2
Rẹḅem ghan mọ, “Oye dị kamugh ni, ḅetenu ạmeera. Mị rạwa ọḅaanaan ạna.” 2 Ịduon phọ ẹḍogh phọ rẹḅa bọ, uwaloor Ẹnaan uḍigh ni ịmi kụ uḅeton ịmi ạmeremi, kụ mị ạḅile ạnaghan ẹḍogh phọ, 3 “Oye dị kamugh ni, mị rarom nyịna ọghi kꞌawe phọ Ịzirel. Bịdi mọgbagharan kụ ụḅitonaan ịmi kụ ọḅile ni odi esi ịgbagharan, ọkaraghi ịdipho ạburude ạburude phọ ạbidi ọrol bọ. 4 Bịdi mọḅaar ẹmhu ḅịle eghuan ịmi rụ́logh ghan. Esi ịduon phọ mị rarom nyịna ọḅeni ạbidi ịdi mị Ọmoogh-we dị ạmoogh oomo ịikpo rạḅeni bịdi. 5 Mụghumo ạbuo ịgbagharan phọ oler rụru ọngo nyịna mọ ụ́ngo, bịdi kolegheri ni mọ oyil mạrol ghan ni igbo ạbidi.
6 “Kụ ọlo nạ, Oye dị kamugh ni, kákiilaan bịdi mꞌịyaar dị bịdi kọḅem. Bịdi kokel li kụ ọḅitonaan nyịna. Kẹkigh ni ọrol igbo asikororoph ạnyu ade. Ghạlamo ịduon phọ ni, kákiilaan bụo ịgbagharan phọ ạbuphe mꞌạtoro ịyaar lọ bịdi kọḅem. 7 Nạ kạḅeni ghan bịdi tọro ịlo mị ạḅeni nyịna ọḅem, mụghumo bịdi oler rụru mꞌúler. Tụutughian ọdo ạbuo ịgbagharan dị bịdi oru.
8 “Oye dị kamugh ni, ler rụru esi ịphen mị kạḅeni bọ nyịna. Kạ́gbagharan ịdipho ạbidi. Poghoghomi ọnhu ạna kụ alhe ịyaar phọ mị kạngo bọ nyịna.” 9 *Mị ụmiin ni ḍịghaagh dị ọgbuton omitiom ruruom ịmi, kụ ẹpam ḍịnya dị okpooghi, 10 kụ ạḍighaagh phọ ẹetarion ḍịnya phọ, kụ mị ạmiin mọ ịge edi ni ịyal phọ ạga phọ — ụge emoghi oboom ọto, rꞌịnun rꞌịkuph.