Aguugh-ọsaam mọ alian bọ
24
Omuneniom aḍioph aḍio omuneniom aḍioph ụnwanyu esi ạlha dị emuneniom esugha sịphe ạdol iiruen phọ ayoor, Ọmoogh-we phọ ụḅaanaan ịmi. 2 *Ọdi ạḅem, “Oye dị kamugh ni, gẹ aseere ḍio phọ arodon, ịdi eḍighi bọ ḍịen kụ aḍio phọ ạḍiphe ogbogh ọdaam ạBabilon phọ amiigh bọ oghoonyom ọsighe aJeruselem. 3 Ḅẹni we ịgbagharan phọ ạmi ḍidogh phọ ạḍien mọ mị, Ọmoogh-we dị ạmoogh oomo ịikpo phọ, madoghonaan bịdi:“Lọgh mụum amuzeḍi guugh phọ
kụ ạdepheri sịphe ạnian phọ.
4 Lọgh ologhi phọ ọkaraghi igey itigh ẹnam —
sikpe phọ rꞌaruwol phọ.
Muzeḍiom nị rꞌịḅarara dị nạ ạson.
5 Ịnam mọ eḍighi ịlo ọkaraghi ogey oyool-ọga;
kpol ịpe phọ eeḍian aguugh phọ.
Meera ạmuum mọ aphul;
sạ ịḅarara phọ rꞌiphulupul phọ.”
6 Ịphen kụ ịdi Ọmoogh-we dị ạmoogh oomo ịikpo phọ rạkaaph bọ: “Ẹmha ạrookom-enu phọ mephe! Ọdi ạkigh ịdipho aguugh dị alian dị rạ́ḅaal ghan. Etigh etum etigh ẹnam rọsighe ghan komitiom, kụ rꞌeniin ísugha. 7 Ọko enu ạrol li sịphe ẹmha phọ, kụ ọlo ịḅaal phọ úzu sịphe ade phọ ẹpe ophugh phọ mụbooghi bọ; ịḅaal phọ uzu ạnyu oopho aḍighiigh. 8 Mị mạwile ịḅaal sịphe, esi dị kọ́booghi, ekpisi dị ọdi rạwa oḅulemian rꞌọghagh ologhi.”
9 Ịphen kụ ịdi Ọmoogh-we dị ạmoogh oomo ịikpo phọ rạkaaph bọ: “Ẹmha ạrookom-enu phọ mephe! Mị rꞌaloor kakpol ịpe phọ. 10 Ịsighe eru ịnon ịpe! Ịpiph sinem ạnian phọ! Ịsa ẹnam mọ! Ịsa amooboph phọ amuneen! Iguom nịan ịḅarara phọ. 11 Nyịidipho dẹpheri oopho aguugh enaba phọ ạnyu iiḅu phọ kụ ameera ọdi ạghologhol ada. Aguugh phọ ọphue bọ esi ịko kạḅile ni aseleman mem dị olian phọ mạnu ạḍua, 12 kụ ọlo oomo ịpe melian bọ kẹ́ḍua ẹmadan sịphe asinem ạnian phọ. 13 Jeruselem, iiḍighi olhe ẹmha ạna mẹepu nyịna. Ghạlamo ịduon mị ạkparagha bọ ịlo ọosa ạna, nạ ụrolanaan ni esi ẹ́ḅaal. Nạ kạ́ḅaal mun tụtu nạ aloghoma ịdi ẹmanam ịikpo ọghagh ologhi phọ ạmi. 14 Mị Ọmoogh-we dị ạmoogh oomo ịikpo kụ mạḅem. Amem mọ mẹteeny dị mị kaḍighi. Mị kạ́ḅitonaan ịkaraph anyina mꞌoḍeenaan igbiririph mꞌọmoogh ọnma ighirigiir. Kọliom ni nyịna esi ịpe nạ maḍighi bọ.” Ọmoogh-we dị ạmoogh oomo ịikpo phọ kụ mạḅem.
Aḍuugh ạnir oyil phọ
15 Ọmoogh-we phọ ụḅaanaan ịmi. 16 Ọdi ạḅem, “Oye dị kamugh ni, rꞌaḍiniin ạḍigiph mị kạsighe ạḍuanam oye phọ nạ ạkaraghi bọ ạphomoghian. Kápuru ịyaar mꞌomoghi mꞌozu ẹnum izin. 17 Awe kụ́naghan dị nạ raḍurogh izon ịlo emoghi. Kạ́ki esi rꞌoopho ẹmhu mꞌoopho ẹda esi oḍeenaan ọto. Kápua ghisigh ạna mꞌolhe eḍien phọ ẹpe ạbuo ọto role ghan bọ.”
18 Eḅon ạḍiroor ịsiphe aḍio phọ, mị ụḅaanaan ghan rꞌawe phọ. Dulhe phọ ạḍiphe ạnir ạmi amugh, kụ ḍịeri phọ aḍio phọ mị uḍighi ịdipho mụḅeni bọ ịmi. 19 Awe phọ upuru ịmi mọ, “Uḍighi ika kụ nạ raḍighi bọ ọdo phọ ịphen?”
20 Kụ mị ạḅeni bịdi mọ, “Ọmoogh-we phọ ụḅaanaan ịmi kụ ụḅeni ịmi 21 ịlo ọngo anyina Ịzirel dom mọ ạḍien: nyina epoophe loor esi ịikpo Otu Ịiḅereghi phọ. Ịḅeeraan inyina ophogh ghan rꞌọghi ghan ịsiphe, kụ ọlo Ọmoogh-we phọ kạapu ni esi phọ. Ḅịle bụbam ạbuo arughunotu phọ anyina bụphe ọwile bọ sịphe Jeruselem kọze ni erugh ẹgham. 22 Pọ kụ amem dị nyina keḍighi ịphen mị maḍighi bọ. Nyina képua sighisigh anyina mꞌolhe eḍien phọ ẹpe ạbuo ọto role ghan bọ. 23 Nyina kẹ́ki rꞌoopho ạrumhu mꞌoopho ẹda mꞌọto mꞌomoghi. Nyina kepe ẹḍua loor esi ịkaraph phọ anyina, kụ oniin ạkuph ạngo nyoniin. 24 Pọ kụ amem dị mị kaḍighi eḍeenaan esi anyina; nyina keḍighi tọrobo ịyaar dị mị maḍighi. Ọmoogh-we phọ ạḅem mọ mem dị ịphen phọ emite, nyina kelegheri mọ ọdi kụ Ọmoogh-we dị ạmoogh oomo ịikpo phọ.”
25 Ọmoogh-we phọ ạḅem, “Nyịidipho, Oye dị kamugh ni, mị kạsighe ạḍua esi ạbidi Otu Ịiḅereghi ịikpo phọ ọpo aḍighi bọ ophoophe aloor rꞌọḅaal ologhi phọ ạbidi, ọpo ạḅeeraan bọ bịdi ophogh rꞌọghi ghan. Ḅịle mị kạsighe ạḍuanam nmụny rꞌạnmanyaan phọ ạbidi. 26 Ḍio phọ ạḍiphe mị kaḍighi bọ ịphen phọ, oniin ọlo akpetenaan muphe phọ katu ni kụ ạḅeni nyịna ịpe memite bọ. 27 Egina phọ aḍio phọ ạḍiphe, koḅuleminaan ni nyịna ịikpo ọghaaph ghan ịyaar phọ nạ aroph bọ, kụ nạ ạḅaanaan nyọdi. Ịduon kụ ịdi nạ kaḍighi eḍeenaan esi awe phọ, kụ bịdi kolegheri ni mọ mị kụ Ọmoogh-we phọ.”