Ẹnaan ẹsighe Gog reḍighinom oḍighi phọ ọdi
38
Ọmoogh-we phọ ụḅaanaan ịmi. 2 *Ọdi ạḅem, “Oye dị kamugh ni, ḅạaghiom Gog, ogbogh ọdaam areelhe ạMesek rꞌaTubal sịphe ade phọ ạMagog. Pạranaan nyọdi 3 kụ ạḅeni nyọdi mọ mị Ọmoogh-we dị ạmoogh oomo ịikpo kụ ạmulogh-ḍien ọdi. 4 Mị kakiton nyọdi, ạkomoghi siḅaph sịleegh ọdi kụ ạkogh nyọdi rꞌaḍita awe ẹgham mọ ọdi ạḍuanam. Awe ẹgham ọdi rꞌạrusu ọdi rꞌạbuphe rokiilom bọ, ọbugh ni ḍita kụ tọrobo ọnyo ẹgham ạpam ọsuaram rꞌelhool ẹgham. 5 Awe aPasia, Sụdan rꞌạLibia odi rꞌọdi, kụ oomo ạbidi ọpam ịsuaram rꞌaroghoony okuron. 6 Oomo ạbuo ẹgham ịsiphe arere phọ aGomer rꞌạBet Togama ẹpe ephunom mọ odi rꞌọdi, kụ ịduon kẹn kụ ịdi awe ịnon areelhe odi rꞌọdi. 7 Ḅẹni nyọdi ọdi aakolobian kụ ạḅeni sita awe ẹgham mọ ọdi mọ ọnya kụ okori. 8 Ịbadi ạsia reten kụ mị ạto ạngo nyọdi mọ azuom ẹgham eelhe dị we phọ ụson ịbadi arikpisi kụ oru ookpomoghi kụ odi ghan dọl dị rókiilaan ghan ẹgham. Ọdi kazuom rạaḅaraph phọ Ịzirel ịpe ọḍuaghu bọ kụ awe ụ́tol ghan bọ mem dị ebia, kụ ọlo eḍighi esi dị oomo awe odi nyịidipho rꞌẹepho. 9 Ọdi rꞌawe ẹgham mọ ọdi rꞌịbadi areelhe phọ rꞌọdi kozuom mụdi oghim kụ ookpereghiom de phọ mụdi ọotu.”10 Ịphen kụ ịdi Ọmoogh-we dị ạmoogh oomo ịikpo ạḅeni Gog: “Mem dị ẹteeny, nạ kamiigh ọmoogh ịkaraph ịitughian. 11 Nạ kạatughian ozuom eelhe lọ ẹloghonaan ílho dị awe phọ odi dọl dị ịyaar ị́ḅogh kụ orughogh rꞌẹepho sịphe ạramha dị úkoony kụ ị́moogh ịsuaram. 12 Nạ kabum amiighi rạraar awe phọ dị orughogh rạmha dị mepheeghu ghan. Uukpomoghi bịdi reelhe phọ kụ nyịidipho bịdi mọmoogh ịnam rꞌạsikenegh kụ otughogh sịphe ịraar-areten aḅirini phọ. 13 Aweye aSiba rꞌaDedan rꞌabumuul ḍighi dị ọḍua rạmha aSpen kopuru nyịna mọ, ‘Nạ maakpomoghi we phọ ạna azuom ẹgham ịlo omiighi owum ạraraar ḍụghum? Edi ologhi ạna ọsighe asilva rꞌagol, ạsinam rꞌaruphua, kụ orelhe ọḍuanam rꞌoomo ạraraar phọ omiighi bọ ḍụghum?’”
14 Kụ Ọmoogh-we dị ạmoogh oomo ịikpo urom ịmi ọḅeni aGog ịpe ọdi rạḅeni bọ nyọdi: “Nyịidipho mem dị awe ạmi Ịzirel odi dọl dị ịyaar ị́ḅogh, nạ kaḅetenu 15 sịphe esi phọ ạna ẹpe ẹekela ephunom mọ, aḍiemiom ḍigbogh aḍita awe ẹgham dị ọmoogh ịikpo, kụ ọḍua ịbadi areelhe kụ oru, dị oomo ạbidi rokiilom ghan rụsu. 16 Nạ kazuom weye phọ ạmi Ịzirel mụdi oghim dị rakugh kạḅeeny de phọ. Mem dị amem mọ ẹteeny, mị karom nyịna ozuom ade phọ ạmi esi oḍeenaan areelhe phọ oye dị mị aru, oḍeenaan ạdol aruukuan phọ ạmi esi ịpe mị ạsighe bọ nyịna aḍighinom. 17 Nạ kụ ẹdi mị ạghaaph ghan ịlo ạna mem dị mebia, mem dị mị ạsighe butelhedom ạmi riil phọ Ịzirel kụ ạḅeniom aleenye mọ riiḍio dị retu, mị kạsighe oye atu dị kazuom Ịzirel.” Ọmoogh-we dị ạmoogh oomo ịikpo kụ mạḅem.
Ẹnaan mẹlhiom Gog
18 Ọmoogh-we dị ạmoogh oomo ịikpo ạḅem, “Ḍio dị aGog azuom Ịzirel, kepin ni esi ạmi. 19 Rꞌophin ologhi mị ạḅem amitiom mọ ḍio phọ ạḍiphe ade phọ Ịzirel kepiigha ni. 20 Tọrobo ena rꞌẹnun, tọrobo ẹnam ẹlo ẹbugh rꞌẹlo eghom, rꞌạtorobo oye lọ odi sịen ade phọ kapiigha ni loor esi oghiilaan ạmi. Aruugum kemeleghu, oogbom ọphiiny kaḅinyonu, kụ tọrobo iikpe kemeel li. 21 Mị kaakperemiom Gog rꞌạtorobo ọdo ịminimiin. Mị Ọmoogh-we dị ạmoogh oomo ịikpo kụ mạḅem. Awe ọdi oniin kagim nyoniin elhool ẹgham. 22 Mị kạliom nyọdi rꞌẹzegh rꞌozu ịḅaal. Erise ọlophia rꞌoghim iiḅoghoḍi ibikpo, kụ ẹḅaram nịan rꞌạsolfa, kụ kẹḍua ạnyu eekuom loor ọdi rꞌawe ẹgham ọdi rꞌaloor ịnon areelhe lọ eḍigh ooḍikuan rꞌọdi. 23 Ịduon kụ ịdi mị kaḍeenaan oomo areelhe phọ mọ mị ạbugh ni ḅịle mọ mị oye aruukuan. Kụ bịdi ogbi olegheri mọ mị kụ Ọmoogh-we phọ.”