirel káwe ạmi kụ mị kẸ́naan ạbidi.”
Kọḅile oḅulemi Ịzirel
10 *Awe phọ Ịzirel koḍiza ịdipho ịisaar ọgbal ọphiiny, dị kótue ogbi ḅịle rꞌọtooghi. Nyịidipho Ẹnaan rẹḅeni ghan bịdi mọ, “Nyina káwe ạmi,” kụ amem retu ni dị ọdi kạḅeni bịdi mọ, “Nyina ạnmuny Ẹnaan phọ edi ghan bọ!” 11 Awe phọ aJuda rꞌawe phọ Ịzirel kọḅile ni ọḅophan. Bịdi kọsaḅar ri ọngo siloor ạbidi oniin oḍiemiom, kụ bịdi ọḅile opoph kụ oḍum sịphe ade phọ ạbidi. Ii, aḍio phọ ạJezreel keḍighi ni ḍigbogh aḍio.