Ọtomaam Ijipt ọsaga
31
Ḍịḅel aḍio omuneniom ịraar ụnwanyu esi ạlha dị emuneniom ḍioph rꞌaḍiniin sịphe ạdol iiruen phọ ayoor, Ọmoogh-we phọ ụḅaanaan ịmi. 2 Ọdi ạḅem mọ,“Oye dị kamugh ni, ḅẹni ọdaam mọ Ijipt rꞌoomo awe ọdi:
Pọ eeghe ịdi nạ ạmoogh ịikpo!
Eeghe kụ ẹdi mị kạtomaam nyịna?
3 Nạ ạkigh ọsaga ẹpe Lẹbanon
Dị ạmoogh ịla dị ẹnighe ẹḅile ẹgodo,
Oreeny dị aphoph kụ asi okuaḍio.
4 Ạmuum ạrol dị ạloghonaan ḍịghaagh mọ aphoph
Rꞌọphiiny dị odi ude omitiom ghan ạmuum.
Ạriphiiny phọ ịngo ghan mụum esi phọ oreeny phọ rasi bọ
Kụ ẹlogh sikol ẹghiom oomo ireeny ạruukpua phọ.
5 Loor esi dị ạmuum dị ạmanam ạrol loor,
Ọdi aphoph apu ịnon ireeny.
Ịla phọ ẹgbagara kụ ẹdoony.
6 Tọrobo ọdo ịnun ịlogh ruutu sịphe ịla phọ;
Ilhom ịnam mọ ịmar nmụny sịphe uba oreeny phọ;
Areelhe aḅirini phọ ụrol zin phọ kụ ophooghian.
7 Pọ eeghe ẹnighe oreeny phọ —
Ạmaar apoph, rꞌịla dị ẹdoony.
Ạsini ọdi ẹki ude ẹteeny sikol ạmuum dị rakilogh.
8 *Ọsaga ólho sịphe oghoony Ẹnaan dị kọtomaam.
Ọnon oreeny kọ̋moogh ghan ọdo ịla phọ ịpe,
Oreeny kọ̋rol ghan dị ịla ẹnighe ọmiin ịdipho.
Oreeny ólho sịphe oghoony Ẹnaan dị ạnighe ịduon.
9 Mị kụ uḍighi bọ ịyaar dị ạnighe rꞌịla dị ẹwalala.
Aḍighi oreeny dị tọrobo ọnon oreeny ẹpe Iden, oghoony phọ Ẹnaan,
Agbeghe ghan.
10 “Kụ nyịidipho mị Ọmoogh-we dị ạmoogh oomo ịikpo kạḅeni nyịna ịdi kemitenaan oreeny phọ ọpo asi bọ tụtu ạteeny okuaḍio phọ. Ịdipho ọdi aphoph bọ rạki kụ ẹdi ọdi raabaga; 11 loor ịduon phọ mị maghel nyọdi kụ ooruen ọdaam kụ kạḅile ạmoogh. Ọdi kạngo oreeny phọ ọpo ịdi ẹkpianaan loor ẹkaraph ẹrolom mọ. 12 Aruuruen dị ụ́moogh ọnma ighirigiir kụ koler osiemi ude bịn ọbile ọḍua. Ịgbagara ịla phọ ewunughian bọ kemeleghuom tọrobo ẹeḅaraph rꞌeḍiiny sịphe eelhe phọ. Oomo areelhe phọ ẹrol ghan bọ sịphe uba phọ ọdi kọḍuaghu ni. 13 Ịnun phọ ketu kụ ẹlel oreeny phọ mameel bọ, kụ ilhom ịnam mọ ẹezeghi ịla phọ. 14 Kụ iḍighi kụ emiigh nyịidipho kụ ẹghi ghisigh, oreeny ólho mun, tọrobo ịlo ozuom mụum, dị kapoph mun ạtol ịdipho ḅịle mꞌonyu ịla phọ osiemi okuaḍio esi dị eleeny ịdipho ḍiphoph. Oomo ạbidi komuughu ni ịdipho awe iphulupul rꞌịḅaal, dị kokeel aani ni ọteeny bụphe mosi bọ ọmar iḍim.”
15 Ịphen kụ ịdi Ọmoogh-we dị ạmoogh oomo ịikpo ạḅem: “Mem dị oreeny phọ agheel ọmar iḍim, mị kaḍighi ịdi ạrumuum mọ edi bọ ude phọ keekpereghiom nyọdi kụ eḍighi eḍeenaan omoghinaan. Mị kạpam rịphiiny phọ ạmeremi kụ kámeera asikol phọ ekil. Loor esi dị oreeny phọ mamugh bọ, mị kaseere ufiri ạnyu ạraaḅaraph ạLebanon kụ aḍighi oomo ireeny phọ edi bọ ẹekpua phọ ekeel ọnam. 16 Mem dị mị asiemi nyọdi ọmar iḍim, ạḍiaḅa emeel phọ ọdi kepighemi ni reelhe phọ. Oomo ireeny phọ Iden rꞌoomo ịma ireeny phọ ịpe ọrophom bọ mụum ẹpe Lẹbanon dị memuughu kẹmoogh iboh ọnaghan emeel phọ ọdi. 17 Bịdi kẹdaphan nyọdi ekeel ọmar iḍim otulan rꞌạbulo momeel. Kụ oomo ạbulo odi eeḍian oogho ọdi kọwalala sịphe areelhe phọ.
18 “Oreeny phọ kụ ọdaam mọ Ijipt rꞌoomo awe phọ ọdi. Ireeny phọ ẹpe Iden bịn ípoph ịdi ẹnighe epu ọmiin. Kụ ọlo nyịidipho, ịdipho ireeny phọ ẹpe Iden, ọdi kạki ọmar iḍim ạdaphan bụphe Ẹnaan úlegheri bọ rꞌạbudi ọze ẹgham. Mị kụ mạḅem.” Ọmoogh-we dị ạmoogh oomo ịikpo kụ ạghaaph.