Mọkpar opu Gog
39
Ọmoogh-we dị ạmoogh oomo ịikpo ạḅem, “Oye dị kamugh ni, ḅạaghiom Gog, ogbogh ọdaam areelhe ạMesek rꞌaTubal kụ ạḅeni nyọdi mọ mị kụ ạmulogh-ḍien ọdi. 2 Mị kakiton nyọdi apoghomi ḍimoom ạga kụ atelhiom ạḍuanam ẹpe ephunom mọ tụtu ọdi aru asi sịphe ạraaḅaraph phọ Ịzirel. 3 Kụ mị akpor kụmugh phọ ọdi ạsighe ḍịghaagh ekeeny ọdi kụ akpor ịkpina phọ ọdi ạsighe ḍịghaagh elhiom ọdi. 4 AGog rꞌawe ẹgham ọdi rꞌạbuphe oḍigh bọ ooḍikuan rꞌọdi komeel omugh ạnyu ạraaḅaraph phọ Ịzirel kụ mị ạngo ọgel kụ aruzu phọ ạbidi eḍighi eḍien oomo ịnun rꞌilhom ịnam eḍum. 5 Bịdi komeel omugh obalelhe. Mị Ọmoogh-we dị ạmoogh oomo ịikpo kụ mạḅem. 6 Mị kạkpooni nịan sịphe ade phọ ạMagog rꞌịphalagbal ọphiiny dị awe orugh kụ rọ́oḅaghami, kụ tọrobo oye alegheri mọ mị kụ Ọmoogh-we phọ. 7 Mị kaḍighi ni ịdi awe phọ ạmi Ịzirel kolegheri ḍien iigbia ạmi, kụ mị kámeera oofolomi ḍien ạmi nịiniin. Kụ areelhe phọ egbi olegheri mọ mị Ọmoogh-we phọ kụ Ẹnaan Aruukuan phọ Ịzirel.”8 Ọmoogh-we dị ạmoogh oomo ịikpo ạḅem mọ, “Aḍio phọ mị ạghaaph ghan bọ aghol ọkaraghi agey ketu ni. 9 Awe phọ orugh bọ rạmha phọ Ịzirel komite ọki kụ ọsighiogh rạraar ẹgham mọ oghel bọ kụ otene ịpe. Bịdi kọsighe ịsuaram rꞌạsikumugh rꞌịkpina rꞌịsoph rꞌạrokolom mọ ọkpooniom nịan kụ ọḅile ni ọmoogh ịdi kesugha kụ ẹtol oḍual ạsia. 10 Bịdi kọ́so mun ịpe ologhi eḍum, ḅịle kóler mun ireeny ẹekpua phọ, loor esi dị bịdi kọmoogh rẹenema ẹgham mọ oghel bọ kụ ọkpooniom nịan. Bịdi komiighi ọḅile obum rạraar awe phọ omiighi bọ ọḅile owum rạraar phọ ạbidi.” Ọmoogh-we dị ạmoogh oomo ịikpo kụ mạḅem.
Amaḍi aGog phọ
11 Ọmoogh-we phọ ạḅem mọ, “Mem dị oomo ịphen emite, mị kạngo Gog ẹkaraph eḍum ẹpe Ịzirel, sịphe Eḍiiny Ạbuo-erelhe ạga emitenom erumuḍio Ọphiiny-Ạla phọ. Gog rꞌoomo awe ẹgham mọ ọdi koḍiighi sịphe, kụ eḍiiny phọ kokol mọ ‘Eḍiiny Awe Ẹgham aGog’. 12 Kẹsighe weye Ịzirel oḍual ụnwanyu oḍiighi iḍim mọ kụ oselemi ịdi ade phọ kẹḅile ẹnighe. 13 Tọrobo oye lọ odi sịphe ade phọ kạloghonaan ḍịghaagh oḍiighi ạbidi, kụ kọngo bịdi eghuan esi ịphen phọ ḍio ọkpar opu phọ ạmi. Mị Ọmoogh-we dị ạmoogh oomo ịikpo kụ mạḅem. 14 Oḍual ụnwanyu phọ reten, kọson ni ọsaḅar we orelhe oten sịphe ade phọ pịdi oḍi aani iḍim lọ esugha dị úḍi kụ ọnighemi de phọ. 15 Ịdipho bịdi orelhe bọ ọghi orelhe oḅula sịphe ade phọ, tọrobo amem bịdi ụmiin ghan ọḅarara oye, bịdi koseere elegh ọogaany phọ ẹrol dị abuguphoghom iiḍi phọ oru ọmiin ọsighe oḍi ẹpe Eḍiiny Awe Ẹgham aGog phọ. 16 (Ẹmha kẹtol li dị ekpekian dị oghol ọgbagham weye ẹgham mọ.) Ịduon kụ ịdi kọḅile kụ oselemi de phọ.”
17 *Ọmoogh-we dị ạmoogh oomo ịikpo ụḅeni ịmi, “Oye dị kamugh ni, mạgh oomo ịnun rꞌịnam bịdi oru olhe ẹkia phọ mị raḍighinaan bọ bịdi. Keḍighi ni iboom ile sịphe ạraaḅaraph phọ Ịzirel, esi dị bịdi kọba ephulupul ẹnam kụ ọpughol ịḅaal. 18 Bịdi kọba ruzu awe ẹgham mọ kụ ọpughol ịḅaal ạbuphe ọdaaghi bọ sịen ade phọ; oomo phọ ạbidi kọze mụdi idughuna mꞌạnmuny iyool-ịga mꞌạrutu-ịga mꞌilephiri ạsinam dị ẹmoogh ẹnuum. 19 Mem lọ mị ạze weye phọ ạbuen ịdipho ạrikia, ịnun rꞌịnam mọ kẹlaay ẹnuum mọ lọ bịdi ọteeny kụ ọpughol ịḅaal tụtu ọyegheyeghe. 20 Sịphe ịdaabili phọ ạmi bịdi kọba oomo iphulupul ạrusu rꞌabukiilom rꞌawe ẹgham rꞌạbuo ịtaphan lọ bịdi ọteeny. Mị Ọmoogh-we dị ạmoogh oomo ịikpo kụ mạḅem.”
Ọḅile oḅulemi ạdol phọ Ịzirel
21 Ọmoogh-we phọ ạḅem, “Mị kaḍighi ịdi areelhe phọ kọmiin eghuan phọ ạmi, ạḅile aḍeenaan bịdi ịpe mị rạsighe ghan bọ ịikpo phọ ạmi kaḍighinom ịlo ẹkpianaan. 22 Awe phọ Ịzirel, emiigh mem mọ ọpo kụ ẹghiom, kolegheri ni mọ mị kụ Ọmoogh-we Ẹnaan phọ ạbidi. 23 Kụ areelhe phọ kolegheri ni mọ usiphi we phọ Ịzirel ọḍuanam iiruen ạramha loor esi ạsipioghom mọ ạbidi esi ạmi. Mị úpogh mun bịdi kụ mị ạngo ọgel kụ ạbumulogh-ḍien ạbidi kụ ọkpar opu bịdi kụ ọze bịdi ẹgham. 24 Mị ạngo bịdi ịdi ẹkpianaan bịdi esi ẹ́ḅaal phọ ạbidi rꞌẹkaraph eḍighinom ịyaar phọ ạbidi, kụ mị ạgbol loor ạbidi.”
25 Ọmoogh-we dị ạmoogh oomo ịikpo ạḅem, “Kụ ọlo nyịidipho mị kạnma ighirigiir ẹemara ẹemara ạJekob, weye phọ Ịzirel, ạḅile aḍume bịdi. 26 Mem dị bịdi ọḅile odi rꞌẹepho sịphe ade phọ ạbidi dị rꞌoye ophighemi ạbidi úlho mun, bịdi kotue ni obula ịpe oofolomi bọ bịdi esi aal ạmi phọ. 27 Esi oḍeenaan ịbadi areelhe phọ mọ mị oye aruukuan, mị kạsighe weye ạmi ạḍua oomo ạramha phọ ạbumulogh-ḍien ạbidi kụ odi ghan bọ aḅulemi. 28 Kụ awe phọ ạmi ogbi olegheri mọ mị kụ Ọmoogh-we Ẹnaan phọ ạbidi. Bịdi kolegheri ịphen phọ loor esi dị mị ụghiom bịdi dọl ạrebene kụ maakpomoghi bịdi aḅulemi de ạbidi, dị rꞌoniin ọnyo ạbidi ọman ụ́bile. 29 Mị kaḍighi ni ịdi uwaloor ạmi kasoorom weye phọ Ịzirel kụ kạ́gbol mun loor ạbidi. Mị Ọmoogh-we dị ạmoogh oomo ịikpo kụ mạḅem.”