Oye phọ
4
Pọ eeghe ịdi nạ ạnighe, ạnir ẹphomoghian ạmi;pọ eeghe ariḍien ạna ḍi rẹmuom ni rꞌẹphomoghian
ologhi ạnmana phọ ạna.
Ạsilaal ạna rẹker ghan ịḅa ịdipho aḍita ạrutu-ịga
dị repeleghu kesoor roogbolom ạGiliad.
2 Ạralaal ẹḅaal ịdipho iyool-ịga
dị pụruku ọsam suphuugh phọ kụ owur mụum.
Rꞌoniin ọnyo ạbidi óphe,
Oomo phọ ịne ẹmaar ẹkasian kụ edi.
3 Ịidoronhu ạna ẹkigh ọbam ọtogh-tọgh oḍigh-ịnme;
pọ eeghe oḍigh-ịnme ẹmhu mem lọ nạ rạḅa.
Arukpo ạna rẹmu ni ologhi ạnmana phọ ạna.
4 Orum ạna ạkigh ẹsogolo esi otu ạnyu aDevid,
aaghiraan kụ rạmogh
rꞌikoli orum dị ẹghigh oniin ọonir ịsuaram kụ onyor okoom.
5 Ạramamaam ạna ẹkigh izoogh,
ịyal dị rẹḅal ịḅal igbo ạsifalaway.
6 Mị kạtol ạnyu eegbolom dị amaa ọdi,
eegbolom dị ịnsens kụ ọdi,
tụtu ookuugh ạḍiroor aghugh
kụ ufiri phọ aḍigh ighu.
7 Pọ eeghe ịdi nạ ạnighe, ạnir ẹphomoghian ạmi;
pọ eeghe ịdi nạ amunughan.
8 Ḍụa ẹpe ạraaḅaraph ạLebanon phọ aru ụdaph ịmi, ạnir dị mị kapin.
Ḍụa ẹpe Lẹbanon ụdaph ịmi.
Ḍụa ẹpe ạnyu Eegum Amana asoor ude,
Ḍụa ẹpe Eegum aSenir rꞌẹpe Eegum Hẹrmon
riisi phọ ịpe ạnam-dịka rꞌariitiir phọ erughogh bọ.
9 Ephoghom ariḍien ạna, ạnir ẹphomoghian phọ ạmi dị mị kapin,
rꞌikoli orum mọ ạna
mẹsighenom ologhi ạmi ẹmeremi.
10 Ẹphomoghian ạna ịḅeeraan ịmi iboom,
aḍidugh ologhi ạmi, ạnir dị mị kapin,
Ẹphomoghian ạna ẹnighe epu miim;
Elho eeḅi eḍu phọ ạna epur epu ịnon ọdo arolo eḍu.
11 Ạḍimen ẹnuum aḍiowo kụ edi ịidoronhu ạna, ooḅi ạnir ạmi;
Anem ạna eḍighi mạmaam ạnam rꞌẹnuum aḍiowo esi ạmi.
Iinmenan ạna ẹpam ni oomo eeḅi eḍu phọ ạraraar phọ edi bọ Lẹbanon.
12 Ạnir ẹphomoghian phọ ạmi dị mị kapin, nạ oghoony ịizupha dị ạaghian,
oghoony ịizupha dị oghoonyom iikpe, ọonu adir ogina oye,
13 ịsiphe kụ ẹdi ịizupha phọ reemanam.
Bịdi kemite ịdipho oghoony arekpetughe
kụ emuum ọkaraghi igey iimuma.
Amem ílho dị arolo eḍu kịrokiro ẹkuom ghan — hẹna, nad,
14 sạfaron, kalamos, sịnamon, frạnkinsens,
maa rꞌalos reḍum ghan sịphe —
rꞌọdo kịrokiro ạraraar dị repulughaan eeḅi eḍu.
15 Ạruunu adir kụ eeduom ghan mụum rẹḅore ịizupha phọ,
asikol okiilia ạmuum,
ạmuum dị rakilogh kꞌẹpe ạraaḅaraph ạLebanon kasoor.
Ạnir phọ
16 Ookuugh Ephunom, ḅetenu;
Ookuugh Esoorom, pula ịizupha oghoony phọ ạmi;
Muzeḍiom ookuugh phọ eeḅi eḍu.
Oye ẹphomoghian ạmi aru sịen oghoony phọ ạmi
kụ alhe ọkaraghi igey iimuma phọ!