4 Ọdi ụḅeni ịmi mọ, “Gon, oye ịḅaal rꞌiphulupul, mạar alher rụru kụ aphogh tọrobo ịyaar lọ mị aḍeenaan nyịna, loor esi dị ịduon kụ ẹdi ọtuan bọ kụ ọsighe nyịna oru sịen. Nạ kạḅeni weye phọ Ịzirel tọrobo ịyaar lọ nạ ạmiin.”

5 ^*Ịyaar dị mị ạmiin Otu Ịiḅereghi phọ, rꞌiikpe dị ekoom. Oye phọ ạsighe ọtoom ekulha oreeny phọ ọdi dị ẹman ịraar akuḅu ḍịdoony kụ ạtoom iikpe phọ. Iḍighi ịraar akuḅu ḍiphoph, ḅịle ịraar akuḅu ḍịbugh. 6 Kụ ọdi ạghi asi eḍighom mọ esoman bọ emitenom erumuḍio phọ. Ọdi ạsiiny ẹedaneen phọ, kụ sịphe ọkar ạnyu phọ ọdi ạto eḍighom mọ. Iḍighi ịraar akuḅu ḍịkel. 7 Otenom sịphe phọ, esi orelhe oten kụ ịrol, dị ẹmoogh ịraar iisoph okoriaam tọrobo ạga. Tọrobo osoph aaleeny ruukuna, ịraar akuḅu tọrobo ạga kụ iikpe ogbo phọ ạbidi eḍighi ghan ịyal rꞌegbem akuḅu ḍịbugh. Otenom iisoph okoriaam mọ, eten ịrol li dị eḍighi ịraar akuḅu ḍịdoony dị ẹghi ẹteeny eḍighom dị repogh Otu Ịiḅereghi phọ. 8-9 Ọdi ạtooghi osoph phọ ọphon kụ ạmiin mọ ạman inya akuḅu ḍịkel. Ẹdi kụ iḍighi eekuna ọnhu-aḍibuo eḍighom dị ẹkar etuman Otu Ịiḅereghi phọ, kụ ẹpe ẹekela eekuna phọ iikpe phọ iḍighi oniin akuḅu ḍịbugh. 10 (Iisoph okoriaam mọ ịphen phọ ẹrol bọ tọrobo ạga eten phọ iileeny ni, kụ iikpe ịbaay ạbidi iḍighi ni iniin ḍịbugh.)

11 Ẹdi etum, oye phọ ạtooghi ẹreghe esi oten phọ ịsiphe eḍighom mọ. Oomo phọ ịne iḍighi odiiny rꞌegbem akuḅu, kụ epholopool dị ẹrol ogbo ịyal phọ ạrunhu-aḍibuo phọ iḍighi oogh akuḅu. 12 Esomanan ạtorobo osoph okoriaam mọ, aḅidi ạrol dị asoorom aḍighi ooghdi ẹkulom ạḍighaagh ḍiphoph, ḅịle ooghdi ẹkulom ạḍighaagh ḍịbugh. (Iisoph phọ iḍighi ịraar akuḅu kụ eeleeny ruukuna.) 13 Kụ ọdi ạtooghi ḍịkel emiigh iikpe-ọman oniin ọsoph ẹghi ẹteeny iikpe-ọman osoph phọ ọpo ọḅeeny bọ esi-oten phọ kụ ọteeny, kụ ịman ḍioph rꞌịyal rꞌegbem akuḅu. 14 Osoph phọ ọpo ẹpe eekuna phọ ạḍua amite esi ogiga. Ọdi ạtooghi osoph phọ ọpo, kụ ạmiin mọ ịman ḍioph akuḅu ẹreghe. 15 Oomo ạḍidoony eḍighom ọnhu-aḍibuo phọ emiigh iikpe-erugh ọnhu-aḍibuo phọ ẹghi ẹteeny ẹekela osoph eekuna phọ iḍighi ịyaldi rꞌoogh akuḅu. 16 Ịbam aropogh ịrol li sịphe iikpe-erugh oomo iisoph phọ ḅịle rꞌiikpe-ologhi ịbaay iisoph phọ. Areelhe ịrol li dị ọkaaghi sịphe iikpe-ologhi phọ ephogh bọ esi-oten phọ.

17 Kụ oye phọ ụsighe ịmi arelhiom eḍighom mọ osi ogiga phọ. Ịraardi iisoph kụ ẹdi ọlogh ọkpasaghiom iikpe-erugh, kụ ghisigh ạbidi esi ịrol dị oogboom sighiigh, 18 dị ẹghi ekoom ogiga ologhi phọ. Ogiga phọ ẹphen asoorom ạnyu nyẹpe ologhi phọ.

19 Eḍighom ịrol dị ephooph ọḍua-oḍigh ogiga ologhi phọ. Oye phọ ạto ḍịkel ịbaay ịyal ariḍighom mọ kụ eḍighi ooghdi akuḅu.

20 Kụ oye phọ ạto eḍighom ạga ephunom mọ dị ẹḍua eḍigh ogiga erugh phọ. 21 Ịraar iisoph okoriaam mọ ẹrol bọ tọrobo ạga esi orelhe ịsiphe otu phọ, iikpe dị ẹrol ịbaay ạbidi, rꞌogbogh osoph phọ, oomo phọ ịne iḍighi eniin ẹtoom mọ ịdipho ịpe ạga emitenom erumuḍio phọ. Oomo ạḍidoony eḍighom mọ ịman ịyaldi rꞌoogh akuḅu kụ ẹreghe phọ ḍioph rꞌịyal rꞌegbem akuḅu. 22 Ogbogh osoph phọ, arughuugh-ookuugh phọ, rꞌịkaaghineen areelhe phọ ịghigh ịpe ọnhu-aḍibuo ạga emitenom erumuḍio phọ. Ịsien kụ ẹdi oḍual ariisi ọodaghagh kụ ịrol osi eḍighom kụ ogbogh osoph ạrol eekuna dị repogh ogiga phọ. 23 Ọḅeeny ogiga phọ dị ọḍua eḍighom ạga ephunom mọ ẹphen, ẹnon eḍighom ịrol li dị ẹghi ẹteeny ogiga ologhi phọ, ịdipho ẹrol bọ ạga emitenom erumuḍio phọ. Oye phọ ạto ḍịkel phọ ịbaay ịyal ariḍighom mọ ịphen, kụ eḍighi ooghdi akuḅu.

24 Ẹdi etum, oye phọ ụsighe ịmi ạghimom ạga esoorom mọ; ẹpe kụ ẹdi yoor ọmiin ẹnon eḍighom. Ọdi ạto iikpe-ologhi phọ rꞌosoph ọnhu-aḍibuo phọ, kụ ịrol ịdipho ịpheri phọ. 25 Arughuugh-ookuugh phọ ịsiphe iisoph eḍighom mọ ẹphen ịrol kẹn ni ịdipho ịpheri phọ. Oomo ạḍidoony eḍighom mọ iḍighi ịyaldi rꞌoogh akuḅu, kụ ẹreghe phọ ḍioph rꞌịyal rꞌegbem akuḅu. 26 Oḍual ariisi ọodaghagh kụ oḍigh ịrol li, ḅịle osoph eḍighom mọ ạrol kẹn ni ẹpe eekuna phọ asoman ogiga phọ. Areelhe ịrol li dị ọkaaghi sịphe iikpe-ologhi phọ ephogh bọ esi-oten ghan phọ. 27 Sịen phọ kẹn, eḍighom ịrol li dị rẹki ogiga ologhi phọ. Oye phọ ạto ḍịkel ọghi ọteeny eḍighom mọ emuneniom bọ ịyal phọ, kụ eḍighi ooghdi akuḅu.

28 Oye phọ urelhiom ịmi ạḅeenyom eḍighom ạga esoorom mọ kụ oḍigh ogiga ologhi phọ. Ọdi ạto eḍighom mọ, kụ ẹrol ịdipho ariḍighom iikpe-erugh phọ. 29-30 Iisoph okorian aloor phọ, ogbogh osoph phọ, rꞌiikpe-ologhi phọ, ịrol eniin phọ rꞌịpe ịpheri phọ ariḍighom mọ. Arughuugh-ookuugh phọ ịsiphe iisoph eḍighom mọ ẹphen ịrol kẹn ni. Oomo ạḍidoony phọ iḍighi ịyaldi rꞌoogh akuḅu, kụ ẹreghe phọ ḍioph rꞌịyal rꞌegbem akuḅu. 31 Ogbogh osoph phọ ọdi aphogh nyọori phọ esi ogiga phọ. Areelhe ịrol li dị ọkaaghi sịphe esi-oten phọ. Ọphaanya ariisi ọodaghagh ịrol li kụ ịghi ẹteeny eḍighom mọ ẹphen.

32 Oye phọ urelhiom ịmi ạḅeenyom eḍighom ạga emitenom erumuḍio phọ kụ oḍigh ogiga ologhi phọ. Ọdi ạto eḍighom mọ, kụ ẹrol ịdipho ịpheri phọ. 33 Iisoph okoriaam mọ, ogbogh osoph phọ, rꞌiikpe-ologhi phọ, ịrol eniin phọ rꞌịpe ịpheri phọ ariḍighom mọ. Arughuugh-ookuugh ikoom oomo esi phọ, rꞌogbogh osoph phọ kẹn. Oomo ạḍidoony iḍighi ịyaldi rꞌoogh akuḅu, kụ ẹreghe phọ ḍioph rꞌịyal rꞌegbem akuḅu. 34 Ogbogh osoph phọ aphogh ogiga erugh phọ. Areelhe ịrol li dị ọkaaghi sịphe iikpe phọ ephogh bọ esi oten ghan phọ. Ọphaanya ariisi ọodaghagh kụ ịghi ẹteeny eḍighom mọ ẹphen.

35 Kụ oye phọ ụsighe ịmi ạghimom eḍighom ạga ephunom mọ. Ọdi ạto eḍighom mọ, kụ ẹrol ịdipho ịpheri phọ. 36 Ịdipho ạbidi, ịmoogh kẹn ni iisoph okoriaam, iikpe-ologhi dị ọdeeghi, ogbogh osoph, rꞌarughuugh-ookuugh dị ekoom. Oomo ạḍidoony iḍighi ịyaldi rꞌoogh akuḅu, kụ ẹreghe phọ ḍioph rꞌịyal rꞌegbem akuḅu. 37 Ogbogh osoph phọ aphogh ogiga erugh phọ. Areelhe ịrol li dị ọkaaghi sịphe iikpe phọ ephogh bọ esi oten ghan phọ. Ọphaanya ariisi ọodaghagh kụ ịghi ẹteeny eḍighom mọ ẹphen.

38 Sịphe ogiga erugh phọ, ọnon otu ạrol li dị otulom eḍighom ẹpe ologhi phọ ạga ephunom mọ. Kụ enyeene esi ogbogh osoph phọ aphogh bọ ogiga phọ, kụ sịphe kụ ẹdi bịdi ootologh ghan iphulupul ịnam ịlo ọphinyonom ạrikia oguom ạnian. 39 Sịen ogbogh osoph phọ ẹrol bọ inya ịdaabili, ịyal ịne ạga osoph phọ. Ịsien ạnyu ịdaabili phọ kụ ẹdi bịdi ọze ghan ịnam mọ koḍighinom bọ rạraar aghuḍum mọ, rịkia oguom ạnian phọ rꞌịpe ootolom ịkaraph phọ rꞌịpe ọkpe-oḅulemi phọ. 40 Eḅughotu osoph phọ ịrol inya ịnon ịdaabili, ịyal ịne ạga eḍighom ọnhu-aḍibuo ephunom mọ. 41 Oomo ịne ẹrol bọ ọphaanya ịdaabili ạnyu esi dị ọze ghan ịnam ọphinyonom ạrikia: inya ịne ẹrol ologhi osoph phọ kụ inya ẹrol sịphe ogiga phọ. 42 Inya ịdaabili phọ, ịsiphe otu-otulom mọ, rꞌịsiphe oselemi ghan bọ rịkia oguom ạnian phọ, uugbo sighiigh kụ oḍighinom. Ịman ooghdi ẹkulom ạḍighaagh ḍiphoph, kụ ạnyu phọ ẹman oḍualdi rꞌoogh ẹkulom ạḍighaagh oomo ịigaany. Oomo ịinya phọ ọziom ghan bọ ịnam lọ koḍighinom ịyaar aghuḍum ụḅamaghi ghan ạnyu ịdaabili phọ ịphen. 43 Iigbom dị aḍighi oḍual rꞌegbem ẹkulom ạḍighaagh ẹreghe utene okoom ruukuna ịdaabili phọ. Oomo iphulupul ẹnam lọ koḍighinom ịyaar aghuḍum ụḅam ghan ạnyu ịdaabili phọ.

44 Kụ ọdi ụsighe ịmi aḍighom ogiga ologhi phọ. Ịyal iisoph ịrol dị eghughuronu sịphe ogiga ologhi phọ. Oniin aphogh ạga esoorom ọogaany ọnhu-aḍibuo ạga ephunom mọ, kụ ọphori phọ aphogh ạga ephunom ọogaany ọnhu-aḍibuo ạga esoorom mọ. 45 Oye phọ ụḅeni ịmi mọ osoph phọ aphogh bọ ạga esoorom mọ ọlo ariil ạrikia phọ roḍighi bọ oḍighi sịphe Otu Ịiḅereghi phọ, 46 kụ osoph phọ aphogh bọ ạga ephunom mọ ọlo ariil ạrikia phọ roḍighi bọ oḍighi enmeny ịyaar aghuḍum mọ. Oomo ariil ạrikia phọ, ạbuo ẹemara ẹemara ạZedok; bịdi bịn kụ ạbuo eghun aLivai dị omeera mọ ọghi egbodo Ọmoogh-we phọ okumu ọdi.

47 Oye phọ ạto ogiga ologhi phọ, kụ eḍighi ooghdi akuḅu oomo ịigaany. Otu Ịiḅereghi phọ ạrol ạga emeelom erumuḍio phọ, kụ sịphe aghisigh phọ enmeny ạrikia kụ ịrol. 48 Kụ ọdi ụsighe ịmi ạghimom osoph eḍighom Otu Ịiḅereghi phọ. Ọdi ạto eḍighom mọ, kụ iḍighi ịyal rꞌegbem akuḅu ḍịkel ude, rꞌoḍual akuḅu ẹreghe, rꞌiikpe dị aḅidi phọ ạman oniin rꞌegbem akuḅu ạga ekeeny rꞌelhiom. 49 Ariisi ọodaghagh ịrol li ẹghi esi osoph eḍighom mọ, dị ạman ḍioph akuḅu ẹreghe rꞌodiiny akuḅu ḍịkel ude. Ịyal ạroko ịrol li, eniin tọrobo ạga eḍighom mọ.