Ọdaam Ijipt ọtomaam eghol
32
Ḍịḅel aḍio omuneniom aḍioph rꞌịyal ụnwanyu esi ạlha dị emuneniom ḍioph rꞌịyal sịphe ạdol iiruen phọ ayoor, Ọmoogh-we phọ ụḅaanaan ịmi. 2 Ọdi ạḅem mọ, “Oye dị kamugh ni, pụr rụru ọdaam mọ Ijipt. Ḅẹni nyọdi dom mọ aḍien dị ẹḍua ḍịghaagh ạmi: Nạ raḍighi ghan ịdipho ạnam-dịka sịphe ogbo areelhe phọ, kụ nạ ạkar ạtol mụdi eghol dị rẹguph kẹḅeeny ọphiiny. Nạ agir mụum mọ rꞌaruwol ạna kụ ạpue rịphiiny phọ. 3 Mem dị ịbadi areelhe ookpomoghan, mị kasiph nyịna loor ọzuguru ạmi kụ aḍighi ịdi bịdi koḍur nyịna opune ọgbal. 4 Mị katebeeny nyịna ude kụ ạmagh oomo ịnam rꞌịnun aḅirini phọ mọ ạa nyịna. 5 Mị kaakpereghiom rạaḅaraph rꞌariḍiiny ḍizu phọ ạna mem dị mẹḅor. 6 Mị kazu ịḅaal ạna tụtu eleeny rạaḅaraph phọ emuza sikol phọ. 7 *Mem dị mị aphiemi nyịna, mị kakpereghi okuaḍio phọ kụ agbuurogh rạanaan phọ. Erumuḍio phọ kẹbooghian ọman ọotu phọ, kụ ụnwanyu kámitiom ḍịḅaal. 8 Mị kaḍime oomo ạraraar lọ kẹngo ḍịḅaal ẹpe kꞌạke kụ aakpereghiom aḅirini phọ ạna ufiri. Mị Ọmoogh-we dị ạmoogh oomo ịikpo kụ mạḅem.9 “Ịbadi areelhe kẹeḅaghami ni mem dị mị agbeel iphiligba mọ kophiemi nyịna aleenye reelhe dị nạ kọ̋naghan ghan kꞌekulha. 10 Ịpe mị kaḍighi bọ nyịna ịbadi areelhe kokperenom ni. Mem dị mị ạphiph elhool ẹgham ạmi, ạbudaam kopiigha rꞌeepuph. Ḍio lọ nạ ameel, oomo ạbidi kokper kper rꞌoghiilaan, ịlo bịdi kọtol.”
11 Ọmoogh-we dị ạmoogh oomo ịikpo ạḅeni ọdaam mọ Ijipt, “Nạ kazuan elhool ẹgham ọdaam ẹmha ạBabilon phọ. 12 Mị kạngo ọgel awe ẹgham ẹkaraph eḍighinom ịnon areelhe ọsighe rolhool ẹgham ạbidi ọzeeghiom oomo awe ạna. Oomo awe phọ ạna rꞌạtorobo ịyaar lọ nạ raabagaam kopiemi ni. 13 Mị kạkanyan sịnam ạna tọrobo esi epogh-ạmuum. Awe ḅịle rꞌạsinam kẹ́tol mun dị kegir mun mụum mọ. 14 Mị kaḍighi ịdi ạmuum mọ kạpo kụ ạserere kụ ạriphiiny phọ kẹtol nam. Mị Ọmoogh-we dị ạmoogh oomo ịikpo kụ mạḅem. 15 Mem dị mị atene Ijipt esi dị ịyaar ílho mun kụ aphiemi oomo ạbulo ọrol ghan sịphe, bịdi kolegheri ni mọ mị kụ Ọmoogh-we phọ. 16 Ọphur ạruru phọ ọphon katen ḍụor emoghi. Ạnmariir areelhe phọ kọmoor ri omoghinaan Ijipt rꞌoomo awe ọdi. Mị Ọmoogh-we dị ạmoogh oomo ịikpo kụ mạḅem.”
Ọmar iḍim
17 Omuneniom aḍioph rꞌoogh aḍio ọḅel ụnwanyu esi ạlha dị emuneniom ḍioph rꞌịyal sịphe ạdol iiruen phọ ayoor, Ọmoogh-we phọ ụḅaanaan ịmi. 18 Ọdi ạḅem, “Oye dị kamugh ni, moghinaan oomo ịbadi awe phọ Ijipt. Ḅạr bụo ịpheri phọ areelhe phọ ọmoogh bọ ịikpo phọ rꞌạbidi kụ ạghiom ọmar iḍim. 19 Puru bịdi mọ:
“‘Nyina regbi mọ nyina kụ ịnighe
epu tọrobo oye ḍụghum?
Nyina kekeel ọmar iḍim
kụ ẹmina sịphe ogbo ạbuphe Ẹnaan úlegheri bọ.’
20 “Awe phọ Ijipt komeel aani rꞌawe phọ ạbuphe ọze bọ ẹgham. Elhool ẹgham ẹnya ọze oomo phọ ạbidi. 21 Arephelegbe ẹgham mọ rꞌạbuphe ooḍikuan bọ rꞌawe phọ Ijipt ọmagh bịdi ogheelom ọmar iḍim. Bịdi ọlo mọ, ‘Awe phọ Ẹnaan úlegheri bọ, bụphe ọze bọ ẹgham mọ moru osi ẹphen, kụ odi ghan sịphe!’
22 “Asiria odi sịphe rꞌariiḍi awe ẹgham ạbidi dị ekoom. Ụze oomo ạbidi ẹgham, 23 kụ iiḍi phọ ạbidi edi ude riisi dị ẹkel ọmar iḍim. Oomo awe ẹgham ọdi momugh ẹgham, kụ iiḍi ạbidi ekoom oḍi ọdi. Ghạlamo ịduon phọ amem ịrol li dị bịdi oḍighi ịlo aḍiigu de ạbuphe odi bọ.
24 “Ilam ọdi sịphe rꞌiiḍi awe ẹgham ạbidi dị ekoom. Ụze oomo ạbidi ẹgham, kụ bịdi ọghi, dị úḍuna, ọmar iḍim. Eye bịdi uleenye ḍiigu kụ nyịidipho bịdi momeel omugh rꞌumugholoor. 25 Ilam ameel eniin esi rꞌạbuphe ọze bọ ẹgham kụ iiḍi awe ẹgham mọ ekoom nyọdi. Oomo ạbidi úḍuna, oomo ạbidi ụze ẹgham. Eye bịdi uleenye ḍiigu kụ nyịidipho bịdi momeel omugh rꞌumugholoor, kụ ọmina aani ịdipho ạbuphe omugh bọ ẹgham mọ.
26 “ẠMesek rꞌaTubal rꞌiiḍi awe ẹgham ạbidi dị ekoom. Oomo ạbidi úḍuna, oomo ạbidi ụze ẹgham. Ghạlamo ịduon phọ amem ịrol li dị bịdi oḍighi ịlo aḍiigu bụphe odi bọ. 27 Ụ́ngo bịdi maḍi eghuan ịdipho arephelegbe ẹgham ageedi, bụphe ọghi bọ rꞌoomo ịinya ọmar iḍim, rolhool ẹgham ạbidi uḅetenom ghan rụmhu ạbidi rꞌịsuaram ookpereghiom siloor ạbidi. Arephelegbe phọ ạbuen amem ịrol li dị ọmoogh ni ịikpo dị ẹmanam ọdegh ạbuphe odi bọ.
28 “Ịpe kụ ịdi kopiemi bọ we phọ Ijipt esi aḍita ạbuphe úḍuna bọ dị ọze ẹgham.
29 “Idom odi sịphe rꞌạbudaam ọdi rꞌạbudi ọdaaghi. Bịdi uḍighi weye ẹgham dị ọmoogh ịikpo, kụ nyịidipho bịdi momeel ọmar iḍim rꞌạbuphe úḍuna bọ dị ọze ẹgham.
30 “Oomo ịkpana ạbudaam mọ ạga ephunom mọ odi sịphe, kụ ịdipho kẹn kụ ịdi awe aSaidon odi aani. Ịikpo ạbidi mem ileenye ḍiigu, kụ nyịidipho bịdi mọrol dọl aroofola rꞌạbuphe ọze bọ kụ moḍi bọ, dị úḍuna. Bịdi ọmoogh iniin aroofola rꞌạbuphe mogheel bọ ọmar iḍim.
31 “Ọmiin oomo ạbuen phọ ọze bọ ẹgham mọ kẹḅeeraan ni ọdaam Ijipt rꞌawe ẹgham ọdi,” Ọmoogh-we dị ạmoogh oomo ịikpo ạḅem.
32 “Mị kụ uḍighi bọ kụ ọdaam mọ Ijipt ạdegh bọ bụphe odi bọ, kụ kokiigh ni nyọdi rꞌoomo ạbuo ẹgham ọdi kụ oḍiom rꞌạbuphe úḍuna bọ omugh bọ ẹgham mọ.” Ọmoogh-we dị ạmoogh oomo ịikpo kụ mạḅem.