5 “Ẹgham mọ ẹpe phọ kẹziom aani we ẹgham mọ ophir bọ ẹpe Sụdan, Lịdia, Lịbia, Arebia, Kub rꞌịsiphe ogbo awe phọ ạmi.”

6 Ọmoogh-we dị ạmoogh oomo ịikpo ạḅem, “Emiigh Migdol ẹpe ephunom mọ kụ ẹteeny Ạsuan ẹpe esoorom mọ oomo ạbuo ooḍikuan rꞌIjipt kụ robe ẹgham kọze ni mem ẹgham. We ẹgham mọ Ijipt roobagaam ghan bọ kopiemi ni. Mị Ọmoogh-we dị ạmoogh oomo ịikpo kụ mạḅem. 7 Ade phọ kẹkar eegulaan sịen aḅirini phọ, ḅịle rạmha phọ rꞌịyaar kẹ́tol mun. 8 Mem dị mị ạlogh nịan Ijipt kụ bụo ooḍikuan rꞌọdi mọze, bịdi kolegheri ni mọ mị kụ Ọmoogh-we phọ.

9 “Mem dị aḍio phọ ạḍiphe ẹteeny kụ mophiemi Ijipt, mị katom butelhedom dị oḍiku rụnwunyaru ọoḅaghami awe ạSudan dị ụ́utughianam ologhi, kụ bịdi kokiilaan ni. Aḍio phọ ạḍiphe retu ni!”

10 Ọmoogh-we dị ạmoogh oomo ịikpo ạḅem, “Mị kạsighe Nẹbukadnezar ọdaam mọ ạBabilon akunughiom ẹelha phọ Ijipt. 11 Ọdi rꞌạbugbagara awe ẹgham mọ ọdi kotu oogulemi de phọ. Bịdi kozuom Ijipt rꞌarolhool ẹgham kụ sịphe ade phọ iḍim bịn kụ kemuza. 12 Mị kạkaragharami Ọphiiny aNail phọ kụ aḍighi ịdi ạbukaraph awe kụ kọtooghi rạraar kụ ọngo Ijipt. Aruuruen koogulemi oomo eelhe phọ. Mị Ọmoogh-we phọ kụ mạḅem.”

13 Ọmoogh-we dị ạmoogh oomo ịikpo ạḅem, “Mị kapiemi ni ịkaaghineen ạrumugh phọ rꞌạrumugh ọkpe phọ ẹpe Memfis. Rꞌoye kạ́tol dị kạda Ijipt ḅịle mị kaakperemi oomo phọ awe phọ. 14 Mị kaḍighi ịdi rꞌoye kạ́tol ẹpe Ijipt ạga esoorom mọ kụ ạlogh nịan ẹmha phọ aZoan ẹpe ephunom mọ. Mị kạliom ẹkpana ẹmha phọ aTebes. 15 Mị kạngo ọgel ẹmha phọ aPelusiom, ekpekiom bọ Ijipt eloghoma ophin ologhi ạmi. Mị kapiemi ẹelha ẹmha phọ aTebes. 16 Mị kạlogh nịan Ijipt, kụ aPelusiom kẹtol dọl ọmiinom. Iikpe phọ aTebes keḅomoghian emeleghu kụ ạmuum aakpereghiom ẹmha phọ. 17 Ugheel ạnmuny ạramha ạHeliopolis rꞌaBubastis komugh mem ẹgham mọ, kụ oḍighi bụeri phọ we ikoli. 18 Ufiri kasoorom Tapanes mem dị mị aphiemi ịikpo phọ Ijipt, kụ awe oomo ạramha phọ ọdi koḍighi bụo ikoli. 19 Mem dị mị ạliom Ijipt ịduon, bịdi kolegheri ni mọ mị kụ Ọmoogh-we phọ.”

20 Omuneniom oḍual aḍio ọḅel ụnwanyu phọ esi ạlha dị emuneniom ḍioph rꞌaḍiniin sịphe ạdol iiruen phọ ayoor, Ọmoogh-we phọ ụḅaanaan ịmi. 21 Ọdi ạḅem, “Oye dị kamugh ni, mị mawun ḍịghaagh ọdaam mọ Ijipt. Rꞌoye ọ́ghoroghiom ukpe ḅịle oḍigh ụ́komom ẹrol dị ẹnuun ekeel ọḅile ọphamam elhool ẹgham. 22 Nyịidipho, ịphen kụ ịdi mị Ọmoogh-we dị ạmoogh oomo ịikpo rạḅem: Mị kụ ạmulogh-ḍien ọdaam mọ Ijipt. Mị kabunughi ịyal phọ ạraghaagh phọ ọdi — ḍigey rꞌạḍiphe mewunaan bọ — kụ elhool ẹgham ekpetenaan ḍịghaagh ọdi emeel. 23 Mị kạawalami we phọ Ijipt oomo aḅirini phọ. 24 Kụ mị agbi ọḅile omoonomi ạraghaagh ogbogh ọdaam ạBabilon phọ kụ ạlogh elhool ẹgham ạmi rạghaagh ọdi. Kụ mị abunughi rạghaagh ọdaam mọ Ijipt, kụ ọdi ạkonan kụ amugh risigh ạmulogh-ḍien ọdi. 25 Ii, mị kadughe nyọdi kụ ạngo ịnyaam ogbogh ọdaam ạBabilon phọ. Mem dị mị ạngo nyọdi elhool ẹgham mọ ạmi kụ ọdi ạmaaniom Ijipt, tọrobo oye kalegheri ni mọ mị kụ Ọmoogh-we phọ. 26 Mị kạawalami weye Ijipt oomo aḅirini phọ. Kụ bịdi ogbi olegheri mọ mị kụ Ọmoogh-we phọ.”