Elhool ẹgham Ọmoogh-we phọ
21
Ọmoogh-we phọ ụḅaanaan ịmi. 2 Ọdi ạḅem mọ, “Oye dị kamugh ni, tuphughiom Jeruselem. Tuphughiom riisi phọ awe rooseeny ghan bọ. Pụr rụru de phọ Ịzirel 3 mọ mị Ọmoogh-we phọ rạḅem ghan: mị ạmulogh-ḍien ạna. Mị katuph elhool ẹgham ạmi kụ ạze oomo anyina, bugey rꞌạbukaraph iniin phọ. 4 Mị kaḍighinom elhool ẹgham ạmi ịkaraph tọrobo oye emiigh ẹpe ephunom mọ esi ẹphen esoorom mọ. 5 Tọrobo oye kalegheri ni mọ mị Ọmoogh-we phọ maruph elhool ẹgham ạmi kụ mị káseere mun.6 “Oye dị kamugh ni, kụph mụdi ekpom ạna kụ retuuru rꞌamukum ologhi. Kụph esi ọto esi dị tọrobo oye kaphogh nyịna. 7 Mem dị bịdi opuru nyịna mọ eeghe kụ nạ rạkuph bọ, ḅẹni bịdi mọ aloor esi ọghaaph phọ ọpo ratu bọ. Mem dị ọdi aru, iloghi ạbidi kemuza rꞌoghiilaan, ạraghaagh ạbidi kedugh ni, ạkpo ologhi ạbidi kạmoogh mabi, kụ aruukum ạbidi eekpeka. Amem mọ mẹteeny, mesi ni sịen.” Ọmoogh-we dị ạmoogh oomo ịikpo mạḅem.
8 Ọmoogh-we phọ ụḅeni ịmi mọ, 9 “Oye dị kamugh ni, mịinaan. Ḅẹni we phọ ịpe mị Ọmoogh-we phọ rạkaaph bọ:
“Elhool ẹgham, elhool ẹgham moghola kụ ogbuur
10 Nyọdi okola ịlo oghiighom,
ogbuur ịlo ọraphan ịdipho ọnmem
iboh kẹ́tol,
ịdi eḍighi bọ awe phọ ạmi ụ́maghami ịyaar oomo ọphur ạruru rꞌọliom.
11 Elhool ẹgham mọ rogbuur ri,
ịlo ookolobian ọdi ẹlo oḍighinom
Nyọdi okola ni kụ ogbuur
ịlo kọlogh ologhi ạḍighaagh ọziom.
12 Moghi esi amukum ologhi, Oye dị kamugh ni;
elhool ẹgham mọ ẹphen oseere ẹlo awe phọ ạmi
rꞌẹlo oomo abuḍiemiom mọ Ịzirel.
Kọze bịdi ọḅaram oomo ạbueri phọ awe phọ ạmi.
13 Mị rạdegh we ạmi kaphogh,
kụ eḍighi mạar dị úmeera ukiton,
oomo ạraraar phọ ịphen kemitenaan ni bịdi.
14 “Nyịidipho, Oye dị kamugh ni, mịinaan. Kpoolha rạghaagh ạna, bịn elhool ẹgham mọ keben kụ ẹḅile eben. Elhool phọ, elhool dị rẹze ghan, elhool dị rẹngo ghan eepuph kụ ẹkanyan. 15 Ọdi raḍighi ghan ịdi awe ạmi kotoph ạkpo ologhi kụ okpetaan omeel. Mị rạpaarogh ni ẹmha phọ ạbidi rꞌelhool dị rẹtaphan ịdipho ọnmem kụ eekolobian ni ịlo oghiigh. 16 Sạm ạghi elhiom rꞌekeeny phọ, nạ elhool ẹgham dị eroph! Sạm tọrobo ekpisi dị nạ asoman. 17 Mị kẹn kakpoolha rạghaagh ạmi, bịn ọghagh ologhi phọ ạmi mamuneen. Mị Ọmoogh-we phọ kụ mạḅem.”
Elhool ẹgham ogbogh ọdaam mọ ạBabilon
18 Ọmoogh-we phọ ụḅaanaan ịmi. 19 Ọdi ạḅem, “Oye dị kamugh ni, kọghoron amitiom ịyal areten ekpisi dị ogbogh ọdaam ạBabilon phọ kạḍua atu rꞌelhool ẹgham ọdi. Ịyal phọ areten phọ kemiigh ni eniin phọ eelhe phọ. Gim eḍeenaan esi phọ areten phọ eḍighi bọ ịḅari. 20 Eniin keḍeenaan ọdaam-ẹmha phọ eten dị rẹki eelhe ạbuo Amon, ẹpe ẹmha phọ Raba; kụ ẹpheri phọ eten dị rẹki eelhe phọ aJuda, ẹpe ẹmha phọ aJeruselem ọkparami bọ. 21 Ogbogh ọdaam ạBabilon phọ ạmeera ọogaany eḍeenaan phọ ogim bọ sịphe ịraar-areten phọ. Esi ọwa olegheri ẹghen eten ẹlo ọghi, ọdi apighemi ịkpina phọ; ọdi ạki ḍipuru esi ịkaaghineen ạrumugh ọdi; ọdi ạaḅeghion ni ẹnam dị ọphighironom ẹkia. 22 Nyịidipho! Ạḍighaagh elhiom ọdi ẹpam ẹkpina dị ọge ‘Jeruselem’. Ẹkpina phọ rẹḅeni ghan nyọdi ịlo ọghi ọmeremi ạraḅam, ịlo ọlo ạḍiolo ẹgham, ịlo osereghi ạraḅam ọḅagham ạrunhu-aḍibuo phọ, ịlo ọḅiir iikpe, ḅịle rꞌoguph asikol. 23 Awe phọ aJeruselem kómeeraam ịphen phọ loor esi ịge ạmuḅoph phọ bịdi mọgian bọ. Kụ ọlo ịmiin phọ ịphen ịlo ọghiom ologhi bịdi esi ịkaraph phọ ạbidi ḅịle rꞌọphur ạbidi rụru mọ kosiphi ni bịdi. 24 Ịphen kụ ịpe mị Ọmoogh-we dị ạmoogh oomo ịikpo rạkaaph bọ. Ịkaraph anyina mogananami. Tọrobo oye alegheri ni ịdi nyina ẹpioman. Nyina eḍeenaan ịkaraph anyina esi ạtorobo eḍighinom ịyaar anyina. Nyina ẹmeera esi apum, kụ mị kịḅogh inyina ạngo bụmulogh-ḍien anyina.
25 “Nạ ọkaraph ọolha-ẹmha Ịzirel dị úlho dọl iigbia, aḍio ạna, aḍio eekuna ọliom ạna, retu ni. 26 Mị Ọmoogh-we dị ạmoogh oomo ịikpo mạḅem. Zughuronaan eghoony ọdaam ẹmha phọ ạna rꞌọkaghaam mọ ạna. Ịyaar kẹ́tol mun iniin phọ ịpe ẹrol ghan bọ. Poophe uwekulom mọ ạrolomi esi ịtooghi! Soore ude bụphe rọtooghi bọ! 27 Eegulaan, eegulaan! Agey ni, mị kaḍighi ẹmha phọ eegulaan. Kụ ọlo ịphen phọ kémite tụtu oniin phọ ọpo mị mạsaḅar bọ ọlo ọliom ẹmha phọ aru. Pọ kụ amem dị mị kạḅogh ẹmha phọ ạngo nyọdi.
Elhool ẹgham rꞌạbuo Amon
28 *“Oye dị kamugh ni, mịinaan. Ḅẹni ịpe Ọmoogh-we dị ạmoogh oomo ịikpo phọ rạḅeni bọ bụo Amon phọ, bụphe rọgilaam bọ Ịzirel. Ḅẹni bịdi mọ,
“‘Elhool ẹgham eekolobian ni ịlo ophiemi;
elhool phọ ogbuur ịlo oghiigh, ịlo ọraphan ịdipho ọnmem.
29 “‘Uḍien phọ ịpe nyina ẹmiin bọ ọkpe ni, ḅịle ịmiin phọ ịpe nyina ẹmiin bọ ọkpe ni. Nyina ebeeph rꞌịkaraph, kụ aḍio anyina retu ni, aḍio eekuna ọliom anyina. Elhool ẹgham kemeelom ạnyu irum anyina.
30 “‘Ipoophe ạnyu elhool phọ. Mị kiigbonaan inyina ịiruen sịphe esi phọ ẹpe ịlhem bọ inyina, sịphe ade phọ ẹpe ịmar bọ inyina. 31 Nyina keloghoma ọghagh ologhi ạmi mem dị mị ạkatan nyọdi esi anyina ịdipho ạnian dị reemor. Kụ mị kịḅogh inyina ạlogh rạghaagh awe ẹkaraph ẹzo, rephelegbe esi ophiemi. 32 Kiphiemiom inyina nịan. Ịḅaal anyina kozu ologhi eelhe phọ anyina, kụ oye ólho dị kạḅile ịitughian inyina.’” Ọmoogh-we phọ kụ mạḅem.