Ạsipioghom mọ aJeruselem
22
Ọmoogh-we phọ ụḅaanaan ịmi. 2 Ọdi ạḅem mọ, “Oye dị kamugh ni, nạ aakolobian ni osophonaan ọoruen ẹmha phọ ẹpe ạrookom-enu omuza bọ ḍụghum? Gananami oomo ịkaraph ạraraar isa phọ ọdi maḍighi bọ aḍeenaan nyọdi. 3 Ḅẹni ẹmha phọ ịpe mị Ọmoogh-we dị ạmoogh oomo ịikpo phọ rạkaaph bọ: Loor esi dị nạ mạze bọ ḍita awe phọ ạna ḅịle ạapu loor ạna esi ooseeny ghan ịkaaghineen ạrumugh, amem ạna retu ni. 4 Nạ ạmoogh apum esi ọko arunu phọ ịpe ạḅile ạapuan esi ịkaaghineen ạrumugh phọ nạ ạkaaghi bọ, kụ esi ịduon phọ aḍio ạna retu ni, amem ạna mẹteeny! Pọ kụ ịyaar phọ mị mameera bọ mọ areelhe phọ ọgilaam nyịna ḅịle oomo areelhe phọ ọkpin ophogh nyịna. 5 Areelhe dị etuman rꞌareelhe dị ẹkelan ọkpin ophogh nyịna loor esi élegheri ologh phọ ạna. 6 Oomo abuḍiemiom Ịzirel oḍuom ologhi esi ịnyaam ạbidi kụ ọko enu. 7 *Rꞌoniin sịphe ẹmha phọ óghueni ọde rꞌonhiin ọdi. Nyina eegbegheḍiom ruuruen kụ ẹmiine rukpukele ạnmariir rꞌạbunyigo ạnmuny. 8 *Nyina ị́moogh ọlogh eegu riisi iigbia phọ, ḅịle nyina réeko ghan ḍio ophooghian phọ. 9 Buniin awe anyina rọgba ghan ọkpe ịlo ạbueri phọ ọbo ọmiin mọ ọze bịdi. Buniin ạbidi role ghan rịkia dị ọngo ịkaaghineen ạrumugh. Buniin oomo amem rọperemi ghan rụuphua ạbidi. 10 *Buniin ạbidi rọmina ghan rꞌạnmariir ọde ạbidi. Buniin rọkpaariom ghan nmạriir ịlo opesi ipesi rꞌạbidi mem dị bịdi rọmiina. 11 Buniin role ghan ẹmha, kụ buniin oolekian nmạriir ạnmuny ạbidi mꞌabumarani ạbidi ịlo ọrolan esi. 12 *Buniin awe anyina rọko ghan enu dị kọkpe bịdi ikpoki. Buniin rọlogh ghan ọḅar ạnyu ọmugh dị bịdi motene bụnon ạbuo Ịzirel ạbidi kụ ọmoogh ẹelha esi ạsuo ạbidi. Bịdi muwula ịmi.” Ọmoogh-we dị ạmoogh oomo ịikpo kụ mạḅem.13 “Mị katuom ẹeḅugh ạḍighaagh ạmi esi imi rꞌọkooghi arunu anyina. 14 Kẹ́etughian ghan mọ nyina kẹmoogh ni ẹnum ạkpo ologhi dị asugha mꞌọmoogh ịnyaam dị ẹmanam ịlo ophoophe ạraghaagh anyina mem dị mị mạmadan rꞌanyina. Mị, Ọmoogh-we phọ, kụ mạḅem kụ mị raḍighi ghan ni ịpe mị mạḅem bọ. 15 Mị kạwalalami we anyina ẹpe tọrobo ẹmha rꞌeelhe kụ akureri ịkaraph iiḍighi phọ anyina. 16 Kụ esi ịduon phọ ịpheri phọ areelhe phọ inyina kíghueni, kụ ọlo nyịna kelegheri ni mọ mị kụ Ọmoogh-we phọ.”
Ạnian ọosa Ẹnaan
17 Ọmoogh-we phọ ụḅeni ịmi mọ, 18 “Oye dị kamugh ni, ạbuo Ịzirel ụ́moogh ịyaar oḍighinom esi ạmi. Bịdi ọkigh ịdipho ạmama dị ụ́moogh mun mạar oḍighinom — ọgiata, ạmama, okuron, ạleezu — dị asugha mem dị mọosa silva ologhi ạnian. 19 Kụ iḍighi kụ nyịidipho mị Ọmoogh-we dị ạmoogh oomo ịikpo phọ rạḅeni bịdi mọ ọkaraghi ịdipho kụ ẹdi bịdi ụ́moogh mạar oḍighinom. Mị kạsighe oomo ạbidi atu aakpomoghi egina esi sịphe Jeruselem 20 ịdipho rọlogh ghan bọ silva, ọgiata, okuron, lẹezu rꞌạmama ologhi ạnian kọosa. 21 Agey ni, mị kaakpomoghi bịdi egina esi sịphe Jeruselem, agu nịan eeḍian ạbidi, kụ ạgboomi bịdi rꞌọghagh ologhi ạmi. 22 Bịdi kọgbo sịphe Jeruselem ọkaraghi ịdipho rọozaghami ghan bọ silva ologhi ạnian, kụ bịdi ogbi olegheri mọ bụno rologhoma ọghagh-ologhi Ọmoogh-we phọ.”
Ạsipioghom abuḍiemiom mọ Ịzirel
23 Ọmoogh-we phọ ạḅile kẹn ụḅeni ịmi. 24 Ọdi ạḅem mọ, “Oye dị kamugh ni, ḅẹni bụo Ịzirel phọ mọ ade phọ ạbidi ílho dọl iigbia, kụ iḍighi kụ mị rạliom nyọdi esi ọghagh ologhi ạmi. 25 Abuḍiemiom mọ ọkigh ạnam-dịka dị remophoghuan ạnyu ịnam mọ bịdi mẹze bọ. Bịdi ọze we phọ, ọsighe oomo ikpoki rꞌaruphua phọ dị bịdi kọmoogh, kụ esi ọkooghi runu phọ bịdi motene ịbadi rukpukele ạnmariir. 26 *Ạbupinyon rịkia phọ ọka ologh ạmi kụ ụ́logh eegu ịpe eḍighi bọ iigbia. Bịdi ụ́ngo ọgbaranaan igbo ịpe eḍighi bọ ịlo iigbia rꞌịpe íḍighi bọ. Bịdi rọ́tughemi ghan ọgbaranaan igbo ịdi ẹḅaal rꞌạraraar dị ị́ḅaal, ḅịle bịdi ọḅitonaan ḍio ophooghian phọ. Esi ịduon phọ awe phọ Ịzirel eghuan ịmi ụ́ngo. 27 Awe iiḍighi ịtooghi phọ ọkigh ilephiri asuogh dị rẹpanyi kẹsighe ịnḅilem mọ bịdi mẹze bọ. Bịdi ọko enu esi ịlo ọmoogh ẹelha. 28 Ariil phọ mạaghi ịkaraph phọ ịphen ịdipho awe dị ookpereghi iikpe rꞌọphalaḅaal ạgba. Bịdi rọmiin ghan uḍien ọkpe kụ ọkaaph ịmiin ọkpe. Bịdi rọḅem ghan mọ bụno rọḅa ekpo ọnhu Ọmoogh-we dị ạmoogh oomo ịikpo, kụ ọlo mị Ọmoogh-we phọ kọ̋ḅaanaan bịdi. 29 Ạraalha phọ roogbegheḍiom komi. Bịdi ọmiine rukulom mọ kụ oogbegheḍiom ruuruen. 30 Mị ụwa oye ọlo kạḅiir iikpe, ọlo kạmeera sịphe ariisi phọ ịpe iikpe phọ memeel bọ kụ abianaan de phọ mem dị ọghagh ologhi rạnya ịlo ophiemi ọdi, kụ mị ụ́miin rꞌoniin. 31 Esi ịduon phọ mị kạkatan ọghagh-ologhi ạmi esi ạbidi kụ aagulemi bịdi ịdipho ạnian loor esi ịpe bịdi moḍighi bọ.” Ọmoogh-we dị ạmoogh oomo ịikpo kụ mạḅem.