Ịkaraph ịmiin dị ọmiinaan Amon
25
*Ọmoogh-we phọ ụḅaanaan ịmi. 2 Ọdi ạḅem, “Oye dị kamugh ni, ḅạaghiom eelhe phọ Amon. 3 Ḅẹni bịdi mọ ọnaghan ịphen mị Ọmoogh-we dị ạmoogh oomo ịikpo rạḅem bọ: Ologhi anyina ạḅaal li ọmiin dị ọopu Otu Ịiḅereghi phọ, ọmiin dị moogulemi de phọ Ịzirel, ọmiin dị awe phọ aJuda mosumughu ạaghian. 4 Loor esi dị nạ ạmoogh bọ iboh phọ, mị kạngo ọgel arughunughun bụphe ọḍua bọ ẹdala emitenom erumuḍio phọ ọkpar ipu inyina. Bịdi kodoghoḍi rugbogo ạbidi ẹpe eelhe phọ anyina kụ otughogh. Bịdi kụ kole iimuma phọ ọḅile ọmoophi mạmaam ạnam mọ muḍighi bọ mụo anyina. 5 Mị katene ẹmha phọ aRaba esi oseere ghan ạsikamel kụ ạḅile atene oomo eelhe phọ Amon esi oseere ghan iyool-ịga, ẹrol dị nyina elegheri mọ mị kụ Ọmoogh-we phọ.6 “Ịphen kụ ịdi Ọmoogh-we dị ạmoogh oomo ịikpo rạḅem: Nyina ikpoolha rạghaagh ẹḅile epeleghu esi iboh. Nyina ẹḅitonaan de phọ Ịzirel. 7 Loor ịphen phọ nyina eḍighi bọ, mị kịḅogh inyina ạngo ịnon areelhe dị kemiighi rạraar anyina kụ ebum iniin. Mị kiigulemi inyina kpel kpel kpel dị nyina kéḍighi mun eelhe ghạlamo rꞌọmoogh ade ḍịo anyina. Kụ nyina egbi olegheri mọ mị kụ Ọmoogh-we phọ.”
Ịkaraph ịmiin dị ọmiinaan Mọab
8 *Ọmoogh-we dị ạmoogh oomo ịikpo ạḅem, “Loor esi dị ạMoab mạḅem bọ mọ eelhe aJuda ẹkigh oomo ịpheri phọ areelhe phọ, 9 mị kạngo ọgel awe ozuom ẹgham rạmha phọ ịpe eḅegh bọ rụuku phọ ạMoab, kụ ọḅaram ghạlamo rꞌịma ạramha phọ ịphen — Bẹt Jesimot, Baal Mion, rꞌaKiriataim. 10 Mị kạngo ọgel arughunughun bụphe ọḍua bọ ẹdala emitenom erumuḍio phọ mọ ọkpar opu Mọab, kụ ọḅaram Amon, ẹrol dị ạMoab keḍighi ghan bọ nịiniin eelhe. 11 Mị kạliom Mọab, kụ bịdi olegheri mọ mị kụ Ọmoogh-we phọ.”
Ịkaraph ịmiin dị ọmiinaan Idom
12 *Ọmoogh-we dị ạmoogh oomo ịikpo ạḅem, “Awe phọ Idom uḍighi ẹkaraph eḍighinom oḅulemian aJuda, kụ oḅulemian phọ ọpo maruomaan Idom apum dị eekuna ílho. 13 Nyịidipho mị mạghaaph raleenye mọ mị kạliom Idom kụ akiigh tọrobo oye rꞌẹnam lọ edi sịphe. Mị katene esi dị mephe, emiigh ẹmha aTeman kụ esi ẹmha aDedan, kụ we phọ kọze esi ẹgham. 14 Awe phọ ạmi Ịzirel kughol li ịmi oḅulemian Idom, kụ bịdi oḍighi ịdi Idom kologhoma ophin-ologhi phọ ạmi. Idom kalegheri ịyaar lọ eru oḍighi oye dị mị aḅulemian.” Ọmoogh-we dị ạmoogh oomo ịikpo kụ mạḅem.
Ịkaraph ịmiin dị ọmiinaan Filistia
15 *Ọmoogh-we dị ạmoogh oomo ịikpo ạḅem, “Awe phọ aFilistia oḍighi ẹkaraph eḍighinom oḅulemian ạbuphe oḍighi bọ bụmulogh-ḍien phọ ạbidi kꞌamem dị mebia kụ opiemi bịdi rꞌogbogh ophin ologhi. 16 Kụ mị mạghaaph raleenye mọ mị kazuom we aFilistia ạze bịdi ạman. Mị kapiemi tọrobo ịyaar lọ esugha dị ẹmoogh ḍiphooghu sịphe ạḍiyaghaghaany ade phọ aFilistia. 17 Mị kạliom bịdi agey kụ ạkar aḅulemian bịdi. Bịdi kologhoma ophin ologhi ạmi. Kụ bịdi ogbi olegheri mọ mị kụ Ọmoogh-we phọ.”