2 Ọmoogh-we phọ ạḅem mọ, “De rꞌạke, iler rụru ẹnaghan ịphen mị rạḅem bọ! Ạnmuny phọ mị aakonom bọ mọgbagharan esi ạmi. 3 Ạsinam elegheri ni nyọpo ạmoogh bọ bịdi, kụ ịnam adool elegheri ni ekpisi dị uwotu ạbidi rạngo ghan bịdi eḍien. Kụ ịpe awe phọ ạmi Ịzirel útue ulegheri. Bịdi ụ́naghanan rꞌẹnum.”

4 Moruule nyịna, nạ eelhe ịkaraph, nyina ịḅoria rꞌạbukaraph awe! Ịkaraph anyina ịghogh inyina ude! Nyina meghel Ọmoogh-we phọ, Oye Aghuḍuul phọ Ịzirel, kụ mẹgumom ọman anyina nyọdi. 5 Iḍighi ika kụ nyina ẹḅile bọ ni rẹgbagharan ghan? Nyina rẹwa ghan dị kịlhiom inyina opu sịen ḍụghum? Ịzirel, ẹmhu ạna mookpereghiom rꞌạreeḅephenu, kụ ekpom ạna rꞌologhi ạna ímoonogh. 6 Emiigh ẹmhu kụ esi ẹda owol, esi dị emoon loor ạna ílho. Asigbir, areeḅepha, ạroko rꞌareelhema eleeny oomo aloor ạna. Riisi ạna kőgbuurogh mꞌọghoroghi. Rọogho kẹn kőḍighi riisi phọ ạna.

7 Eelhe anyina mophiemi, kụ rạmha anyina mọsuughi nịan oogulemi kꞌude. Nyina repogh ni kụ aruuruen phọ ọsighe bọ de phọ anyina opiemiom oomo ạraraar. 8 AJeruselem bịn kụ asugha, ẹmha dị moghoonyom — oghoph ólho ịdipho ogbogo okoriom ozo iimuma avain mꞌogbogo sịphe ozo akukumba. 9 ^*Eru mạar dị Ọmoogh-we oomo ịikpo phọ musugheeny bọ buniin awe mọ ọrol, ọbo mụkaraghi ni ophiemi Jeruselem ọmadan, ịdipho ophiemi bọ Sọdom rꞌaGomora.

10 Jeruselem, bụo ịtooghi rꞌawe ạna ọkigh ịdipho ạbuphe ạSodom rꞌaGomora. Ler rụru ạnaghanan ịpe Ọmoogh-we phọ rạḅeni bọ nyịna. Zuumaam ạnaghan ịpe Ẹnaan phọ ayira rẹtughemi bọ nyịna. 11 ^*Ọdi rạḅem ghan mọ, “Nyina rẹetughian ghan mọ mị rạwa ni oomo ạrikia phọ ịphen nyina rẹpinyon ghan bọ kịngo ịmi ḍụghum? Iyool-ịga phọ nyina reguom ghan bọ nịan ịdipho ạrikia, ḅịle rꞌẹnuum ịma ịnam mọ anyina mẹphughanam esi ạmi. Ịḅaal ilephiri ạsinam rꞌiyool rꞌạrutu-ịga phọ mịpher ịmi. 12 Ạnhian kụ ịḅeni bọ inyina oruom ạmi oomo ịphen mem dị nyina eru ooseeny ạmi? Ạnian kụ ịḅeni bọ inyina ophumogh ạrada aruwol okitonom ologhi Otu Ịiḅereghi phọ ạmi ịdipho phọ? 13 Aruunmo phọ anyina oopho ni bịn. Eḍu ịnsens phọ nyina rẹsu ghan mẹphue ologhi ạmi. Ạrayaal omoom ụnwanyu rꞌariiḍio ophooghian rꞌarookpomoghan iigbia phọ anyina ikia ni ịmi iboom; ịkaraph phọ anyina mẹepu oomo phọ ịdi. 14 Mị akel rạyaal omoom ụnwanyu anyina rꞌariiḍio iigbia; adool ạbidi mịpher ịmi orool.

15 “Mem dị nyina ephoophe rạghaagh anyina esi ịiḅereghi, mị inyina kíphogh. Tọrobo ịlo nyina ẹeḅereghi ghan, mị káler rụru ạnaghan ịdi eḍighi bọ nyina mezu ịḅaal. 16 Iitola siloor anyina ẹḅaal. Ịbile yogh oomo ịkaraph phọ ịphen mị ạmiin bọ nyina reḍighi bọ. Ikunughi oḍighi ịkaraph. 17 Kụ ẹtuugha oḍighi ghan igey. Ịmiin mọ oseleman ạtol — ịloghonaan ḍịghaagh bụphe rọgbiphoghom bọ, ịngo bụnyigo ạnmuny ịlo eru ịlo ạbidi, kụ ẹphel rukpukele ạnmariir phọ.”

18 Ọmoogh-we phọ rạḅem ghan mọ, “Okunughi ọghaaph phọ. Ghạlamo nyina mẹbiphigha ịkaraph dị ẹtogh ịdipho oodor, mị kiitol li inyina ịdipho ibikpo. Nyina kẹḅaal li ịdipho asuphuugh iyool-ịga. 19 Eḍighi mạar dị nyina kịnaghanan ni ịmi, nyina kele ni igey ạraraar ade phọ. 20 Kụ eḍighi ịyaar dị nyina ịgbagharan ịmi, pọ nyina meḍigh edoghola aḍuugh. Mị Ọmoogh-we phọ mạḅem.”

21 Ẹmha phọ ẹpe ẹmoogh ghan bọ ni ọmeeraam mẹḅile ẹkigh ạnir dị rale ghan ẹmha! Mem dị meten, awe aruukuan kụ umuza, kụ nyịidipho ạrookom-enu bịn kụ mosugha. 22 Jeruselem, mem dị meten nạ ụghigh silva, kụ nyịidipho nạ ọ́man mun ịyaar; nạ ụghigh mugey amiim, kụ nyịidipho nạ maḍighi mụum bịn. 23 Abuḍiemiom mọ ạna ạbuo ịgbagharan rꞌạrighiri ạruḅa; oomo amem bịdi rọbonyi ghan ruunmo kolhe ịgara. Bịdi rọ́pel ghan bụnyigo ạnmuny lọ osoor erugh ịiruen, róler ghan rụru mem lọ arukpukele ạnmariir rọgba sịagba.

24 Esi ịduon nyịidipho, ịnaghanan ịpe Ẹnaan Oomo Ịikpo phọ Ịzirel Ọmoogh-we phọ rạḅem bọ: “Mị kiḅulemian ni inyina ạbumulogh-ḍien phọ ạmi, kụ nyina ịmi kị́ngo mun ịiḅaghami. 25 Mị kịlhiom ni inyina. Mị kagbuurogh ẹenir phọ anyina ịnighemi inyina ịdipho ạmama dị mọsighe nịan oselemiom. 26 Mị kịngo ni inyina bụo ịtooghi rꞌạbuo oromoghiom ịdipho ạbuphe nyina ẹmoogh ghan bọ geediidi. Pọ kụ amem dị kokol Jeruselem mọ ẹmha aruukuan rꞌọmeeraam.”

27 Loor esi dị Ọmoogh-we phọ aseleman, ọdi kạpel li Jeruselem rꞌạtorobo oye dị akiton. 28 Kụ ọdi kaagbighiḍi ni tọrobo ọlo ạpiom kụ ạgbagharan esi ọdi; ọdi kakiigh ni tọrobo ọlo aghel nyọdi.

29 Nyina kekururu ni mọ nyina meeseeny ghan ireeny ạḍiogh ẹḅile eghoonyogh ịizupha iigbia. 30 Nyina kenyororo ni ịdipho ạḍiogh dị remugh, ịdipho oghoony ịizupha dị oye ráaḍu ghan mụum. 31 Ịdipho ikpu dị oseere loor ạnian dị ẹkpataan, ịdipho kụ ịdi ẹkaraph eḍighinom ạraraar ạbidi kepiemi bịdi, kụ rꞌoniin kátue asophe ophiemi phọ.