Abumarani ạsipioghom
23
Ọmoogh-we phọ ụḅaanaan ịmi. 2 Ọdi ạḅem mọ, “Oye dị kamugh ni, eniin amem ịyal abumarani ụrol li. 3 Mem mọ bịdi oḍighi bọ risina kụ orugh sịphe Ijipt, bịdi uroph ni ẹnighe ạbidi kụ oḍighi bulhiom ẹmha. 4 Okumoor phọ ughol mọ Ohola (ọdi ạmeera esi aSameria), kụ ọḅam mọ oghol mọ Oholiba (ọdi ạmeera esi aJeruselem). Mị aphin ịyal phọ ạbidi, kụ bịdi ụmaranaan ịmi nmụny. 5 Ghạlamo ịduon ọdi aḍighi bọ ni ọlo ạmi, Ohola ạrolan ghan ni esi olhe ẹmha phọ kụ ạḍiḅeeraan ạruga ọdi dị ọḍua Asiria kụ oru emuza loor ọdi. 6 Bịdi uḍighi we ẹgham dị ọkpologhian iḍiil, we eghuan rꞌabugbogh ạbuo ịtooghi; oomo phọ ạbidi uḍighi riiḅi ugheel ẹgham dị rọtol ghan ạnyu ạrusu kụ ee. 7 Ọdi kụ ọyuga ọlo oomo phọ ạbuo ịtooghi Asiria, kụ ẹkaraph ẹephua ọdi erorori nyọdi ẹghi ọopu aloor ọdi esi ooseeny ghan ịkaaghineen ạrumugh Asiria. 8 Ọdi aḍighi ạghiom risigh ịpe ọdi mamiigh bọ ịlo oliom ẹmha sịphe Ijipt, ẹpe ọdi aroph bọ ẹnighe phọ ọdi. Emiigh kꞌamem mọ ọdi aḍighi bọ ọnyani, alephiri ụmina ghan rꞌọdi kụ oḍighi nyọdi oliom ẹmha. 9 Esi ịduon phọ mị ạḅogh nyọdi ạngo rụga ạbuo Asiria phọ ọdi, bụphe ọdi ạwa bọ iboom mọ. 10 Bịdi ọkarion nyọdi ạrol ẹdaḅa, ọsighe nmụny rꞌạnmanyaan ọdi, kụ roḍighi pạ kụ oghiigh nyọdi rꞌelhool ẹgham. Tọrobo ekpisi ạnmariir ụghalaghian ghan ịlo memitenaan nyọdi.11 “Ghạlamo ịdipho umarani phọ ọdi Oholiba ạmiin bọ ni ịphen phọ, ọdi eeph ghụn ạḅile ạbugh esi olhe ẹmha phọ apu ịpe Ohola ạrol bọ. 12 Ọdi kẹn ẹkaraph ẹephua imuza loor ọdi ẹlo awe eghuan rꞌabugbogh ạbuo ịtooghi Asiria phọ — ạbuo ẹgham dị odi esi iinmenan dị ekpoghoronu — kụ ẹlo ạbuo ịtooghi phọ bụphe robe ghan bọ ạnyu ạrusu, oomo ạbuphe ariiḅi ugheel ạnmuny phọ. 13 Mị ụmiin ni mọ ọdi amunughan esi olhe ẹmha, mọ umor ạnir-ephoph phọ ọpo amuneniom bọ ịyal phọ eeph kẹn ịdipho ọḅel phọ.
14-15 “Ọdi aḍiiny ạḅile aḍiiny esi olhe ẹmha phọ ọdi. Ọdi ạmoogh ḍịḅeeraan esi igbudu ạbuo ịtooghi ạBabilon dị ọkaaghi ologhi iikpe phọ kụ ogbul ịtogh-tọgh dị esoor, rꞌipoḍi ịyegheyeghe arukpe dị ẹregh okitonom risin ạbidi rꞌịma ạrakaghaam ạnyu ạrumhu ạbidi. 16 Ịduon ọdi ạmiin bọ bịdi, ạḍiḅeeraan emuza esi ọdi kụ arom rụukpaany ạghiom bịdi ẹpe Bạbilonia. 17 Ạbuo ạBabilon phọ oru ọmoogh ipesi rꞌọdi. Bịdi ọrolan rꞌọdi kụ ọopu nyọdi ịdi ẹphughan dị ekureriom mọ ọdi ạmoogh ḍikia rꞌạbidi. 18 Ọdi ạyegheron loor ọdi kụ ameera tọrobo oye alegheri mọ ọdi oliom ẹmha. Mị ạghagham rꞌọdi ịdipho mị mạrolom bọ umarani phọ ọdi. 19 Ọdi aḍighi oliom ẹmha dị eekuna ílho, aḍighi ghan ọkaraghi ịdipho ọdi aḍighi ghan bọ mem mọ ọdi aḍighi bọ ọnyani kụ arugh sịphe Ijipt. 20 Umuzeḍiom nyọdi rꞌẹephua awe igbogh ipesi bụdi ọmoogh oomo igbogh ạruuphua ịnam adool rꞌilephiri ạrusu.” 21 (Oholiba, nạ ụwa ọḅile oḅula olhe ẹmha phọ nạ ạmoogh bọ apum ịdipho ọnyani sịphe Ijipt, ẹpe alephiri opheghom bọ rꞌạramamaam ạna kụ nạ aroph bọ ẹnighe phọ ạna.)
Ọoruen Ẹnaan esi ọbam umor ạnir-ephoph phọ
22 “Nyịidipho, Oholiba, ịphen kụ ịpe mọ Ọmoogh-we dị ạmoogh oomo ịikpo rạḅeni bọ nyịna. Ạruga phọ ạbuphe mọpher nyịna kụ ọlo mị kạngo bịdi ọghagh ologhi esi ạna kụ ạsighe bịdi otu okitonom nyịna. 23 Mị kạsighe atu oomo ạbuo ạBabilon rꞌaKaldia phọ, lephiri dị ọḍua Pẹkod, Soa rꞌaKoa rꞌoomo ạbuo Asiria. Mị kaakpomoghi oomo ariiḅi ugheel phọ ạbuphe rꞌạbuo ịtooghi, oomo abugbogh ạbuo ịtooghi rꞌoomo ariphigh ugheel ẹgham mọ ạbuphe robe ghan bọ ạnyu ạrusu. 24 Bịdi kọḍua ẹpe ephunom mọ kụ otu ozuom nyịna, otumom ḍita arughuugh eghiil ude rꞌawe ẹgham. Okopha ịsuaram rꞌaroghoony ạmama, bịdi kokitonom nyịna. Mị kạḅogh nyịna ạlogh ḍịghaagh ạbidi, kụ bịdi osophonaan nyịna ọoruen esi iilogh ạbidi. 25 Loor esi dị mị rạghagham nyịna ologhi, mị kameera ni bịdi oḍighi nyịna esi ọghagh-ologhi phọ ạbidi. Bịdi kosoph ọsighe izon ạna rꞌareḅeri ạna kụ ọze nmụny ạna. Agey, bịdi kọsighe nmụny ạna rꞌạnmanyaan ạna kụ ọlogh nịan bịdi imoom. 26 Bịdi kọpanyi ọsighe iinmenan ạna kụ ọsighe ịbekulari ạna. 27 Mị kakureri ẹephua ạna rꞌạraraar isa phọ nạ maḍighi bọ emiigh kꞌamem mọ nạ ạrol bọ sịphe Ijipt. Nạ kápogh mun ịnon ịkaaghineen ạrumugh mꞌọḅile kẹn ọotughian ịlo Ijipt rꞌamem.”
28 Ịphen kụ ịdi Ọmoogh-we dị ạmoogh oomo ịikpo ạḅem: “Mị kạḅogh nyịna ạngo we dị nạ ạlogh ḍien ọḅile okia nyịna. 29 Kụ loor esi dị bịdi ọlogh bọ nyịna ḍien, bịdi kọsighe ọḍuanam tọrobo ịyaar dị nạ maḍighi ạmoogh, kụ ọwile nyịna rꞌẹdaḅa, ozughuron ịdipho oliom ẹmha. Ẹephua ạna rꞌole ẹmha phọ ạna 30 meruom nyịna ịphen phọ. Nạ uḍighi oliom ẹmha ọlo areelhe phọ kụ ạapuom loor ạna rꞌịkaaghineen ạrumugh ạbidi. 31 Nạ ụdaphan ịgbaranuom aruwol umarani phọ ạna, kụ esi ịduon phọ mị kạngo nyịna ogina phọ ọphugholom ạghelhe phọ mọ pụghol.”
32 Ọmoogh-we dị ạmoogh oomo ịikpo ạḅem mọ,
“Nạ kạpughol sịphe ọphugholom umarani phọ ạna;
ọdi ạtegh ạḅile ạkel ude.
Tọrobo oye kạmilogh kụ ạgilaam nyịna;
ọphugholom mọ mamuza.
33 Ọdi kạngo nyịna mukum ologhi rꞌookula,
ọphugholom oghiilaan rꞌamuphe,
ọphugholom aSameria umarani ạna.
34 Nạ kạpughol kụ amooph ọdi ạkaraghar,
kụ ịpherepe ipoḍi ọdi ẹpaar mạmaam ạna.
“Mị Ọmoogh-we dị ạmoogh oomo ịikpo kụ mạḅem.”
35 Nyịidipho ịphen kụ ịpe Ọmoogh-we dị ạmoogh oomo ịikpo phọ rạkaaph bọ: “Loor esi dị nạ uwula bọ ịmi kụ akiton ụgumom ịmi ọman, nạ kạmiinom ni loor esi ẹephua phọ rꞌole ẹmha phọ ạna.”
Ọoruen Ẹnaan esi ịyal phọ abumarani phọ
36 Ọmoogh-we phọ ụḅeni ịmi mọ, “Oye dị kamugh ni, nạ aakolobian ni osophonaan ọoruen Ohola rꞌOholiba ḍụghum?” Gbạanaan bịdi ịlo ịkaraph ạraraar isa phọ bịdi moḍighi bọ. 37 Bịdi molhe ẹmha ọḅile ọko enu — olhe ẹmha rꞌịkaaghineen ạrumugh kụ ọko enu ạnmuny phọ bịdi ụmaranaan bọ ịmi. Bịdi ọpinyonom rịkia nmụny phọ ạmi ọngo ịkaaghineen ạrumugh ạbidi. 38 Kụ ịpe bịn kị́di bịdi oḍighi. Bịdi ụupu Otu Ịiḅereghi phọ kụ úuko ḍio ophooghian phọ ọpo mị mamitiom bọ. 39 Ọkaraghi aḍio phọ ạḍiphe bịdi ọze bọ nmụny phọ ạmi ọphinyonom rịkia ọngo ịkaaghineen ạrumugh phọ, bịdi uru sịphe Otu Ịiḅereghi phọ ạmi kụ ọopu nyọdi!
40 “Ẹgba-gbạ amem bịdi ụghiom ghan ni sidom ọmagh awe mọ ọḍua kꞌekpisi dị ẹkel iboom oru, kụ awe phọ oru. Ịyal abumarani phọ obura mụum ọḅile ọlogha iḍiil ariḍien aḅekeeny rꞌịbekulari. 41 Bịdi ọrol ghan ạnyu ịma ạgada dị asoorom, kụ sịphe esomanan ạbidi, bịdi ọmoogh ịdaabili dị ozuom igey ạraraar, ọḅaram ịnsens phọ rꞌạmunum-ọliv phọ ọpo mị mạngo bọ bịdi. 42 Ọnaghan ni ẹḍogh aḍita ighiil awe dị ọḍua ẹpe ẹdala phọ oru. Bịdi ọlogh rạla sịphe ạraghaagh ạnmariir phọ rꞌịma aroghoony ọdaam ẹmha ạnyu ạrumhu ạbidi. 43 Kụ mị ạḅeni loor ạmi mọ bịdi roḍighinom ịdipho oliom ẹmha ạnir dị aloor medugh loor esi olhe ẹmha. 44 Bịdi ọḅile oḅula ọghi esi abulhiom ẹmha phọ ạbuen amem etum mem. Bịdi ọḅile oḅula ọghi esi Ohola rꞌOholiba, bulhiom ẹmha ạnmariir phọ ạbuphe. 45 Awe elhiom eḍighinom ịyaar kokel bịdi kụ osiph bịdi ologh olhe ẹmha rꞌọko enu, ịdi eḍighi bọ bịdi odi ghan ole ẹmha kụ ạraghaagh ạbidi ẹbiphigha rꞌịḅaal.”
46 Ịphen kụ ịdi Ọmoogh-we dị ạmoogh oomo ịikpo ạḅem: “Sịghe aru ḍita awe dị úsereghian ịlo ookperemi ạbidi rꞌomi ạbidi. 47 Meera aḍita awe phọ ụ́nighe bọ oroḅol bịdi ikpo kụ ozuom bịdi rꞌarolhool ẹgham, ọze nmụny ạbidi kụ ọsuughi ruutu ạbidi. 48 Sịphe oomo ade phọ mị kakunughi olhe ẹmha, ịdipho ọphur ạruru esi ạtorobo ạnir ịlo kále ẹmha ịdipho bịdi oḍighi ghan bọ. 49 Kụ ịyal anyina abumarani phọ — mị kịlhiom ni inyina loor esi olhe ẹmha phọ anyina rꞌịkaraph phọ anyina esi ooseeny ghan ịkaaghineen ạrumugh. Kụ nyina egbi olhegheri mọ mị kụ Ọmoogh-we dị ạmoogh oomo ịikpo phọ.”