3 Kụ ọdi aḍigh ọkar osoph ologhi phọ. Ọdi ạto eten phọ ẹḍua bọ eḍigh, ịman oniin akuḅu ḍịkel ude, kụ eḍighi ịraar akuḅu ẹreghe, rꞌiikpe ekeeny rꞌelhiom dị aḅidi phọ ạman 3.5 akuḅu. 4 Ọdi ạto ọkar osoph phọ, kụ aḍighi ḍioph akuḅu oomo ịigaany. Kụ ọdi ụḅeni ịmi mọ, “Ịsien kụ Ẹphan phọ.”

5 Oye phọ ạto ḅidi iikpe-ologhi Otu Ịiḅereghi phọ, kụ eḍighi ịraar akuḅu. Ọkpaariom iikpe phọ, okoom oomo Otu Ịiḅereghi phọ, ạnmuny iisoph ịrol dị ẹman ịyal akuḅu ẹreghe. 6 Iisoph phọ ịphen iḍighi ịraar ẹedaneen kụ tọrobo ẹedaneen ẹmoogh ịraardi iisoph. Iikpe-erugh phọ tọrobo ẹedaneen ighom ekpo epu ịpe ogbotu ude phọ, ọbo iisoph phọ emeelom iikpe bịn kébiririom. 7 Ịduon kụ ẹdi iikpe Otu Ịiḅereghi phọ, ọrol erugh kụ ropogh, ịrol mụdi eeleeny ekpo kụ esi ạnyu phọ. Ọkpaariom iikpe-erugh Otu Ịiḅereghi phọ, ịphalagbal iisoph phọ, ụlhoghoḍi ịyal ibol-bol areten ọsiiny ạnyu, ọbo edugh ọḍua ude osi ẹlo ogboku ḅịle rọghi ẹedaneen ẹpe ạnyu phọ. 8-11 Iikpe-erugh iisoph phọ ịphen aḅidi phọ ạman 2.5 akuḅu; oniin ọnhu-aḍibuo kụ ẹdi kọḍua oḍigh iisoph ạga ephunom mọ Otu Ịiḅereghi phọ, ḅịle oniin kụ ẹdi kọḍua oḍigh ịpe ạga esoorom mọ. Mị ụmiin mọ ạḍikololoony ade dị ẹman 2.5 akuḅu ẹreghe kụ ikoom Otu Ịiḅereghi phọ; iḍighi ịraar akuḅu kụ epeeliom ude phọ eru ạnyu kụ eelenyan ephighiom iisoph phọ ọogaany iikpe Otu Ịiḅereghi phọ. Ịbaay ạḍikololoony ade phọ rꞌaruutu phọ ariil ạrikia phọ orugh bọ, ephoghoghoony esi ịrol dị ẹman ḍioph akuḅu dị esophom ịigaany Otu Ịiḅereghi phọ.

12 Ọkar ẹekela ephoghoghoony esi phọ, ạga emeelom erumuḍio Otu Ịiḅereghi phọ, otu ạrol dị ạman inyadi rꞌoogh akuḅu ḍịdoony rꞌịraardi rꞌoogh akuḅu ẹreghe; iikpe phọ aḅidi phọ aḍighi 2.5 akuḅu ooghironom.

13 Oye phọ ạto akoom Otu Ịiḅereghi phọ, kụ eḍighi ooghdi akuḅu ḍịdoony. Kụ ẹḍua ọman Otu Ịiḅereghi phọ, ẹḅeeny ephoghoghoony esi phọ ẹpe emeelom erumuḍio phọ, ạḍikel phọ iḍighi kẹn ooghdi akuḅu. 14 Ogborori ọḅeeny arisigh Otu Ịiḅereghi phọ, ọḅaram ephoghoghoony esi ekeeny rꞌelhiom, iḍighi kẹn ooghdi akuḅu. 15 Ọdi ạto ḍịdoony otu phọ kụ osi ạga emeelom erumuḍio phọ, ọḅaram reten ologhi otu phọ ekeeny rꞌelhiom, kụ eḍighi kẹn ooghdi akuḅu.

Osoph eḍighom Otu Ịiḅereghi phọ, Ạdol Iigbia phọ rꞌẸphan phọ, 16 oomo phọ ịne ukpoghom iimugha ipoḍi ireeny emiigh ogbotu phọ kụ esi rughuugh ookuugh phọ. Rughuugh ookuugh phọ ịphen kotue ni okughi. 17 Iikpe-ologhi Otu Ịiḅereghi phọ, esi dị ephooph epelom rughuugh phọ, ụkar kụ okpoghom ịkaaghineen 18 areelhe ḅịle rꞌạruukpaany aghuḍuul. Areelhe eten ạruukpaany aghuḍuul oten, eniin etum nyeniin, ekoom oomo osoph phọ. Tọrobo ọokpaany aghuḍuul ạmoogh ịyal asighisigh; 19 ghisigh oye dị okiton ophoghomi alhe phọ ḍiniin ạga, rꞌaghisigh ạnam-dịka dị okiton ḍịeri phọ ạḍighaagh phọ. Ịduon kụ ẹdi ẹrol kụ ekoom oomo iikpe phọ, 20 emiigh ogbotu kụ epelom eghuugh phọ. 21 Ịḅaghaghaam ọnhu-aḍibuo Ạdol Iigbia phọ iileeny oomo ịigaany.

Ghisigh eḍighom Ẹphan phọ, ịyaar ịrol dị ẹghigh 22 enmeny ịyaar aghuḍum dị ọkaam iimugha ireeny. Iḍighi 1.5 akuḅu ḍiphoph rꞌoniin akuḅu ẹreghe. Ịmeremiom ạrughulukul phọ, azin phọ, rꞌịigaany phọ, oomo phọ ịne uḍighinom iimugha ireeny. Oye phọ ụḅeni ịmi mọ, “Phọn kụ ịdaabili phọ ẹmeera bọ egbodo Ọmoogh-we phọ.”

23 Eghuugh ịrol eekuna eten phọ ẹghi bọ esi Dọl Iigbia phọ, kụ ẹnon kẹn ẹrol eekuna eten phọ ẹghi bọ esi Ẹphan phọ. 24 Arughuugh phọ iḍighi ịyal ịne eniin esi kụ eeghelaan ghan mem lọ oghughuron sịphe ogbo phọ. 25 Ịkaaghineen areelhe rꞌạruukpaany aghuḍuul ịrol sịphe arughuugh Ạdol Iigbia phọ, ịdipho ẹrol bọ sịphe iikpe phọ. Kụ ụsighe oreeny kụ oghophom egbodo ọnhu-aḍibuo osoph eḍighom mọ. 26 Ịigaany osoph phọ ọphon arughuugh-ookuugh ịrol li, kụ iikpe phọ ụnighemiom reelhe dị ọgeeghi.